1 Yēhē yathithimamtēl wa yatētētamamtēl, kamtēl mavatēp kimi et yeghuquy te. 2 Am̄ag a Filipae en, kimi nēglal vatag so ige sil mak memeh wa tō mohole hethet hiy kamtēl. Wa tō yatkel et lelo vōnō nonmi mitig tavale hiy kamtēl. Ba Ḡod mak so nihyi mamtēl namaymay so vasemlō noyoy ēwē nonon van hiy kimi.

3 Veg nututi toytoy nonmamtēl en, et bihihigap te, wa et bemyōs mey nehet te, wa et bagalgal te. Tateh. 4 Ba kamtēl en nahal mey a Ḡod movonyak tō so van tēy noyoy ēwē nonon. Mahē kamtēl toytoy en, kamtēl et ak te so net so nimlaklak, ba kamtēl ak so Ḡod nimlaklak. Veg Ḡod tēvēvēg kamtēl aē bohohole nonon.

5 Veg kamtēl et hole dēmyak te kimi so weseg nēdēmdēm nonmi. Tō kamtēl et galingoy te namyōs ne sēm, qele a kimi nēglal vatag en. Ḡod nēglal nahap a kamtēl mak. 6 Tō kamtēl et soksok te kimi, si so net tegha, so lep kal nahamamtēl.

7 Ba kamtēl mavan me gōh en, namtevumamtēl et maymay te hiy kimi, ba kamtēl qeleso tita vitwag a niak towoyig hiy nētnētm̄ey nonon. Kamtēl tiple ak dew namgumgu hiy kimi veg kamtēl ige hal non Kraēs, kamtēl et buste qelenen. 8 Veg kamtēl natam yeh kimi, tō kamtēl nemlaklak so lep van noyoy ēwē hiy kimi. Ba et noyoy ēwē vēlēs te, ba nēh non mamtēl se, veg kimi mavan me ige bulsal nonmamtēl.

9 Yēhē yathithimem wa ige tētētamem, dēmlok nēmētwumamtēl. Kamtēl et matēg te hiy kimi bēsēm mahē kamtēl motoytoy hiy kimi boyoy ēwē non Ḡod. Ba kamtēl mugumgu* mi navak non mamtēl vel meyen wa vel anqōn̄ tō et dew te mi kimi.

10 Tō kimi tavasemlō vēh, wa Ḡod se, so nēmētwumamtēl noyon̄, wa netnenen, wa newenwen hiy kimi a nēdēmtig Kraēs. Kimi nēglal veg kamtēl motogtog tō tiwag mi kimi. 11 Kimi nēglal galsi a kemem akak hiy kimi del en, qeleaso imam nietetgoy ige nētnētm̄ey nonon. 12 Kamtēl mak hiy kimi qeleso imam vitwag nietetgoy ige yantēntēn, mahē kamtēl mēvēhge, tō mavap maymay, wa mavahiy maymay kimi. Kemem nemyōs so kimi so tog lēh mey a nesey van lengon Ḡod mey a mōlōl tō kimi me lēlēn̄as wa lemyeyen nonon.

13 Tō veg bege gōh kamtēl vēwē Ḡod aē vaga, veg kimi mētēy maymay galsi nohohole non Ḡod a kimi moyon̄teg tō den kemem. Kimi met van so nohohole nan et nohohole non net te. Tateh. Ba kimi met van so nohohole nan nitiy hohole non Ḡod, wa nēhēyhēywē. Tō nohohole nan nimgumgu hay lēh nonmi en, kimi a mēdēmtig tō Kraēs.

14 Yēhē yathithimem wa ige yatētētamem, nohohole nan mak so kimi madam namtehal nonon ige ēm̄ yon̄ non Ḡod n̄a Judea, ige Juw mey a kēy nēdēmtig wa nuqul tiwag mi Kraēs Tigsas.* Veg ige telepnō nonmi mak tō hiy kimi. Tō qele se anen mi ige Juw a nēdēmtig n̄a Judea en, ige telepnō nonoy mak tōqtōqyeg se kēy. 15 Ige Juw gōh en, kēy muwuh tō Welan Tigsas tiwag mi ige et lēgēlgēg non Ḡod. Tō ige Juw nan manahiy tō kemem, kēy ak laptō qeleanen. Kēy mak Ḡod mololgagay kēy, wa tō kēy vēyvēyle tiwag mi ige del. 16 Kēy hihigoy kemem so nitog vavasemlō noyoy van hiy ige lolqōn̄ tō so nitog vavaēh kēy. !Veg bege gōh en, nubug nagay mōy lōlōwyeg, tō Ḡod tēvēvēg nowmat kēy aē!

17 Yēhē yathithimem wa ige tētētamem, veg kēy manahiy kamtēl, entō gōh kamtēl notog yeh den kimi. Ba lelo taqamamtēl en, kemem tiwag mi kimi. Tō namyōs kokoym̄eg nonmamtēl so et lok nangomi, tō kamtēl mehelhel etgal tō so vatēp lokse kimi.

18 Kamtēl me helhel etgal so vatēp lokse kimi, ba Satan mitigoy namtehal nonmem. Hēywē, ino Pol, vag m̄adeg no mehel etgal, ba et aktig te.

19 ?Veg mahē Kraēs nivan lok me en, kē telep me nayseyse hiy kamtēl bahap? !Veg kimi! Kamtēl dēmdēyē nōqōn̄ nan, tō kamtēl nemlaklak aē. Kimi qeleso nakaskas a nēlēn̄as mey a nivasemlō so kamtēl malalaket veg kimi. Kamtēl nawakse veg kimi. 20 !Hēywē, kimi gōh nēlēn̄as ne malaklak nonon mamtēl!