1,2 Yēhē bulbulsal, Tigsas et vap te nōqōn̄ si so nēte a so kē so nivan lok me aē. Ba nōqōn̄ non Welan tavan me qeleso net batan̄tan̄hephep vitwag tak m̄alyow net anqōn̄. Ba kemem et dēmdēm te so vatne lok kimi aē veg kimi nēglal galsi.

3 Tō lōqōn̄ nan en ige sil tavap so, "Nahaphap del itōk, wa tateh hap geh taqal gēn." Ba nivipdeg liwo tak hethet qēt kēy vagtiwag ēwē, qeleaso nalqōvēn niyon̄yon̄ memeh beleplep nētm̄ey. Tō kēy tit van se vēhte ave.

4 Ba kimi et qelenen te. Entō gōh kimi et tog te lemlēglēg, tō et haytēyēh te tō so nōqōn̄ nan niak m̄alyow kimi anqōn̄ qeleaso net batan̄tan̄hephep. 5 Veg namlēglēg et ōyheg te gēn, tō gēn et tog site anqōn̄. Ba kimi nōyheg mi namyeyen wa notog lemyeyen. 6 Bastō yēhē, gēn nitog mitimtiy qeleso ige tegha, ba itōk so gēn matyak ba dēm m̄ōleg van aē.

7 Ige mey a nemtiy en, kēy mitiy a anqōn̄, tō ige mey a inin en, kēy inin anqōn̄. 8 Ba igēn gōh ige telemyeyen, tō gēn so dēm m̄ōleg van so gēn notog tēy namakaliw batamtam netegha.

Ikēy qeleso namalsam ne vēvēhyuw a ige vagapgal heyhey so tigoy kēy den nan̄ye gasel. Tō gēn so heygoy gēn mi natamtam, nēdēmtig, wa mi nēdēmdēyē so Ḡod temgaysēn gēn lēvēpdeg liwo. 9 Veg Ḡod et vonyak te gēn so kē so nivēvēg gēn, tateh. Ba kē movonyak gēn so Welan nongēn Tigsas Kraēs en, kē so nivaēh gēn. 10 Kē mamat so nitamgoy nubug del nagangēn, tō sowo gēn wo nēh si so namat, ba gēn notog tiwag mi kē vaga.

11 Sōwō, hole biyin̄ wa vahiy maymay kimi lokse bēmētwumi a kimi tog tēy tō en.

12 Yēhē bulbulsal, kemem vēhge van hiy kimi so atmi dēmap galsi ige a mugumgu tō tiwag mi kimi en, ige a Welan nongēn metyak tō kēy aso tig helem̄ag kimi wa so vatne kimi lahan Welan. 13 Kimi so dēmap galsi kēy bevel mugumgu del a kēy akak tō en, tō kimi so tam galsi kēy. Wa vaga kimi so qulqul galsi.

14 Yēhē bulbulsal, kemem yap van hiy kimi so kimi hole maymay so ak matyak ige mey a namyen̄. Tō hole biyin̄ van ige mey a kēy et maymay te so tig netnet den nem̄eygal tegtegha, wa atmi biyin̄ galsi ige mey a nem̄geygey. Tō itōk so kimi dēmdēm hoyo bah en qoyo hohole van hiy kēy del.

15 Kimi so ēglal so net nitog leplep lok nehet hiy nehet, kimi so ak nage mey nēwē hiy kimi lokse tiwag mi ige tegha.

16 Lemtehal mey nēwē siso nehet mey kimi mavan heylō tō en, vaga kimi so malaklak, 17 wa vaga kimi so tatay, 18 wa vaga kimi so vēwē Ḡod, veg heylō Kraēs Tigsas en, Ḡod nemyōs so kimi so ak qele anen.

19 Kimi nitog tigtigoy namgumgu namun Nuvu Yon̄. 20 Nitog etet hethet net a so nivasemlō nahal a so Ḡod mavap van hiy kē en. 21 Ba helhel etgal vel hohole del nonon. Tō tēy maymay mey a nēwē, 22 ba van yak den nahal del mey nehet.

23 Tō kemem tatay so Ḡod a notog tēy natm̄at mahgen tak yon̄ qēt kimi. Wa Ḡod tētēygoy kimi latalami, lēdēmdēm nonmi, wa lēh nonmi tō so kimi newenwen gaydēn̄ Welan nongēn Tigsas Kraēs nivan lok me.

24 Im̄ey a mōlōl tō kimi en, kē tokokm̄egoy navatvat nonon hiy kimi vaga, tō kē tagaleg.

25 Yēhē bulbulsal, atmi tatay biyin̄ kemem.

26 Atmi pōpōn ige bulbulsal nongēn del so vasemlō natamtam nonmi hiy kēy.

27 Lahan Welan nongēn, nok vap van hiy kimi so vatah nayapyap gōh van hiy ige bulbulsal nongēn del.

28 Natm̄at non Welan nongēn Tigsas Kraēs nitog tiwag mi kimi.