1 Van lēm̄ yon̄ n̄a Antiok en, ige lēgēlgēg aē, tiwag mi ige vatvatgo. Ige nan wa Banabas, Sol, Simeon a kēy ōl kē so Womlēglēg, Lusius Tasayrine, wa Manaen a kōyō Herod milwo tiwag tō. 2 Mahē kēy taqlun̄ goy Welan wa gaygaymamah en, Nuvu Yon̄ mavap so, "Atmi etyak me hiy no Banabas tiwag mi Sol bemgumgu a no telep van hiy kōyō." 3 Bastō kēy gaygaymamah wa tatay en, tō kēy tan̄ namney apwon Banabas kōyō Sol, tō vētleg lō kōyō.

4 Mahē Nuvu Yon̄ mēvētleg lō Banabas kōyō Sol, tō kōyō van tēqēl yow Selusia, tō yem labaklap, tō gam hiy napnō Sayprus. 5 Tō Jon Mak madam kōyō bemyimyin̄. Kēytēl mēdēn̄ me Sayprus, n̄a lepnō Salamis. Tō kōyō mavasemlō nohohole non Ḡod lēm̄ tatay non ige Juw.

6 Tō kēytēl mavan walēg velvel vōnō del nan, tō mēdēn̄ me napnō Pafos. Tō kēytēl metsas net sēsēil vitwag, nahan Ba-Tigsas. Kē nage Tujuw, wa kē net lēgēlgēg galgal. Lagatgat Tikrik kēy ōl kē so "Elimas a net hewhew." 7 Kē tiwag mi mayanag liwo Tasayprus. Mayanag nan nahan Segius Polus, wa navaksan aē. Kē mōlōl Banabas kōyō Sol so nivan me veg kē nemyōs so niyon̄teg noyoy ēwē non Ḡod. 8 Ba net hewhew nan nitig tavale mi kōyō, veg kē nemyōs so niwseg yak mayanag den nēdēmtig.

9 Ba Sol, a nahan itan Pol, mōyheg mi Nuvu Yon̄. Tō kē met tenenen van hiy Elimas, 10 ba mavap so, "!Namtevu nitiy het wa nēk nōyheg mi nitiy galgal! !Inēk ēntēn Nuvu Het, inēk natvale goy nahaphap del mey a nēwē en! Inēk mihigoy namtehal tenenen non Welan. 11 Togtōkē, Ḡod tatan̄qal nēk, tō nēk tamatbē natkelgi. Nēk tit etsas vēhte namyeyen ne lo."

Vag tiwag ēwē namtan memyēpyēp qeleso namlēglēg magaygoy namtan, mak tō kē nivanvan leley, wa nisoksok net a so nitig helem̄ag kē. 12 Mayanag Segius Polus mamamakē liwo aē bavatvatne veg Ḡod. Tō mahē a kē met van qelenen en, kē mēdēmtig noyoy ēwē.

13 Pol tiwag mi ige yaplōplōn van lok labaklap tō gam yak den Pafos, tō van me lepnō Pega a loprovēns Pamfilia. Ba Jon Mak nivan veteg kēy tō mōm̄ōl lok Jerusalem. 14 Tō Pol kēy nen mavan den Pega, tō van dēn̄ me lepnō Antiok a Pisidia. Lōqōn̄ M̄ōkheg vitwag, kēy mavan a lēm̄ tatay vitwag non ige Juw, tō hag sey hōw. 15 Mahē kēy meptah bah Nele non Mosis tiwag mi nayapyap namun ige lēgēlgēg en, ige lililwo ne ēm̄ tatay nan mēvēhge kōyō bohohole bemyimyin̄. Kēy wo, "Yohē yathithimem, sowo noyoy namun mōyō aē bohole vasōsōp ige sil, itōk so kōmyō hole."

16 Pol nitig ketket hag tō nihog kal namnen ba nivap so, "!Kimi Tisrael tiwag mi ige tegtegha a mogmogo goy Ḡod en, atmi yon̄teg galsi! 17 Ḡod non ige Tisrael metyak tō ige yatqōtqōngēn. Tō kē mak lēl kēy mahē kēy notog Itsip qeleso nahalvan. Tō kē mitig helem̄ag kēy so kalō den Itsip mi naman a namaymay. 18 Tō kē motog muhuy tiwag mi kēy bēte son̄wul vet (40) a lepnō vadalm̄eg. 19 Tō kē mōvōy ige ginwotwot liviyō den Kanan, a et Juw te. Ba tō nilep van napnō nan hiy ige nonon, a ige Tisrael. 20 Ḡod mak nage gōh tege lelo ēte m̄eldēl vag vet son̄wul tēvēlēm (450).

"Tō me atgiy en, Ḡod nim̄ōk kal ige lililwo nonoy, tō ige gōh metgoy ige Tisrael gōh, gaydēn̄ a Ḡod metyak Samuel so nivan me net lēgēlgēg. 21 Tō ige Tisrael mēvēhge van hiy Ḡod so kēy nemyōs nēqēt mayanag vitwag, tō Ḡod metyak Sol, a ēntēn Kis. Sol mavan heylō me den niginwotwot ne bum non Bensimen. Kē nēqēt mayanag bēte son̄wul vet (40). 22 Tō Ḡod nilepyak lok kē, ba nim̄ōk kal lokse Devēt, so nimyanag nonoy. Tō Ḡod mohole veg Devēt qelegēn: ‘No metyak Devēt a ēntēn Jēsē, ikē nam̄e et a no nemyōs kokoym̄eg. Kē teskalgoy nahaphap del a no nemyōs.’

23 "Tō Ḡod mavatvat so kē tetyak net vitwag den niginwotwot ne bum non Devēt, tō net nan so nivaēh ige Tisrael. Net nan nahan Tigsas. 24 Am̄ag den Tigsas nivan me en, Jon motoytoy van hiy ige Tisrael so kēy dēmleh den nimguy tō vasugyon̄. 25 Sisqet so notoytoy nonon nibah en, Jon nivap van hiy kēy wo, ‘?Kimi dēm so ino ihē? Ino et Kraēs te. Kē tavan me atgiy, tō no et haytēyēh te so tuwyak nagatli sandol nonon.’

26 "Yathithik, kimi ige bōbō non Abraham, tiwag mi kimi mey a nuqul tiwag so dēmap Ḡod. !Yon̄teg! Nohohole a Ḡod melep me bavavaēh ige sil en, kē mēvētleg me hiy gēn mahgengēn.

27 "Ba ige sil a tog tō Jerusalem tiwag mi ige lililwo nonoy en, kēy et et vēglal te so Tigsas ihē. Veg kēy et yon̄teg m̄ōleg te nayapyap a ige et lēgēlgēg mayap tō en, wa tō gēn vataptah vaga tō a Lōqōn̄ M̄ōkheg en. Kēy mēvēvēg kē, tō nage gōh maktig nohohole non ige et lēgēlgēg. 28 Kēy et etsas te hap te mey nehet a so vēvēg kē aē, ba kēy mēvēhge Paelat so wuh mat kē. 29 Mahē kēy mak bah nahaphap del mey a Nayapyap Yon̄ mavap gatay tō kē en, tō kēy melep tēqēl nataqn̄ēn den nowolwol, tō m̄ōk kē leqyan̄ vet. 30 !Ba Ḡod mak ēh lokse kē den namatmat! 31 Atgiy, ige mey a madamdam tō Tigsas den Kalili van dēn̄ Jerusalem en, kēy metetsas lokse kē lōqōn̄ m̄adeg. Tō togtōkē en, ige gōh vavasemlō noyoy nonon van hiy ige sil.

32 "Tō kemem vasem van hiy kimi noyoy ēwē veg nage a Ḡod mavatvat tō van hiy ige yatqōtqōngēn. 33 Ḡod mak navatvat nonon gōh makalō me hiy gēn a ige nētnētm̄ey nonon. Kē maktig navatvat nan mahē kē melep kal Tigsas den namatmat. Gēn vatah sas nage gōh Lasam natvēlgi vōyō a mavap so,

‘Inēk intik.

Qiyig gōh nok van me nitiy imam nōnōm.’✝

34 "Ḡod mavaplō tō so kē telep kal Tigsas den namatmat, ak tō so kē tit saq vēhte n̄ēh, mi nohohole gōh:

‘No telep van hiy nēk nitiy vawē yon̄ mey a no melep tō van hiy Devēt am̄ag.’✝

35 "Tō Nayapyap Yon̄ vitwag se so,

Nēk tit ukēg veteg vēhte Net Yon̄ nōnōm so niqōn.✝

36 "Mahē Devēt nēh laptō en, kē maktig namyōs non Ḡod. Tō me atgiy en, kē nimat, tō kēy metvig kē tiwag mi ige yatqōtqōn. !Wa nataqn̄ēn masaq lelo qayan̄! 37 Ba Tigsas netegha. Ḡod mak ēh lok tō kē den namatmat en, nataqn̄ēn et saq te lelo qayan̄.

38 "Bastō ige yathithik wa ige tētētek, itōk so kimi ēglal so Ḡod nivasemlō van hiy kimi so, heylō Tigsas en, kē tēdēmveteg nubug nonmi. Tō kē tatamgoy negengenyeg del mey a Nele non Mosis tit tamgoy vēhte. 39 Veg bege gōh en ige del a dēmtig wa mamatēg van hiy Tigsas en, kē tōm̄ōk togolgol kēy van hiy Ḡod. 40 Atmi etgoy galsi, veg nahap a ige lēgēlgēg mohole gatay tō en, tiple qal kimi, a Ḡod mavap wo,

41 ‘Yon̄teg. Kimi mey a mēyēyēheg tō kē en, kimi so et vēglal veyeh ēgēn. Veg kimi tam̄alyow aē, wa tō kimi tamat ganwon.

Veg no tak nage vitwag a kimi tamamakē aē a kimi notog ēh lapgetō agōh.

Tō net wo nivasem van hiy kimi en, ba kimi tit dēmtig vēhte aso tusu.’ "✝

42 Mahē Pol kōyō Banabas so kalō den nēm̄ tatay en, tō ige sil vēhge lokse kōyō so kōyō tavan vēh lok me hiy kēy lōqōn̄ M̄ōkheg itan. 43 Lēkle tatay en, kēy mēvēlvēlwoy, ba ige m̄adeg matatag Pol kōyō Banabas so hohole tiwag mi kōyō. Kēy ige Juw tiwag mi ige tegtegha a mogmogo goy Ḡod. Tō kōyō mohole biyin̄ kēy so tēy maymay nasgōp non Ḡod.

44 Tō taval qōn̄ a Lōqōn̄ M̄ōkheg en, sisqet so ige del a lelo vōnō nen so van qēt me boyon̄yon̄teg noyoy ēwē non Ḡod. 45 Ige Juw met van a so nisil liwo mavan me en, tō kēy mamatwolwol Pol kōyō aē, tō qētēg hohole visipteg Pol, wa tō hohole hethet navatvatne non Pol.

46 Ba Pol kōyō Banabas et mētēgteg hōn te, tō kōyō mavap so, "Ḡod mēvētleg totogyeg kamyō me so vasemlō nohohole nonon van hiy kimi ige Tisrael. Ba kimi et buste nohohole nan, wa kimi vavap so kimi et sey te so lep nēh lap. Bastō kamyō so ukēg veteg kimi tō toytoy hiy ige mey et Juw te. 47 Veg Welan mal vayēg kamyō qeleso:

‘Ino mak tō nēk mavan me qele nuqul, a mihin̄yeg hiy ige a et Juw te,

tō so nēk telep van nēh lap hiy ige sil del telemyam.’ "✝

48 Ige mey a et ige Juw te moyon̄teg van nohohole gōh en, tō kēy memlaklak aē a nēkēkēn. Tō kēy mēdēmap nohohole non Welan. Wa ige del mey a Ḡod movonyak vatag so kēy telep nēh lap en, kēy mēdēmtig.

49 Bahnentō, noyoy ēwē non Welan nen maga qēt a lelqelqevōnō del en. 50 Ba ige Juw mosoksok ige lililwo so galyak kēy den Pol kōyō Banabas. Yatkel lōqōvēn lililwo mey et Juw te en, kēy madam nōlōwlō non ige Juw. Ige Juw mavanvan hiy ige lōqōvēn gōh, wa hiy ige lililwo telepnō, tō mak so kēy met buste Pol kōyō. Mak tō so ige lililwo ak tōqtōqyeg yeh Pol kōyō Banabas, tō vōyyak kōyō den napnō nen. 51 Tō Pol kōyō Banabas mesyap veteg nēvētan ne vōnō den nayn̄oyō, so vasemlō so nēvēvēg non Ḡod apwoy. Tō kōyō van n̄a Ikonium. 52 Ba ige tin̄qoy del memlaklak a nēkēkēn, wa mōyheg mi Nuvu Yon̄.