1 !Yēhē Taḡalasia! !Kimi naqaqa! ?Ba qeleave? ?Yatkel et magal kimi mi naman? !Ba kimi moyon̄teg vēglal galsi so kēy mowos kal Tigsas Kraēs lowolwol! 2 Nok so vēhge nēvēvēhiy vitwag ēwē van hiy kimi. ?Qeleave? ?Kimi melep Nuvu Yon̄ am̄ag veg a kimi matatag tō Nele en, siso kimi moyon̄teg noyoy ēwē tō kimi mēdēmtig kē? 3 !Et wē te! ?Kimi mal qētēg mi naman ne Vu Yon̄, ba tō kimi so ak qētqēt mi nētnegay nonmi? !Tateh! 4 ?Nahaphap del a kimi mavan heylō en, kē yeghuquy ēwē? Nok et dēmdēm te qelenen. 5 Bastō nok so vēhge lokse kimi, ?Wō Ḡod nileplep van Nuvu nonon hiy kimi wa tō kē niakak naphah van lengomi, veg kimi matatag Nele ēwē ōk? ?Siso veg kimi moyon̄teg tō dēmtig kē, 6 qeleso Abraham mēdēmtig Ḡod en, tō Ḡod met lolwē kē so kē netnenen van lengon?✝

7 Sōwlē, kimi so ēglal galsi so mahē a net nidēmtig Ḡod qele Abraham en, ikē ēntēn Abraham. 8 Nayapyap Yon̄ melgēlgēg so Ḡod tak togolgol ige lolqōn̄ van lengon heylō nēdēmtig. Veg Layapyap Yon̄ en, Ḡod mohoyhoylō noyoy ēwē van hiy Abraham mi nohohole so, "No tavawē ige sil del lemyam heylō nēk."✝ 9 Bastō ihēte wo nēdēmtig Ḡod en, Ḡod tavawē kēy tiwag mi Abraham a kē net bēdēmtig.

10 Ihēte mey mamatēg van lemgumgu Bele en, nivipdeg taqal kē. Veg Nayapyap Yon̄ mavap so, "Ḡod tivipdeg ige del mey a kēy et tatag vaga te vel haphap a kēy mayap vatag lōbōk Nele en."✝ 11 Tō Nayapyap Yon̄ mavap so, "Net wo motog tenenen van lengon Ḡod en, kē mamatēg ēwē van hiy nēdēmtig."✝ Tō nohohole gōh nim̄ōleg galsi so net wo matatag Nele en, kē et tenenen te van lengon Ḡod. 12 Ba Nele netegha den nēdēmtig, qele Nayapyap Yon̄ mavap so "Net wo nidam tatag nele en, kē tēh aē."✝

13 Ba Kraēs mal wēl yak gēn, tō kē melep yak gēn den nivipdeg ne Le. Kē melep nivipdeg veg gēn qele a Nayapyap Yon̄ mavap so, "Nivipdeg maymay taqal ihēte a kē nimat apwo qētēnge vitwag."✝ 14 Ba togtōkē, ige lolqōn̄ telep vēh navawē non Abraham heylō Tigsas Kraēs, ak tō so gēn telep vēh Nuvu mey a Ḡod mavatvat tō me hiy gēn heylō nēdēmtig.

15 Yathithik wa yatētētek, dēm tatag tow van bēvēnangēn, a bavatvat. So yoge vōyō wo mavatvat bahapqiyig te, tō kōyō vonm̄ēt bah, ba net tegha tit yapsesey vēhte navatvat noyō si nim̄ōk leh van nēdēmdēm tegha van lavatvat nan. 16 Ba Ḡod mavatvat van hiy Abraham kōyō bōbō gēpgēp nonon. Nohohole gōh et vap te so "hiy ige bōbō gēpgēp," qeleso kēy nam̄adeg. Ba mavap so, "hiy bōbō gēpgēp nonon," nēdēmdēm nan so net vitwag ēwē, net nan a Kraēs en. 17 Nēdēmdēm ne hohole mino en, qelegēn. Am̄ag, Ḡod mavatvat, tō lēkle ētē m̄eldēl vag vēt son̄wul tēl (430) en, Nele qoyo kalō me. Ba Nele gōh tit yapsesey vēhte navatvat agōh, wa tō tit lepyak vēhte nohohole non Ḡod. 18 So Ḡod wo melep me nahaphap hiy gēn, veg gēn natatag Nele en, tō nēdēmdēm nan so navatvat non Ḡod mal bah ēgēn. Ba Ḡod mohole vētday vel haphap van hiy Abraham heylō navatvat nonon veg nasgōp.

19 Qeleave Nele? Ḡod mōm̄ōk vaqlēh Nele veg negengenyeg. Ba Nele gōh totog dēn̄ mahē a bōbō gēpgēp nivan me, kē a Ḡod mavatvat tō aē am̄ag. Nele gōh, Ḡod melep van hiy ige in̄sel tō kēy lep van hiy net vanvantēy hal, tō kē melep van hiy nisil.* Tō Nele mavan tabay me den Ḡod. 20 Hēywē so net vanvantēy hal mavan me den ige nam̄adeg, ba Ḡod ikē vitwag woy.

21 ?Wō nele gōh niakak tavatvale mi navatvat non Ḡod? !Ō-ō-ō, tateh! So nele vitwag wo telep vēh nēh van hiy net, nēdēmdēm nan so gēn so tavan togolgol vēh lengon Ḡod heylō Nele. Ba Ḡod et lep te nele qelenen van hiy net. 22 Ba Nayapyap Yon̄ niak m̄ōleg so ige del telemyam notog leln̄e vēvēg begengenyeg nonoy, qeleso kēy notog lēm̄ yētyēt. Ba navatvat bēdēmtig hiy Tigsas Kraēs tavan vēh hiy ige a nēdēmtig kē. 23 Me am̄ag, mahē a nēdēmdēm ne dēmtig et van qete me en, Nele gōh mēyēt kemem del wa mitigoy kemem, tō kemem motog qelenen gaydēn̄ a Ḡod melep lō me nēdēmdēm ne dēmtig.

24 Bastō Nele qeleso net bēlēl tegoy gēn. Nele mēlēl tegoy gēn van dēn̄ a Kraēs mavan me. Ak tō so gēn nētēymat so dēmtig kē, tō van togolgol lengon Ḡod. 25 Togtōkē nēdēmdēm ne dēmtig mal van me, tō kemem et tog site van laln̄an net bēlēl tegoy agōh.

26 Kimi del mukēg kē veg kimi mal van me yantēntēn Ḡod heylō nēdēmtig van hiy Tigsas Kraēs. 27 Veg kimi del a mal vasugyon̄ en, kimi nuqul tiwag van mi Kraēs, veg kimi mal lep Kraēs qeleso kimi meheygoy kimi mi namalmal.

28 Tateh hap tegha se so niak vēlwoy kimi. Wa tateh hap tegha se so niaklō so kimi Juw wa yatkelgi et Juw te. Yatkelgi neslev wa yatkelgi et slev te, yatkel et tam̄an wa yatkel et lōqōvēn, tateh. Kimi del mal qultiwag mi Tigsas Kraēs, tō kimi mal van me vitwag woy. 29 Ba Kimi sowo ige nonon Kraēs, tō kimi mavan tabay me den Abraham. Tō kimi telep vēh vel haphap a Ḡod mavatvat tō van hiy Abraham.