1 Den Jemes, neslev non Ḡod wa Welan Tigsas Kraēs.

Hiy kimi ige ginwotwot son̄wul nanm̄e vōyō Tisrael a tog vivitwag tō vel vōnō a lelo mayam en.*

Lemtap nēwē.

2 Yēhē yathithik wa yatētētek, malaklak mi nam̄sēksēk mahē a nahaphap het tegtegha niqal kimi so helhel etgal nēdēmtig nonmi. 3 Malaklak veg kimi nēglal so nahaphap het nivatne kimi so tig maymay vaga. 4 Tig netnet tasga mi navaksami tō so nēk tavan me nam̄e et a namtevu del vēlēs wē geh.

5 Sowo net vitwag den kimi, nēmnay tateh mi kē en, itōk so kē nivēhge van hiy Ḡod. Tō Ḡod telep vēh nēmnay van hiy kē, veg Ḡod nohoghog galsi hiy ige del, ba kē tit etet hethet vēhte van net mey a nemyōs namyimyin̄ den kē. 6 Ba itōk so kē nivēhge mi nēdēmtig, ba et mi nēdēmdēm vōvōyō te. Veg nēdēmdēm vōvōyō en, ikē qeleso nēyēm a yow lenaw. Nelen̄ niyip me en, tō kē nimlat soloteg. 7,8 Net qelegōh en, nēdēmdēm nonon tit hag matmat vēhte mahē vitwag. Nehet so kē nidēmdēm so kē tētēy vēh natkel hap den Welan.

9 Ihēte a nem̄say en, itōk so kē niwakwaksey kē aē, veg kē nahag letno liwo. 10 Tō ihēte a nam̄ye haphap en, itōk so kē niwakwaksey kē aē, veg tateh tono liwo n̄ēh mi kē. Veg nam̄e haphap nonon yeghuquy ēwē lengon Ḡod, ba kē teseygol qele natwēhtēnge. 11 Dēm tow van hiy natwēhtēnge. Mahē nalo nihal yak tō nisew en, tō nisqo natwēhtēnge. Tō nakaskas nisisisgoy, tō nēlēn̄as nan niqlen̄. Tō haytēyēh a qele net a nam̄ye haphap en, kē mugumgu lapgetō van lahaphap nonon en, tō net nan niqlen̄.

12 Ḡod nivawē net mey a nitig maymay mahē nahap qiyig nihelhel etgal kē. Veg mahē net nan nitigoy kē mahgen den nem̄eygal en, tō Ḡod telep van nayseyse hiy kē. Nayseyse nan, nēh mey a Ḡod mal vatvat vatag hiy ige mey a natam kē.

13 Mahē nahap qiyig vitwag nim̄eygal net en, tō kē tog vavap so, "Ḡod mem̄eygal no." Veg et metevun Ḡod te so nim̄eygal net so nigengenyeg. Wa tateh hap mey nehet het a teweseg vēh nēdēmdēm non Ḡod. 14 Ba net del en, namyōs het nonoy aē. Tō namyōs het nonoy m̄eym̄eygal kēy so sisgoy legengenyeg. 15 Mahē namyōs het nen nimaymay me hiy net en, kē nigengenyeg. Tō mahē kē nigengenyeg tasga en, kē toyowōlsēn yow namatmat.

16 Yēhē yathithik wa yatētētek a no nitiy tam yeh, nitog dēmdēmtig nagalgal mey a namyōs het nonmi nim̄eym̄eygal kimi aē. 17 Vel haphap del mey nēwē, wa vel hoghog mamah mey a nitiy wē yeh a gēn leplep en, kēy del mavan vēlēs me a hag lōtōk. Ḡod mitin̄ namyeyen hag alge en, wa kē nileplep me nage mey nitiy wē yeh hiy gēn. Namyeyen talge teleh vēh, ba Ḡod tit tig kēlē vēhte gēn. 18 Tatag lemyōs nonon en, Ḡod mavawot gēn heylō lohohole yon̄ nonon. Kē mak qelegōh kē tō so gēn tavan me qeleso negengen totogyeg den nētqē gayaq nonon.

19 Yēhē yathithik wa yatētētek a no nitiy tam yeh, atmi yon̄teg. Itōk so kimi del sōlsōl boyon̄yon̄teg, ba ak malkōh bohohole, wa ak malkōh bololgagay. 20 Veg lōlsēn yow en, nololgagay non net tit ak vēhte so nēmētwun nitnenen qele Ḡod. 21 Veg bege goh, itōk so kimi suwyeg yak namtevumi del mey nehet a kimi tog tēy tō en. Ba dēm bēbēw, tō lep vasgēt nohohole non Ḡod, a kē mal m̄ōk vatag van lēdēmdēm nonmi. Nohohole nan tavaēh vēh natalami.

22 Ba kimi so tatag nohohole non Ḡod, ba nitog yon̄yon̄teg yeghuquy ēwē. Net a niyon̄teg ba kē et ak tatag te en, kē nigalgal lokse kē mahgen. 23 Net mey a niyon̄yon̄teg nohohole yon̄, ba et akak tatag te en, ikē qele net a nietet lok nangon mi neteynin, ba kē et dēmdēm te van aē. 24 Kē met nangon leteynin, ba mahē a kē natyak den neteynin en, nalon niqōn̄ so nangon qeleave.

25 Ba net mey a Ḡod tavawē kē en, ikē net mey a nietet galsi nohohole non Ḡod, tō niak tatag. Nohohole non Ḡod en, ikē nitiy le mey niak so net totog m̄ōleg vēh. Net mey et yon̄teg yeghuquy te, ba nilep nētnegay so niak tatag vaga en, Ḡod tavawē kē lemgumgu nonon.

26 So wo net nidēmdēm so kē natatag goy galsi namtehal bomogmogo goy Ḡod, ba kē et etgoy galsi te nohohole nonon en, net nan nigalgal lokse kē mahgen. Tō nēmētwōn a bomogmogo goy Ḡod en yeghuquy ēwē. 27 Nitiy metehal bomogmogo goy Ḡod en, ikē qelegēn, so net nimyin̄ ige nēnētm̄ey mey a namdō, wa ige lōqōvēn nay a kēy notog lememeh. Ba tō kē nietgoy galsi nēh nonon so niwenwen vaga den nahaphap het telemyam. Ḡod Imam nongēn met namtehal nen so newenwen a newenwen.