1 Ey, ige lōqōvēn leg, itōk so kimi yon̄teg galsi ige tam̄an nonmi. Kimi tewseg ēwē kēy me hiy Ḡod en heylō lēmētwumi mey nēwē. Qeleso kēy wo et yon̄teg te nohohole non Ḡod en, ba kēy tēdēmtig vēh 2 mahē a kēy et nēmētwumi wa nēdēmap nonmi, ba et heylō te lohohole nonmi.

3 Atmi valakas galsi kimi mi nahaphap mey nēwē nelelo taqn̄ige ba et mi nahaphap taslil netaybege te. Nitog dēmdēm van hiy neleleh a neplakas qeleso nōḡōl, si viy nilimi, si so hey neleleh a neplakas galsi. 4 Ba nitiy wē yeh so atmi valakas nalo taqn̄imi mi natm̄at, wa mi namhuy, mey a tit hay qelen̄ vēhte. Lengon Ḡod, nalqōvēn qelegōh itōktōk a itōktōk lēs.

5 Veg bemtehal gōh, ige lōqōvēn yon̄ tam̄ag mey a mēdēmdēyē Ḡod en, kēy meplakas tō kēy qeleanen. Kēy moyon̄teg galsi tō ige tam̄an nonoy 6 qeleso Sera, a kē moyon̄teg galsi tō Abraham. Tō kē mōlōl kē a so "Welan mino." Tō kimi wo tit mētēgteg vēhte, ba mak nahaphap mey nēwē, tō kimi gōh ige yantēntēn Sera.

7 Qelese gōh, ige tam̄an leg atmi tog muhuy tiwag mi ige lōqōvēn nonmi, veg kēy nem̄geygey den kimi, a kēy temtēgteg nahaphap a kimi ak maymay hiy kēy. Tō dēmap kēy veg kimi haytēyēh van lengon Ḡod. Nasgōp del ne ēh a kē melep van hiy kimi en, kē melep se van hiy ige lōqōvēn. Sōwō, atmi kokm̄egoy galsi kēy tō so natatay nonmi tit van yeghuquy vēhte.

8 Babah ne hohole mino hiy kimi del qelegēn, tog tēy nuvu del ne qultiwag. Atmi vey magamgaysēn kimi, vey tamtam kimi, vey biyimyin̄ kimi, wa dēm bēbēw kimi. 9 Nitog yamyam lok nehet van hiy nehet si so yamyam lok nohohole het mi nohohole het. Ba yam lok nehet mi navawē. Veg bege nan en Ḡod mal ōlōl vatag kimi, tō kimi tētēy navawē aē.

10 Veg Nayapyap Yon̄ mavap so,

"Ihēte a nimyōs nēh a itōktōk lēs,

wa nietet namlaklak ne qōn̄ mey nēwē en,

kē tagatgoy nagayman den nohohole hethet,

wa nan̄yan den nagalgal.

11 Kē niwulyis den nahaphap mey nehet,

wa niak nahaphap mey netgolgol.

Kē nisok natm̄at,

wa nitatag namtehal netam̄at.

12 Veg namtan Welan hiy ige a kēy netnenen,

wa nēdēln̄an nitin̄qoy hiy natatay nonoy,

ba kē matyak nangon den ige mey a kēy gagaleg nahaphap mey nehet."✝

13 ?Kimi wo matatag navaksami so ak nahaphap mey netgolgol, tō ihē tak memeh kimi aē? 14 Ba sowo ige et mak memeh kimi veg kimi mak namgumgu mey netnenen en, Ḡod tavawē kimi aē. Nitog mētēgteg nahaphap het mey a ige sil telemyam nemtēgteg, wa tō nitog mētēgteg se kēy.✝ 15 Ba atmi lep kal Kraēs mahgen nivan me Welan nonmi lelo taqami. Tō vaga kimi tēymat so vulu goy ihēte nivēhge kimi wo, "?Wō kimi dēmdēyē Ḡod bahap ōk?" 16 Ba hohole m̄ōleg mi namhuy wa mi nēdēmap, wa etgoy so tateh hap niak mamayge kimi lengon Ḡod. Yatkel et mohohole hethet bemgumgu togolgol a kimi mak hiy Kraēs. Ba kimi en, atmi vulu goy ige sil del mi nēdēmap tō so ige a hohole het en, kēy tamamayge aē.

17 Veg so Ḡod wo mukēg kimi so yon̄ memeh, tiy wē yeh so kimi yon̄ memeh tōtēn namgumgu togolgol den namgumgu mey nehet.

18 Veg Kraēs en, kē net tenenen ba kē moyon̄ memeh veg ige gengenyeg. Kē mamat vag tiwag ēwē bōtōti bug nagan ige sil. Kē mamat tō so nilep vasgēt kimi van hiy Ḡod. Nataqn̄ēn Kraēs en, ige mivipdeg kē so nimat, ba natalan Kraēs, Ḡod mak ēh lokse. 19 Tō kē mavatēp natalan* ige mey a notog lēm̄ yētyēt amnō, tō nitoytoy van hiy kēy. 20 Natalan ige a kēy et mōyōs te so yon̄teg Ḡod lōqōn̄ non Noah. Lōqōn̄ nan Ḡod menyē malkōh so Noah niwos babah nabaklap. Nabaklap nan en, Ḡod mavaēh tō net vēvēh qiyig ēwē aē. Kēy bul levetēl a kē mavaēh kēy heylō den nēbē. 21 Tō nēbē gōh, ikē nēvēglal nevasugyon̄ mey a nivavaēh kimi togtōakē. Ba navasugyon̄ gōh et dēmdēm nan te so oh yak nelem den nataqn̄ēmi, tateh. Ba navasugyon̄ nan en, kē navatvat mey a so niak taywah namtehal nonmi hiy Ḡod veg Tigsas Kraēs mal hatig lok den namatmat. 22 Tigsas gōh, kē mavan hag lōtōk en, tō kē mahag basay naqaqayan Ḡod a lemtō nonon. Tō kē milwo goy ige in̄sel wa ige mayanag ne vu het del.