1 Bastō, kamtēl moyon̄teg nehet mahē noyon̄ memeh liwo maqal kimi en. Tō kamtēl mēdēmdēm so itōk so Timoti nivan vatēp kimi, ba kamyō hag lap Atens. 2 Timoti en, kē ithi mamyō, wa iplumem, wa noyowyowveg non Ḡod bavavasemlō noyoy ēwē veg Kraēs. Tō kē tak maymay kimi, tō tavahiy maymay kimi lēdēmtig nonmi, 3 tō so tateh et nihiyey.

Tō kimi nēglal vatag so Yatmangēn movonyak tō nage geh gōh hiy gēn. 4 Veg mahē kemem motog tiwag tō mi kimi en, vaga kemem vap vētday van hiy kimi so gēn tavan qalgoy nememeh liwo. Qele a kimi nēglal en, tō maktig hōw qele a kemem mavap tō en.

5 Veg bege gōh, no tit ak se vēhte nahap, veg nok dēmdēm vēlēs hiy kimi. Tō no mēvētleg kē how tō so kē so nēglal galsi nēdēmtig nonmi. Veg nok mētēgteg so Nuvu Bem̄eygal tiple m̄eygal kimi, tō ak namgumgu nonmem nivan yeghuquy ēwē.

6 Ba Timoti mal dēn̄ lok me den kimi ēgēn, tō mavan tēy me noyoy ēwē veg bēdēmtig wa batamtam nonmi. Kē mavap me so kimi nēdēmdēm leptō hiy kamtēl, tō kimi dēmdēm so et lokse kamtēl, qeleaso kamtēl maygay so et lokse kimi. 7 Yēhē bulsal, mahē kamtēl moyon̄ memeh tō veg kēy mepsipteg tō kamtēl en, kamtēl motog tēy lap namhuy veg kimi, wa veg bēdēmtig nonmi. 8 Kamtēl tog tēy leptō nēh veg kimi a mitig maymay tō hiy Welan.

9 ?Tō gēn so vēwē Ḡod qeleave veg kimi? Veg tateh hap mey nesey so lep van hiy kē bēvēwē kē aē. Ba kamtēl nemlaklak a nemlaklak a nēkēkēn, lengon Ḡod nongēn veg kimi. 10 Vel anqōn̄ wa vel meyen kamtēl tatay maymay so et lok nangomi tō so kamtēl so lep kal lok nēdēmtig nonmi.

11 Tō kamtēl tatay so Ḡod Namam nongēn tiwag mi welan nongēn Tigsas niwuyveg namtehal nonmamtēl hiy kimi. 12 Tō kamtēl tatay so Welan niak so natamtam niōyheg kimi, tō niōy lōlōwyeg tō so kimi vey tamtam lokse kimi, wa ige del, qeleaso kamtēl natam kimi. 13 Wa kamtēl tatay so natamtam nan so niak maymay kimi, tō kimi tewenwen wa toyon̄ van lengon Ḡod Imam mahē Welan nongēn Tigsas nivan lok me tiwag mi ige yon̄ del nonon.