1 Den Pita, nahal non Tigsas Kraēs.

Hiy kimi en, ige a Ḡod metyak tō, ige a qeleso nahalvan vel vōnō, a lepnō Pontus, Ḡalasia, Kapadosia, Esia wa Bithinia. 2 Ḡod Imam mal vonyak vatag tō kimi am̄ag a lemyōs nonon mahgen. Tō kē niak yon̄ kimi mi Nuvu, tō so kimi yon̄teg Tigsas Kraēs, wa naday nonon nioh wenwen kimi.

Nasgōp nitog tiwag mi kimi wa natm̄at niōyheg kimi.

3 !Ōl liwo Ḡod, Imam non Welan nongēn Tigsas Kraēs! Kē mak tō gēn mowot lokse veg bemgaysēn liwo nonon. Ḡod melep me nēh gayaq nan hiy gēn heylō nage a kē mak hiy Tigsas Kraēs en, a Tigsas mēh lok den namatmat. Bastō gēn nēglal galsi so gēn telep navawē non Ḡod, tō nitiy dēmdēm nan niak maymay gēn. 4 Veg gēn mowot lokse en, gēn dēmdēyē vel haphap mey nēwē a Ḡod mak tēymat tō how hiy gēn a ige yantēntēn. Nahaphap gōh tit saq vēhte, tit het vēhte, wa nangoy tit hay vēhte. Veg Ḡod netgoy galsi nahaphap nan hag lōtōk en hiy kimi. 5 Tō Ḡod nietetgoy kimi mi naman nonon, heylō nēdēmtig nonmi, gaydēn̄ a kē tavasemlō nahaphap ēwē nonmi mahē kē nivaēh kimi a babah ne qōn̄.

6 Veg bege gōh kimi malaklak. Ba kimi wun lolwon ēwē natkelgi veg nememeh tegtegha mal van me hiy kimi. 7 Ḡod mukēg me nememeh nan so nihlet etgal nēdēmtig nonmi, tō so vasemlō so nēdēmtig nonmi en hēyhēywē. Nēdēmtig nonmi en qeleso nōḡōl*. Net nim̄ōk nōḡōl lep tō so hilhil etgal so kē itōktōk lēs. Nōḡōl tohol qelen̄ vēh, ba nēdēmtig nonmi itōk veteg nōḡōl. Ḡod mehlet etgal nēdēmtig nonmi tō so nēdēmtig nonmi toyowōlsēn yow so kimi telep nōliwo, nēlēn̄as wa nēdēmap lōqōn̄ a Ḡod tavasemlō me Tigsas Kraēs.

8 Kimi et etsas qete Tigsas, ba kimi natam kē, wa kimi et etsas te kē qiyig agōh, ba kimi nēdēmtig kē. Tō kimi nōyheg mi namlaklak liwo wa mi nam̄sēksēk a tit hole gatay qēt vēhte. 9 Kimi nemlaklak veg kimi mal tēy nayseyse bēdēmtig nonmi en. Nayseyse nan en Ḡod mal vaēh kimi.

10,11 Am̄ag ige lēgēlgēg melgēg veg nasgōp a Ḡod melep van hiy kimi qiyig gōh. Heylō kēy en, Nuvu non Kraēs mohole so Kraēs toyon̄ memeh, tō atgiy, kē telep nēlēn̄as. Ige lēgēlgēg mosok lōlhiy so Nuvu mohole gatay ihē, si so lahan qōn̄. 12 Nahal gōh en, ige in̄sel nemyōs so ēglal temuy se. Ba Ḡod maklō van hiy ige lēgēlgēg, kēy et mugumgu te veg kēy mahgey, ba kēy mugumgu veg kimi. !Tō nahal gōh mal dēn̄ kimi! Ige botoytoy noyoy ēwē mavasemlō nahal nan hiy kimi mi namaymay non Nuvu Yon̄ a Ḡod mēvētleg me den lōtōk.

13 Sōwlē, atmi tēytēymat nēdēmdēm nonmi bemgumgu. Dēm m̄ōleg galsi, tō dēmdēyē vaga van hiy nasgōp mey Ḡod telep van hiy kimi mahē kē tavasemlō Tigsas Kraēs. 14 Qele a nēnētm̄ey notog leln̄e yon̄teg non imam nonon, atmi yon̄teg Ḡod. Ba namyōs het nonmi mey a kimi madamdam tō am̄ag mey a kimi et ēglal te Ḡod en, atmi nitog damdam tatag van. 15 Mey a mōlōl kimi en, kē noyon̄, tō kimi mas van me yon̄ qele ikē a lemtevumi del. 16 Veg Layapyap Yon̄ en, Ḡod wo, "Kimi so yon̄, veg ino noyon̄."✝

17 Mahē kimi ōlōl hiy Ḡod so kē ‘Imam,’ dēmsas so kē tēvēvēg velvel et tatag van lemgumgu nonoy. Tō itōk so kimi dēmap galsi kē mi namtevumi mey newenwen lēh del nonmi a kimi togtō qele ige halvan lemyam agōh. 18 Dēm lok so Ḡod meplet yak kimi den nēvēnami mey nehet tam̄ag, a yeghuquy ēwē. Kē et velet te kimi mi nage a tasaq vēh qele nōḡōl si nēsēlva*. 19 Ba kē meplet yak kimi mi naday non Kraēs, a nitiy ketket yeh, qele ninti sipsip mey a newenwen a newenwen, a kēy olol aē. 20 Ḡod movonyak Kraēs am̄ag den naqtēqtēg ne mayam, tō maklō kē a babah ne qōn̄. Kē maklō kē me bēwē nonmi. 21 Heylō Kraēs en, kimi mal van me ige a nēdēmtig Ḡod. Ḡod gōh a melep kal lok kē den namatmat, tō melep nēlēn̄as hiy kē. Bastō kimi dēmdēyē Ḡod, wa dēmtig kē.

22 Togtōkē en, kimi mal ak wenwen natqami veg a kimi motog tō leln̄e yon̄teg ne hohole nēhēyhēywē. Mak tō nitiy tamtam aē mi kimi so tam yathithimi wa yatētētami. Sōwlē, atmi vey tamtam kimi mi nitiy tamtam van lelo taqami del.

23 Itōk so kimi vey tamtam kimi veg kimi mal wot lokse. Tō nowotwot lokse et van te me den lōtōti haphap mey a tasaq, ba mavan me den lōtōti haphap a tit saq vēhte. Kimi mowot lokse heylō nohohole non Ḡod, nohohole nan a nēh vaga wa nitog lap mi kimi. 24 Veg Nayapyap Yon̄ mavap wo,

"Net del qeleso naplih

Wa nēlēn̄as nonoy qele natawhi vilih,

ba naplih nan temyen̄,

tō natawhēy tisisisgoy,

25 ba nohohole non Welan Ḡod notogtog lap vaga."✝

Tō nohohole gōh en, noyoy ēwē a kēy mal vasemlō vatag tō van hiy kimi.