1 Yēhē yathithik wa yatētētek, kimi nitog tamtam nehet. Nitog dēmdēm kal net vitwag ba dēm tēqēl net tegha. Namtevuge mey qelenen et sey te hiy net a nēdēmtig Tigsas Kraēs, Welan nongēn a nēlēn̄as aē mi kē.

2 Sowo net vōyō wo mahayveg me lēm̄ tatay nonmi, vitwag den kōyō nehey namalsam wenwen, tō nehey niyin̄ mey a nōḡōl aē, ba vitwag nem̄say, wa namalsam nonon nemhayhay. 3 So kimi wo lep vasgēt galsi net mey a nehey namalsam wenwen, tō vap van so, "Bulsal, van me haghiy hōw, natnē gēn." Ba kimi wo vap van hiy net m̄asay en so, "Nēk tig ēwē qeleanen, siso hag hiy how antan laqaqaye tono haghag mino." 4 Sowo kimi wo mak qelenen en, tō kimi matam nehet, wa tō kimi vēvēg net lēdēmdēm mey a et tenenen hōnqal te.

5 Yēhē yathithik wa yatētētek a no nitiy tam yeh, atmi yon̄teg galsi. Kimi nēglal vatag so ige mey a ige sil et van a so kēy nem̄say en, Ḡod metyak kēy so van me ige m̄eye haphap lemtehal ne dēmtig. Tō kē mōm̄ōk tēymat so kēy tavan lemyam gayaq a kē so nimyanag aē, qele kē mal vatvat vatag hiy ige mey a natam kē. 6 Ba kimi etet ige m̄asay qeleso kēy ige het. ?Ba ihē mak memeh kimi? ?Tō ihē mewseg tō kimi so van lōyōstiwag liwo so vēvēg kimi? Et ige m̄asay te, ba ige m̄eye haphap a mak hiy kimi anen. 7 Tō ige m̄eye haphap a hohole hethet nahan Kraēs en, ikē nahah mey nēwē a Ḡod mōm̄ōk veteg tō van hiy kimi.

8 Dēmdēm tow van hiy nitiy le non Mayanag talge nongēn, a Nayapyap Yon̄ mavap so, "Tam ige a notog walēg nēk, qele nēk tam lok nēk mahge."✝ So kimi wo tatag galsi nitiy le gōh en, itōk, kimi netnenen. 9 Ba sowo kimi wo mēdēm kal net vitwag, tō mēdēm tēqēl net tegha qeleso napyeyag ēwē en, kimi mal gengenyeg, tō mal van me net behelhel le. Tō nele tēvēvēg kimi aē.

10 Veg ihēte a nitatag vel nele del, tō kē nisisgoy den nele vitwag ēwē en, lengon Ḡod, kē qeleso net a mehel natawye le del. 11 Veg Ḡod mavap so, "Nitog mitimtiy tēy net tegha."✝ Tō Ḡod vitwag woy nen mavap se so, "Nitog wuwuh mat net."✝ Kimi wo et mitimtiy tēy te net tegha, ba kimi wuwuh mat net en, tō kimi tavan me ige bakak hethet le.

12 Atmi hohole wa mugumgu qele net mey nēglal so Ḡod tēvēvēg kē mi nele mey niak so kē totog m̄ōleg vēh.✝ Nele nan, Ḡod tēdēmveteg nēmgōn net mey a kē nidēmveteg nēmgōn net tegha. 13 Ba etgoy, veg sowo net vitwag et magaysēn te net tegha en, Ḡod tit magaysēn vēhte kē, ba tēvēvēg nowmat kē. !Namgaysēn talalaket goy nēvēvēg!

14 Yēhē yathithik wa yatētētek, dēm tow van net vitwag wo nivap so kē nēdēmtig Kraēs ba tateh mugumgu mey nēwē mi kē. ?Nēwē nan qeleave? ?Nēdēmtig nan tavaēh vēh kē? Tateh. 15 Dēm tow van hiy ige yathithi wa yatētēte mey tateh nonoy leleh wa tateh gay gengen. 16 So vitwag den kimi wo nivap van hiy kēy so, "M̄ōl mi natm̄at, tō Ḡod nivawē kimi. Nok tatay so Ḡod teheygoy sewsew galsi kimi, tō ven̄en galsi kimi." ?Ba so kē wo et biyin̄ te kēy mi neleleh vitwag beheyheygoy kēy, si so begengen en, nēwē nan qeleave? 17 Tō qeleanen, so nēdēmtig non net wo et van tiwag te mi namgumgu en, tō nēdēmtig nan namat.

18 Ba yatkel et tavap vēh so, "Net vitwag, kē net bēdēmtig, wa net vitwag, kē net bemgumgu mey nēwē. Tō kōyō haytēyēh ēwē." ?Wo hēywē? !Tateh! Vasem tow me hiy no, qeleave tō nēk nēdēmtig Ḡod ba nēk et ak te namgumgu mey nēwē. Bastō nok vasem van hiy nēk nēdēmtig mino heylō lemgumgu a nok ak tō agōh. 19 ?Nēk nēdēmtig so Ḡod vitwag woy?✝ !Itōk a itōk! Ba ige vu het en, kēy nēdēmtig se qeleanen, ba kēy hiyey aē.

20 Nēdēmtig a tateh mugumgu aē en, kē yeghuquy ēwē. ?Ey, qēt maymay, nēk nemyōs so nok vasemlō so nohohole nan hēywē? 21 Atmi dēm tow van hiy Abraham, a nōbōbō nongēn tam̄ag. Ḡod met lolwē kē so kē netnenen veg kē melep ēntēn a Isak, tō mōm̄ōk kē hag letno olol, tō so niolol van hiy Ḡod aē.✝ 22 Kimi tet vēglal vēh so namgumgu nonon muqul tiwag mi nēdēmtig nonon, tō namgumgu nan mak qēt galsi nēdēmtig nonon. 23 Tō nage gōh maktig Nayapyap Yon̄, a mavap so, "Abraham mēdēmtig, tō Ḡod met lolwē kē so kē netnenen lengon."✝ Tō Ḡod mōl kē so ēplōn. 24 Gēn tet vēglal vēh so gēn nuqultiwag galsi mi Ḡod bemgumgu, ba et bēdēmtig ēwē te.

25 Tō qelese veg Rehab, a nalqōvēn telemtehal.* Mahē yoge Juw mavan so etet belbel lelo vōnō nonon en, Rehab matatagoy galsi kōyō. Tō kē mēvētleg m̄ōl kōyō lemtehal mey a nivan vēyvēy den ige tavale nōyō. Veg bege gōh en, kē mavan me net tenenen lengon Ḡod.

26 Tō nataqn̄ige m̄ey a natalan tateh en, ikē namat. Wa nēdēmtig mey a namgumgu nan tateh en, ikē se namat.