1 Yēhē, veg kimi mal wot lokse en, atmi ukēg veteg nēmētwumi del mey nehet; nitog galgal, nitog vēyvēyle, nitog qeneqneg, wa nitog vavap hethet hiy net tegha. 2 Qeleso ige nēnētm̄ey susu a kēy maygay hiy nisis tō so kēy so liwo, atmi maygay se hiy negengen non Ḡod, a so niak maymay nēdēmtig, tō so kimi tilwo haytēyēh van lamakaliw non ige mey a Ḡod mavaēh tō. 3 !Veg kimi mal helet etgal van so Welan itōk!✝

4 Welan ikē nevet* a nēh, a ige et mal visipteg, ba Ḡod mal vonyak vatag. Tō nevet nan nitiy wē hiy kē. Kimi vanvan hiy Welan en, 5 tō kimi se qeleso nevet a nēh, nevet mey a kēy woswos ēm̄ aē. Tō Ḡod nim̄ōk ketket nēm̄ van aē. Tō kimi van me qele nēm̄ mey a Nuvu Yon̄ notogtog alon. Ḡod mak tō so kimi van me ige pris nonon, so lep van nolol hiy kē. Tō nolol nonmi en, ikē Buvu, ikē namgumgu a netgolgol lengon heylō Tigsas Kraēs.

6 Veg Nayapyap Yon̄ nivap so,

"!Atmi et tow van! Nok gilgeg nevet a Saeon,

nok gilgeg nahan̄ vet nan a no mal etyak, a nitiy wē yeh,

Tō net mey a nēdēmtig kē en,

kē tit mamayge vēhte."✝

7 Nevet nan nitiy wē yeh hiy kimi a nēdēmtig. Ba kēy a et dēmtig te en, kē et buste kē qele Nayapyap Yon̄ mavap so,

Nahan̄ vet mey a ige bētēytēy ēm̄ mepsipteg tō en, kē may van me nam̄e han̄.✝

8 Wa tō,

Nevet gōh en, nisil tititeg vēh mi kē, wa tō nevet nan tak sisgoy kēy.✝

Kēy tititeg veg kēy et yon̄teg te nahal, ba Ḡod mal m̄ōk vatag namtehal nan van hiy kēy.

9 Ba veg kimi en, Ḡod mal vonyak vatag kimi so van me ige nonon. Tō kimi ige viwti pris nonon Mayanag. Kimi niviwti et a noyon̄. Kimi ige yon̄ non Ḡod a kē mal vēl yakyak kimi so ige nonon. Ḡod movonyak kimi qelegōh so kimi so vasemlō vel mugumgu nonon mey nēwē a kē mak tō, ikē mey a mal lepyak kimi den namlēglēg, tō mal lep kimi me lemyeyen liwo nonon. 10 Am̄ag en kimi niviwti tegtegha, ba togtōkē kimi mal van me nitiy et non Ḡod.✝ Am̄ag, tateh len̄emagaysēn non Ḡod van hiy kimi, ba togtōkē Ḡod nemgaysēn kimi.✝

11 Yēhē bulsal, kimi nahalvan ēwē a tog tō lemyam agōh, veg kimi en telemyeyen talge. Tō namyōs het ne taqn̄imi mey a nivagapgal tiwag mi natalami, nitog damdam van. 12 Ak tenenen galsi nēmētwumi van lengon ige lolqōn̄. Togtōkē kēy tohole hethet hiy kimi bemgumgu tōgōlgōl nonmi. Ba kēy telep kal nahan Ḡod aē babah ne qōn̄.

13 Veg kimi ige nonon Welan en, kimi so yon̄teg wa dēmap ige lililwo nonmi. Atmi dēmap mayanag a kē nitiy liwo yeh lakapman. 14 Wa tō kimi so yon̄teg ige mayanag a kē mēvētleg kēy van lepnō vivitwag so nivēvēg ige a helhel nele, wa tō ōlwē ige tenenen. 15 Ḡod nemyōs so kimi galeg namgumgu mey nēwē, tō so namgumgu nan nitabeg nan̄yan ige qōy mey a kēy lēlēlhiy kimi. 16 Itōk so kimi tog haytēyēh van lamakaliw non ige a notog m̄ōleg. Ba Ḡod et ukēg taywah te kimi tō so kimi dam namakaliw a nehet, tateh. Atmi tog qele ige et mugumgu non Ḡod. 17 Atmi dēmap ige del, tam ige et non Kraēs, mētēgteg Ḡod, wa dēmap mayanag nonmi.

18 Yēhē, ige slev, yon̄teg galsi ige welan nonmi wa dēmap galsi kēy. Nitog dēdēmap vēlēs ige welan a kēy net lolwē kimi wa nēwē mi kimi, ba dēmap se ige welan mey a nehet. 19 Ḡod tavawē kimi mahē a ige wo mak memeh kimi yeghuquy, tō kimi nitig netnet veg kimi nēdēmap Ḡod. 20 ?Ba kēy wo mēvēvēg kimi veg kimi megengenyeg en, kimi dēm van so kimi telep nayseyse aē veg kimi nitig netnet? Tateh. Ba kimi wo mak nahaphap mey netnenen, tō kēy wo mēvēvēg kimi aē en, Ḡod tavawē kimi.

21 Ḡod mal ōlōl kimi so dam tatag nabalban Tigsas. Tō Tigsas moyon̄ memeh tōtēn kimi. Ikē namakaliw hiy kimi, qeleso kē moyon̄ memeh en, tō kimi se so yon̄ memeh.

22 Nayapyap Yon̄ nihohole gatay kē so,

Kē et gengenyeg hōn te,

wa tō tateh galgal geh nikalō me den naplan.

23 Mahē a ige sil hohole hethet van hiy kē en, kē et lep lok te so nihole hethet van hiy kēy. Mahē kē moyon̄ memeh en, kē et vap te so nilep lok naday nonon. Ba kē mamatēg vēlēs van hiy Ḡod, a kē tēvēvēg ige del lemtehal tenenen. 24 Heylō lataqn̄ēn, kē m̄eywu negengenyeg del nongēn apwo wolwol tō so gēn bah den negengenyeg, wa ēh tō so tog tenenen van hiy kē. Veg kimi mēwē heylō lemtewot nonon. Kimi so bah qēt den negengenyeg, tō so tog tenenen ēwē.

25 Veg am̄ag kimi qeleso nisipsip a meqlen̄ tō, ba togtōkē kimi mal van lok me hiy Kraēs. Ikē nitiy et betet goy sipsip, tō kē tetgoy galsi kimi.