1 Den Pol, tiwag mi Silas* wa Timoti.

Hiy nēm̄ yon̄ non ige Tetesalonika, ige mey a ige nonon Ḡod Imam, wa Welan Tigsas Kraēs.

Nasgōp wa natm̄at nitogtog mi kimi.*

2 Vaga kamtēl vēwē Ḡod veg kimi, wa vaga kamtēl dēmsas kimi bevel tatay nonmamtēl. 3 Tō kamtēl dēmsas nēmētwumi lengon Ḡod Imam nongēn, vel mugumgu togolgol del a nivan me den nēdēmtig wa natamtam nonmi. Wa kamtēl dēmsas so kimi nitig maymay veg kimi nēdēmdēyē hiy Welan nongēn Tigsas Kraēs.

4 Yēhē yathithimamtēl, Ḡod natam kimi. Tō kamtēl nēglal so Ḡod movonyak tō kimi so van me ige nonon. 5 Veg noyoy ēwē a kamtēl mavasem van hiy kimi, et van te me mi nohohole vēlēs, ba nivan me mi naman ne Vu Yon̄ se. Tō kimi met vēglal so kamtēl nēdēmtig maymay noyoy nan, veg bēmētwumamtēl a kamtēl mak tō nēwē van hiy kimi mahē kamtēl motog tiwag tō mi kimi.

6 Tō kimi madam tatag tō namakaliw nonmamtēl wa non Welan. Kimi moyon̄teg tō nememeh a ige sil mepsipteg tō kimi, ba kimi melep vasgēt me noyoy ēwē mi namlaklak ne Vu Yon̄. 7 Bastō kimi mal van me qeleso namakaliw non ige del a nēdēmtig Kraēs yow Masedonia en wa Akaia.

8 Ba et vēlēs te Masedonia wa Akaia. Nohohole non Welan makalō den kimi, tō noyoy nan maga vel mahē del. Bastō kamtēl tit vasemlō se vēhte veg ige del mal ēglal qēt so kimi nēdēmtig Ḡod.

9 Veg kēy mahgey mavasemlō me hiy kamtēl so kimi melep vasgēt tō kamtēl me qeleave. Tō kēy mavaplō me so kimi mitigkēlē den ige ḡod galgal tō mavan hiy Ḡod, so mugumgu hiy kē, nitiy Ḡod mey a kē nēh. 10 Wa tō kimi tenyē Ēntēn so nivan lok me den lōtōk alge. Ikē Tigsas, a Ḡod mak ēh lok tō kē den namatmat, tō kē tavaēh gēn den nēvēvēg liwo a tavan me.