1 Pol vap van hiy ige sil so, "Ige imam, tiwag mi ige yathithik. !Atmi yon̄teg me nam̄e dēmdēm mino!" 2 Vētmahē a ige Juw moyon̄teg van a kē nihohole mi nagatgat nonoy e tō kēy taq yoyon̄ galsi ēgēn.

3 Tō Pol wo, "Ino nage Tisrael. No mowot Tarsus n̄a Silisia, ba ino milwo me Jerusalem kē. Navatgo mino Gamaliel, kē mavatne galsi no mi nele non ige bōbō gēpgēp nongēn. Tō no moboelgoy Ḡod, qele kimi del a qiyig agōh. 4 No manahiy tō ige mey a madamdam namtehal non Tigsas so wuh mat kēy. Yatkel mahē, nok tēy ige lōqōvēn tiwag mi ige tam̄an tō vantēy kēy lēm̄ yētyēt. 5 Nipris Liwo a nam̄agoy ige pris en, kē tiwag mi ige viwti et lililwo nongēn tavap vēh so hēyhēywē. Veg kēy melep neletes me hiy no so nok so van tēy hiy ige Tadamaskus. Tō nok so tēy ige a nēdēmtig Tigsas, tō so tēy lokse kēy me Jerusalem so vēvēg kēy.

6 "Bahnentō, nok vanvan sisqet me Damaskus, tege lēlwomyen en, tō nok m̄alyow bihin̄yeg a mavalwey me hag lōtōk en, tō memyeyen walēg no. 7 Tō no misisgoy hōw lēvētan en, tō nok yon̄teg naln̄e et nihole wo, ‘?Sol, Sol, bahap tō nēk ak memeh no qelegōh?’ 8 Ba nok vēhge lok van wo, ‘Inēk ihē, Welan?’ Tō kē wo, ‘Ino Tigsas Tanasaret, a nēk ak memeh tō no agōh.’ 9 Ige a tiwag mi no netsas namyeyen, ba kēy et yon̄teg m̄ōleg te nohohole nan. 10 Tō no wo, ‘?No tak qeleave, Welan?’ Tō Welan meplu goy no wo, ‘Hatig ba van n̄a Damaskus. Tō net vitwag qoyo vasem van nahap a no mētēymat tō veg nēk so galeg.’ 11 Navalwey ne hin̄yeg mak matbē namtek, tō kēy mētēy ēwē namnēk tō van tēy no van Damaskus.

12 "Tō net vitwag mavan me hiy no. Ikē Ananias, ikē net a nadamdam galsi Nele, wa ige Juw del lamahē nen, kēy nēdēmap kē. 13 Ananias mitig sisqet no me, tō mavap so, ‘Sol, ithik, etet lokse.’ Tō vag tiwag ēwē nen nok etet lokse tō etsas kē. 14 Tō Ananias vap so, ‘Ḡod non ige imam nongēn mal etyak tō nēk, so nēk tet Tigsas, a ikē Net Tenenen, wa so yon̄teg nohohole den naln̄an mahgen, wa so ēglal nahaphap a kē nemyōs. 15 Veg nēk tavan me net nonon bavavasemlō van hiy ige del nahap a nēk metsas wa nēk moyon̄teg tō. 16 !Hatig! ?Nēk dēyē bahap? Van vasugyon̄ tō oh wenwen den negengenyeg nōnōm lahan Welan.’

17 "Mahē nok m̄ōl lokse Jerusalem en, qōn̄ vitwag nok tatay Litiy Ēm̄ Bolol, tō no met noqoyqoy. 18 No metsas Welan, tō kē mavap me hiy no so, ‘!Velēgē! Vanyak ēgē den Jerusalem, veg ige gōh tit yon̄teg vēhte nēk mahē nēk vasemlō no van hiy kēy.’ 19 Tō no wo, ‘Welan, kēy nēglal so no mavan walēg tō nēm̄ tatay m̄adeg tō mōm̄ōk ige dēmtig lēm̄ yētyēt wa tō melm̄elm̄eh kēy. 20 Wa mahē kēy miyim mat Steven en, veg kē mavasemlō nēk, no met naday molon̄ den kē, tō nok dēm so itōk. Tō no mētēygoy tō nōkōt nonon ige a miyim mat kē en.’ 21 Tō Welan vap me hiy no wo, ‘Van, veg no tēvētleg nēk a yeh tewiwi hiy ige a et Juw te.’ "

22 Ige sil moyon̄teg galsi nohohole non Pol. Ba mahē a Pol mohole gatay ige mey et Juw te en, kēy ōlōl so "!Wuh kē! !Net qelegōh et sey te so nitog ēh me lemyam agōh!" 23 Kēy gaygayka mi nololgagay, tō hayhay suwsuwyeg nōkōt nonoy. Tō wōw nōwōwō tō suwuswuy kal hag lemyayawoy. 24 Tō net liwo non ige bepgapgal nivantēy Pol a lēm̄ non ige bepgapgal. Tō kē nivap van hiy ige bepgapgal so lem̄eh Pol, tō so vēhge maymay kē bahap tō ige sil magayka van hiy kē qelenen.

25 Ige bepgapgal nen lēg maymay galsi Pol tō so lem̄eh kē wah, tō kē nivap van hiy noyowyowveg non net liwo, so "Nēk tit lem̄eh vēhte net tēgvōnō Torom mey a et van heylō qete nēvēvēg." 26 Mahē a noyowyowveg moyon̄teg van a Pol mohole qelenen e tō, kē niplag van hiy net liwo nonon wo, "?Nēk nēglal nage a nēk ak tō gōh? !Net gōhkē, ikē net tēgvōnō Torom!"

27 Net liwo nan nivēhge Pol wo, "Wo hēywē so nēk nitiy et tēgvōnō Torom?"

Tō Pol wo, "O-oh."

28 Tō net liwo nan meplu wo, "No mēwēl nēsēm liwo so van me net tēgvōnō Torom."

Ba Pol vap so, "Ba ino mowot tēgvōnō Torom."

29 Vag tiwag ēwē ige a mētēytēymat tō so vēvēhiy kē en, kēy meslen̄ hiy mahē. Tō net liwo non ige bepgapgal nen memtēgteg veg kē mal lēg maymay nitiy et tēgvōnō Torom.

30 Taval meyen nan hag nen, net liwo non ige bepgapgal nemyōs so nēglal galsi so bahap tō ige Juw vēyvēy vavaleh tiwag mi Pol. Tō kē mēvētleg goy ige Pris Lililwo tiwag mi ige vēwti mayanag ne Sanhedrin* non ige Juw so kēy so yōstiwag. Tō kē nituwyak nējēn den Pol. Tō nilep lō kē me, tō nivētgiy kē van lengon ige mayanag.