1 Ḡod mal vēyvēyne vatag lavatvat nonon, a gēn tavan vēh mahē nonon so tog m̄ōkheg tiwag mi kē. Tō itōk so gēn mētēgtegoy, ba etgoy galsi, veg nehet so gēn tuwtuw den, tō gēn tit kalbat vēhte tiwag mi kē. 2 Veg noyoy ēwē maqal gēn, qele maqal ige yatqōtqōngēn. Ba noyoy nan yeghuquy van hiy kēy, veg kēy et dēmtig te noyoy nan. Bastō kēy et qultiwag te mi nēvēwti et mey a moyon̄teg.

3 Ba gēn mey a nēdēmtig, gēn tahayveg van lamahē nonon a kē tog m̄ōkheg tō aē so tog malaklak, qele a Ḡod mavasemlō tō en so,

No mololgagay yeh kēy wa mōm̄ōk nēvēn̄vēn̄ van hiy kēy so

kēy tit hayveg vēhte van lepnō tog m̄ōkheg mino.✝

Ḡod mavap qele gōh, ba mahē a kē mitin̄ bah namyam gōh en, tō namgumgu namun mabah qēt.

4 Nayapyap Tēnēte nihole gatay nōqōn̄ m̄ōkheg, so, "Lōqōn̄ liviyō en, Ḡod mōm̄ōkheg den vel mugumgu namun."✝ 5 Ba mahē tegha Layapyap Tēnēte Ḡod wo, "Kēy tit hayveg vēhte van lepnō tog m̄ōkheg mino."

6 Nēdēmdēm nan so igōhkē nēvēwti vōyō, yatkelgi mey a tavan lepnō tog m̄ōkheg, wa ige vēwti mey a kēy moyon̄teg noyoy ēwē wa kēy et tatag te, tō kēy tit kalbat vēhte lepnō tog m̄ōkheg. 7 Lēklan me atgiy, Ḡod metyak nōqōn̄ tegha so kalbat lepnō tog m̄ōkheg tiwag mi kē. Kē m̄ōl van nōqōn̄ nan so ‘qiyig agōh.’ Kē mavap nohohole nen heylō me den Mayanag Devēt, qele no mal hole vatag se so,

!Qiyig gōh, mahē kimi yon̄teg naln̄an Ḡod en,

nitog so niqtimi nimaymay.

8 Napnō tog m̄ōkheg en, kē et napnō non ige Juw te, mey a Josua* mepgal veg tō en. Veg Josua melep tō napnō nan van hiy ige Juw am̄ag yeh den Devēt. Sowo natno tog m̄ōkheg en napnō non ige Juw vēlēs, tō Ḡod tit hole gatay vēhte napnō nan lok me atgiy, mahē a Devēt nēh.

9 Veg bege gōh Ḡod metyak napnō tog m̄ōkheg hiy ige nonon, tō so kēy totog m̄ōkheg aē qele kē mōm̄ōkheg tō lōqōn̄ liviyō, a nitiy qōn̄ nonon. 10 Ihēte a nihayveg hay lepnō tog m̄ōkheg non Ḡod en, kēy m̄ōkheg den namgumgu nonoy, qele Ḡod mōm̄ōkheg tō den namgumgu nonon.

11 Veg bege gōh en, itōk so gēn mugumgu mi nēhyēngēn so hayveg lepnō m̄ōkheg, tō so tateh et tisisgoy lēmētwun ige tam̄ag mey a nēqēt maymay.

12 Veg Ḡod netgeh gēn. Tō nohohole nonon nēh, wa naman aē. Tō nohohole gōh nehey veteg nagasel bepgal a nehey salakyō. Tō kē tēvēlwoywoy vēh vel dēmdēm wa vel mētwuge, tō tēvēvēg vēh, qeleso nagasel a teplēh yak vēh nēphog den nihiy. 13 Vel haphap del a Ḡod mitin̄ tō en, kē netsas, tō tateh hap mey a natakbat den kē. Tō gēn titig van lengon so vulu kē bēh nongēn.

14 Bahnentō, itōk so gēn tig maymay lēdēmdēm nongēn, lahap a gēn mavaplō tō so gēn ige non Tigsas. Veg Tigsas en, ikē Ēntēn Ḡod, wa kē nam̄e pris liwo a mēvēykal lok lōtōk alge. 15 Mahē a gēn nem̄geygey en, nipris liwo nongēn memgaysēn gēn, veg kē mavan heylō temun tō nem̄eygal del. Ba tateh bug geh mi kē. 16 Sōwlē, gēn tog mētēgteg so van sisqet Ḡod a letno haghag liwo nonon. Veg leln̄e magaysēn nonon en, gēn tetsas vēh nasgōp aē, tō kē temyin̄ vēh gēn.