1 !Yēhē, kimi ige m̄eye haphap, itōk so kimi ten̄ten̄ ōlōl veg bemtewot liwo aso niqal kimi en! 2 Qeleso nam̄ye haphap nonmi mal saq, tō namalsam nonmi mal mahayhay qēt, wa 3 nēsēm* nonmi nangon mal hay, veg Ḡod tet nam̄ye haphap nan, tō kē tivipdeg kimi aē. Kē tusuwyeg kimi mahē a nep tegengen nataybemi aē. Sisqet babah ne qōn̄ ba kimi vēlvēlsey leptō nam̄ye haphap nonmi.

4 !Et van hiy! Ige yowyowveg mey a mōmōgteg tō naplih lelo teqe nonmi en, kimi mētēygoy wa mōlōn̄veg nayseyse nonoy mi nagalgal. Naln̄e ten̄ten̄ nonoy mal dēn̄ nēdēln̄an Ḡod a nitiyman. Wa tō nēsēm beyseyse nan en, nēsēm nan titil kimi lengon Ḡod. 5 Lemyam gōh, nēh nonmi mōyheg galsi mi nam̄ye haphap, tō kimi madam vēlēs namyōs nonmi. Nalo taqami misis bōybōy bahaphap telemyam qeleso net nipn̄en bōybōy nōbōlōk begengen liwo. Ba nōqōn̄ bamatmat nonmi mal nognog. 6 Kimi muwuh mat net tenenen. Kē et vēyle te tiwag mi kimi ba kimi mēvēvēg kē.

7 Yēhē yathithik wa yatētētek, veg bege gōh itōk so kimi dēmdēm hoyo gaydēn̄ a Welan nivan lok me. Atmi dēm tow van bemgumgu ne tēqē. Net nan tenyē so nēvētan nilep van negengen mey nēwē. Kē tenyē van so nasm̄al nism̄al, so nak nōswō tētēnge nan nimtow. Tō kē tenyē hoyo mi namhuy gaydēn̄ nēwetētēnge nioh galsi nēwan. 8 Tō qeleanen, atmi dēm hoyo, wa vahiy maymay nalo taqami, veg navanvan non Welan mal sisqet me. 9 Bastō, yathithik wa yatētētek, nitog hohole kēlami veg Ḡod tiple vēvēg kimi aē. Kē mal van sisqet me. !Atmi et tow, kē tig tō yow lemte ēm̄ en!

10 Yathithik wa yatētētek, dēm tow van namakaliw non ige lēgēlgēg a mohole lō lahan Welan. Kēy moyon̄yon̄ memeh, ba kēy mēdēmdēm hoyo. 11 Hēywē, ige lēgēlgēg mey a mitig maymay tō en, gēn vavap so navawē aē mi kēy. Kimi mal yon̄teg vatag veg Job, a kē mitig maymay loyon̄yon̄ memeh nonon, wa moyowōlsēn yow en, gēn met nahap a Welan mak van hiy kē. Veg Welan en, natamtam wa naln̄e magaysēn liwo aē mi kē.

12 Nitiy wē yeh so nitog vatvat lahan Ḡod talge. Wa nitog so quluqtag se hag nohohole so ak dēw nohohole nonmi. So kimi vap so "itōk," ba ak. So kimi wo vap so "tateh," ba nitog akak van, veg Ḡod tiple vēvēg kimi bagalgal nonmi.

13 ?Tō qeleave batatay? Sowo nahap het maqal net vitwag en, itōk so kē nitatay. So vitwag den kimi wo nemlaklak, itōk so kē nisese neh bōliwo Ḡod. 14 So vitwag den kimi wo nogom, itōk so kē niōlōl me ige lililwo ne ēm̄ yon̄, tō kēy tatay goy kē, wa sayap nisim yon̄ lataqn̄ēn lahan Welan. 15 Tō natatay mi dēmtig tavaēh vēh net gom, wa Welan telep hatig lok kē. Sowo kē megengenyeg en, tō Welan tēdēmveteg nēmgōn. 16 Veg bege gōh en, atmi vasemlō nimgumi van hiy kimi, wa tatay biyin̄ lokse kimi, tō so Ḡod tavaēh kimi den nogom.

Naman liwo aē mi natatay non net tenenen. 17 Elijah en, ikē net ēwē qele igēn. Tō kē matatay maymay so nasm̄al nitog sam̄asm̄al, tō nasm̄al et sam̄al te namyam bēte vētēl nagaytegi.✝ 18 Tō me atgiy, kē matatay lokse, tō nasm̄al nisisgoy lokse me, tō negengen lētqē niak qēt nēway.✝

19 Yēhē yathithik wa yatētētek, yon̄teg me. So vitwag den kimi wo mavan yak den nēhēyhēywē, tō net vitwag nitig helem̄ag lok kē me, 20 kē net mey a niwulyis net gengenyeg den namtehal het en, kē nivaēh kē den namatmat. Wa kē niak namtehal so negengenyeg nonon mey a nam̄adeg, Ḡod nidēmveteg.