1 Hēywē, nakavanan tam̄ag mōlvayēg so nēm̄ yon̄ aē lemyam gōh mey a nēm̄ tēvēlgapye, wa tō so ige Juw taqlun̄ goy Ḡod qeleave. 2 Ige tam̄ag mētēymat nahye olol qelegēn. Kēy migilgeg nēm̄ tēvēlgapye vitwag a nidinlat aē vōyō. Nidin mey am̄ag en, kēy ōl so Mahē Yon̄. Lidin gōh, nuqul vitwag aē, nolta, wa nēbrēyt vawē. 3 Tō kēy midin goy nidin gōh mi namalmal vitwag. Tō tekel malmal en, nidin vōyō negi a kēy ōl so Mahē Yon̄ a Noyon̄. 4 Hay lelo din gōh en, nolta vitwag aē wa nabakōs ne kavanan. Nolta nan bihilhil tēnge qōnqōn. Kēy mak nolta nan mi nōḡōl.

Nabakōs yon̄, kēy nuqul walēg mi nōḡōl. Ba hay lelo bakōs nan en nage vētēl alon. Vitwag natbey a mak mi nōḡōl ba namana nahag alon.* Vōyō negi en, nēqētōwtōw non Aron mey a nakaskas mataw den.✝ Tō vētēl negi nan nevet teqetqen̄ a mayap Nele non Ḡod apwon.✝ 5 Apwo bakōs yon̄ nan en, nototgal vōyō qeleso nin̄sel a kēy mitin̄ mi nōḡōl. Kōyō aklō me nēlēn̄as non Ḡod, ba namneyō nemelmelgoy namte bakōs nan. Kēy ōl namte bakōs nan natno dēmveteg bug. Ba gēn tit vasemlō qēt vēhte qiyig vel haphap del anen.

6 Mahē a vel haphap mētēymat qēt hay lēm̄ tēvēlgapye en, nidin mey am̄ag nahyan ige pris. Tō kēy hayveg hay tō mugumgu vel qōn̄ qeleanen. 7 Ba vag tiwag woy ēwē vel ēte nipris liwo mahgen nihayveg lidin vōyō negi nan. Mahē kē nihayveg hay en, kē nētēy nivinlah a naday ne sipsip alon en. Tō kē niolol van hiy Ḡod mi naday ne sipsip. Ba sowo tateh day, tō kē tit hayveg vēhte hay. Veg naday gōh so nitamgoy nubug nagan wa nagan ige sil mey a kēy mak tō ba kēy et ēglal te aē.

8 Nuvu Yon̄ nivasemlō so nahaphap geh gōh qeleso navap tēngeg. Namanig nan so lamahē a nēm̄ tēvēlgapye et leh yak qete en, namtehal hay Mahē Yon̄ et wak te hiy nisil. 9 Nēm̄ tēvēlgapye en, ikē nēvēglal ēwē ne mugumgu del non ige pris mey a kēy olol tatag van Nele non Mosis gaydēn̄ me qiyig kē. Nalen̄a tiwag mi nolol mey a ige pris olol aē en, kē et haytēyēh te so niak wenwen nēdēmdēm non net den namamayge ne bug. 10 Veg Nele nan nivap gatay ēwē begengen, wa binin, wa so net nivasugyon̄ qeleave. Meygōh nahaphap ne taqn̄ige ēwē. Ba nele geh nen totog lap gaydēn̄ a Ḡod nileh kēy mi namtehal mey negyaq.

11 Togtōkē Kraēs mal van me, kē mal lep me nahaphap mey nēwē. Kē nipris liwo lelo tiy ēm̄ tēvēlgapye talge mey a neketket yeh. Net et gilgeg te nēm̄ nan, tō nēm̄ nan et ēm̄ telemyam te. 12 Kraēs mahayveg hay Mahē Yon̄ a Noyon̄ vag tiwag woy ēwē. Tō kē et qele te ige pris lililwo telemyam gōh, a kēy mahayveg hay Mahē Yon̄ mi naday ne nanigot wa naday ne inti bōlōk. Tateh. Ba Kraēs mahayveg hay Mahē Yon̄ alge mi naday nonon mahgen. Tō kē matamgoy gēn mi naday nonon vag tiwag woy ēwē so gēn totog wawah lap tasga.

13 Naday non nanigot itōk so ak wenwen nataqn̄ige, ba naday non Kraēs neketket yeh. Et tow van. Mahē ige pris tam̄ag olol mi nanigot wa nōbōlōk tam̄an wa nōbōlōk lōqōvēn en, kēy lep naday siso nōwōwō nan tō tetn̄eg van hiy ige sil. Tō naday si nōwōwō nan tak wenwen nataqn̄ige lengon Ḡod.

14 !Ba naday non Kraēs en, naman nan nitiy ketket yeh! Veg Kraēs newenwen, tō kē mukēg nēh nonon so niolol aē van hiy Ḡod heylō Nuvu mey a notogtog lap vaga. Tō naday nonon haytēyēh so niak wenwen nēdēmdēm nongēn. Ak tō so gēn ukēg veteg namgumgu tam̄ag a yeghuquy ēwē, tō van me noyowyowveg non Ḡod. Namgumgu tam̄ag en, tateh ēh aē, ba Ḡod en, kē nēh.

15 Kraēs gōh, ikē nitig lēvētnangēn bakaktig nakavanan gayaq non Ḡod. Veg bamatmat nonon, kē matamgoy negengenyeg non ige sil, veg kēy et dēmap te nakavanan tam̄ag. Kraēs mak tō so ige et mey a Ḡod mōlōl kēy me en, kēy telep nēh lap mey a Ḡod mavatvat van hiy kēy.

16,17 Nakavanan non Ḡod qeleso nēvēyvēyne. Mahē net vitwag so nimat en, kē nivēyvēyne. Ba so kē wo et mat te, tō nēvēyvēyne nen yeghuquy ēwē. Bastō nēvēyvēyne nan taktig ēwē vēh a so gēn ēglal so net nan mamat.

18 Veg bege gōh en, nakavanan tam̄ag maktig ēwē veg naday molon̄. 19 Mahē Mosis mavasemlō qēt naln̄e vayēg del Bele non Ḡod hiy ige sil en, kē niswuy naday apwoy. Kē meswuy qelegēn. Kē melep naday ne bōlōk su tiwag mi naday ne nani, tō nilēy mi nēbē. Tō nilep nayo tētēnge vitwag, ōl so "nihiysop," wa nili sipsip a nalawlaw, tō niqēl hōw laday, tō nitetn̄eg van lōbōk ne Le non Ḡod, wa apwon ige sil. 20 Tō kē mavap so, "Igōhkē naday so niak nakavanan non Ḡod gōh nitig maymay. Tō Ḡod mal ōl gontegoy so kimi so dēmap."

21 Tō qelese anen, Mosis metetn̄eg naday apwo ēm̄ tēvēlgapye nen wa apwo haphap del a kēy mogmogo aē en. 22 Tō Nele non Mosis mavap so sisqet vel haphap del en, ige pris so ak wenwen mi naday. Ba sowo tateh day tō so nilon̄ en, tateh dēmveteg bug geh.

23 Vel haphap lelo ēm̄ tēvēlgapye non ige Juw en, ikē nototgal ne haphap hag lōtōk en. Tō ige pris tam̄ag mak wenwen nahaphap nan lengon Ḡod mi nolol gōh.* Ba nitiy haphap a hag lōtōk en, kēy neketket yeh den nahaphap telemyam gōh a nototgal ēwē. So ak wenwen nahaphap talge en, itōk so olol mi nage mey a neketket yeh.

24 Veg Kraēs et hayveg te hay Mahē Yon̄ a ige et mētēy kal tō mi namney. Tateh. Meynen namalēn ēwē. Ba kē mal van litiy mahē yon̄ hag alge en, tō so kē nitig leh gēn lengon Ḡod, tō kōyō hohole nogoyō.

25 Tō Kraēs et olol te vag m̄adeg, tateh, ba vag tiwag ēwē. Kē et qele te ige pris lililwo telemyam agōh, veg kēy hayveg hay Mahē Yon̄ velvel ēte bolol, tō kēy et olol te mi naday nonoy. 26 Ba Kraēs so tak tō qelenen, togtō kē toyon̄ memeh vag m̄adeg. Ba naqtēqtēg ne mayam, tō mēdēn̄ me qiyig gōh, et qele te nen. Togtōkē, yipteg nōlsi mayam, Kraēs mavan me vag tiwag woy ēwē tō molol mi nēh nonon so nitamgoy nubug.

27 Namtehal vitwag ēwē: net tamat vag tiwag woy, tō me atgiy, Ḡod tēvēvēg kē. 28 Tō qelese nen, Kraēs mukēg nēh nonon vag tiwag woy so nitamgoy nubug non ige m̄adeg. Tō kē tavan lok me vagyō negi, et bubug site, ba so nivaēh ige a nenyē kē.