1 Bastō, veg Kraēs moyon̄ memeh tō lataqn̄ēn en, tō atmi tēymat nēdēmdēm nonmi tō so yon̄ memeh qeleso ikē. Veg ihēte wo moyon̄ memeh latayben en, kē et gengenyeg site. 2 Mahē natayben nēh leptō, tō kē et tatag site namyōs het netaybege, ba kē nitatag namyōs non Ḡod vēlēs.

3 Kimi mal tog haytēyēh van lamahē nen, a kimi magagaleg tō nahaphap a ige lolqōn̄ nemyōs akak. Namyōs nonoy so legleg soloteg, namyōs het, inin memeh, vētvētqul binin, akak nahaphap mey nehet, wa mogmogo goy ige ḡod galgal a Ḡod nōlgontegoy.

4 Tō ige lolqōn̄ tohohole hethet hiy kimi aē, veg kēy mamakē aē so kimi et van tiwag site mi kēy bēvētvētqul begengenyeg. 5 Ba kēy tavasemlō galsi van hiy Kraēs bahaphap a kēy makak tō. Veg kē mal tēymat so vēvēg ige del, ige mey a nēh tiwag mi ige mey a mal mat vatag.

6 Veg bege gōh ige mey mal mat vatag moyon̄teg tō noyoy ēwē. Veg am̄ag, nataqn̄ey en, kēy mal lep nivipdeg bamatmat qele net. Ba natalay en, kēy tēh qele Ḡod.

7 Sōwlē, nōlsi haphap del mal nognog, atmi dēm m̄ōleg wa tēytēymat tō kimi tatatay galsi vēh. 8 Tō nitiy dēmdēm nan en, atmi togtog ba vēy tamtam kimi mi nitiy tamtam, veg natamtam tubun veteg negengenyeg m̄adeg. 9 Natamtam nan en, leplep vasgēt net me lēm̄ nonmi, ba nitog n̄en̄e aē. 10 Ḡod mohog van natapēva tegtegha ne Vu Yon̄ van hiy kimi tō so kimi vēy biyin̄ kimi. Itōk so kimi men̄ēs goy so mugumgu tēy nasgōp non Ḡod. 11 Net a nitoytoy en, itōk so kē nitoytoy lohohole non Ḡod. Net a nimyimyin̄ en, itōk so kē nimyin̄ mi namaymay a Ḡod melep van hiy kē. Atmi vēy biyin̄ kimi tō so lep ketket nahan Ḡod mi nage del, heylō Tigsas Kraēs. !Nēlēn̄as wa namaymay nivan lap van hiy kē vaga! Qeleanen.

12 Yēhē bulbulsal, nitog mamakē bevel memeh a mesew kimi qele nep, so nihil etgal kimi. Et nage bamamakē te. 13 Ba kimi so malaklak, veg kimi nuqultiwag mi Kraēs van a lememeh nonon, tō kimi tōyheg mi namlaklak wa mi nam̄sēksēk lōqōn̄ a Ḡod nivasemlō nēlēn̄as non Kraēs.

14 Sowo ige hohole hethet hiy kimi bōtōtē han Kraēs, ba namlaklak hiy kimi, veg Nuvu nelēn̄as non Ḡod notog apwomi.

15 Nehet so vitwag den kimi niyon̄ memeh veg kē net buwuwuh mat et, si net batan̄tan̄hephep, si net behelhel nele, si net belem̄ag. 16 Ba so vitwag den kimi wo moyon̄ memeh veg kē Nēkrēstēn, kē nitog mamayge aē. Ba ōlwē Ḡod aē veg nahan Kraēs van mi kē en.

17 Veg nōqōn̄ mēwēs ēgēn, tō Ḡod so nivēvēg nisil del. Tō kē niqtēg vēvēg ige nonon am̄ag. ?Ba sowo kē wo meqtēg vēvēg gēn am̄ag, ba qeleave veg ige mey a et kokm̄egoy te noyoy ēwē non Ḡod?

18 Nayapyap Yon̄ mavap so,

?Sowo et towoyig te so vaēh ige mey netnenen,

ba ige het wa ige gengenyeg en, kēy tavan lō ave?✝

19 Sōwlē, kimi mey a Ḡod mukēg kimi tō moyon̄memeh en, tiy wē yeh so kimi dēmtig im̄ey a nesey so dēmtig kē, tō m̄ōk natalami van hiy im̄ey a mitin̄ tō kimi, tō vasemlō nēdēmtig nan mi namgumgu togolgol.