1 Nēdēmdēm ne hohole mino gōh qelegēn. Dēm tow van hiy net vitwag a ēntēn aē. Net nan nim̄ōk net tegha so nietgoy ēntēn. Tō vaga net tegha nan nivatvatne ēntēn, ak tō so namtevun nitnenen. Ēntēn en, ikē qeleso neslev van hiy net nan, et matak te van aē so me atgiy ēntēn tilwo goy nahaphap del non itman. Me atgiy en kē telep vēh nage del den imam nonon, ba qiyig gōh kē et liwo goy qete nahaphap nan. 2 Veg net bēlēl tegoy aē, tō kē tetgoy vēh vel haphap del nonon, gaydēn̄ mahē a imam nonon mepnog tō aē.

3 Am̄ag, mahē a igēn nētnētm̄ey en, igēn ige slev. Namanig nan, mahē Kraēs tateh qete, nahap telemyam gōh nam̄agoy gēn, qeleso nele a mavan me den nēdēmdēm non net, siso nuvu het. 4 Ba mavan togolgol me lamahē a Ḡod mepnog tō aē, tō kē qoyo vētleg me Ēntēn. Nēnētm̄ey gōh mowot me den nalqōvēn vitwag, tō metgoy liwo kē laln̄e Le. 5 Kē mavan me tō so niwēl yak gēn a notog laln̄e Le, tō Ḡod nisolyak gēn. 6 Veg kimi ige yantēntēn, tō Ḡod mēvētleg me Nuvu non Ēntēn so nitog tiwag me lelo taqangēn. Tō Nuvu gōh niōlōl so, "!Imam, Imam!" 7 Bastō am̄ag en nēk neslev, ba heylō Ḡod en, togtōkē nēk mal van me ēntēn, tō nēk telep vēh vel haphap a Ḡod mavatvat tō van hiy nēk.

8 Am̄ag, kimi et ēglal te Ḡod en, tō kimi ige slev nonon nahap qiyig telemyam a kēy et ḡod te, ikē noḡod galgal. 9 Ba togtōkē, kimi mal ēglal Ḡod. Tō nok so vap qelegēn so, togtōkē Ḡod mal ēglal kimi. ?Bahap tō kimi nemyōs so van lok van hiy nahap qiyig a kēy mewelan goy tō kimi am̄ag ōk? Namaymay nonon tateh hōnqal, wa tō kēy tit lep vēhte nahap vitwag van hiy kimi. ?Bahap tō kimi nemyōs so van me ige slev nonoy lokse? 10 ?Bahap tō kimi nemyōs so van me ige slev ne vēnan ige Juw? !Veg kimi dēmap nōqōn̄ yon̄, nōwōl yon̄, wa nēte yon̄ nonoy!* 11 Yēhē, kimi mak mētēgteg no. !Nok dēm van so nok mugumgu yeghuquy ēwē van hiy kimi!

12 Yathithik wa yatētētek, mahē a no mavatēp kimi en, no mavan me qele kimi, nok et dēmdēm te van bēvēnan ige Juw. Tō nok vēhge kimi so van me qele ino. Hēywē, kimi mak tō nēwē me hiy no. 13 Kimi mal ēglal vatag so am̄ag, no mavan me motog tiwag mi kimi veg no mogom, ba mahē nen no mavasemlō noyoy ēwē gōh van hiy kimi. 14 Ba nogom mino gōh mak memeh kimi, ba kimi et yon̄teg te nehet aē veg no, wa tō kimi et dēmdēm hethet te veg no. Kimi melep vasgēt no lēm̄ nonmi, qeleso ino nin̄sel non Ḡod, si ino Tigsas Kraēs. 15 No tavap vēh qelegēn, kimi nemyōs so wikil yak namtami ba leh namtek aē, ba kimi akak lēlēge.* Am̄ag, kimi memlaklak tō. ?Ba togtōkē, qeleave? 16 No mohole nēhēyhēywē vēlēs van hiy kimi. ?Ba nēhēyhēywē wun mak nehet hiy kimi? ?Tō kimi dēm so no matvale tiwag mi kimi?

17 Ige nen a kēy tog walēg tō kimi en, nēdēmdēm nonoy namaymay veg kimi, ba nēdēmdēm nonoy et wē te. Veg kēy nemyōs so gatgoy kimi, so kimi dēmdēm vēlēs hiy kēy. 18 Hēyhēywē, so net niak hiy kimi qelegōh mi nēdēmdēm mey a itōk en, nitiy wē yeh, so wo no aē mi kimi si so tateh. 19 Ige nēnētm̄ey susu mino, nok yon̄memeh veg kimi, qele nalqōvēn niyon̄memeh so kē nilep ēntēn, gaydēn̄ a kimi lep nēh non Kraēs van lēh nonmi. 20 !No nitiy mōyōs so nok tog tiwag mi kimi qiyig agōh, tō so leh nohohole maymay mino van lohohole malkōh! ?No tak qeleave van hiy kimi?

21 Kimi mey a nemyōs so matēg van hiy Nele, atmi vulu no. ?Wō kimi mal yon̄teg vatag nahap a Nele gōh nivayēg ōk, si kimi et yon̄teg qete? 22 Nohohole Yon̄ mohole gatay yoge nētnētm̄ey tam̄an nonon Abraham, vitwag mowot me den nalqōvēn a kē neslev, bastō vitwag mowot me den ēgnōn a kē notog wawah.✝ 23 Nēnētm̄ey mey a mowot me den nalqōvēn neslev, kē mowot me qele ige nētnētm̄ey del en. Ba nēnētm̄ey mey a mowot me den ēgnōn a kē notog wawah en, kē mowot me veg Ḡod mavatvat tō aē.

24 Ba gēn telep vēh nakaka gōh qeleso navap tēngeg. Yoge lōqōvēn gōh niaklō me hiy gēn nakavanan vōyō a Ḡod mohohole tō van hiy ige Juw. Nakavanan vitwag veg Nele a Ḡod melep van hiy ige Juw luwutwut Sinai, nēdēmdēm nan qele Hega. Ige yantēntēn Hega en, kēy ige slev, kēy et tog wawah hōn te. 25 Bastō Hega gōh qeleso Nuwutwut Sinai, n̄a Arabia, tō kē nitig leh ige Tejerusalem a togtō agōh. Ikē tiwag mi ige nonon, kēy ige slev vēlēs.

26 Ba Sera, ikē qeleso Jerusalem mey netegha. Jerusalem nan n̄a lōtōk, wa ikē notog wawah, tō ikē tita nongēn. 27 Veg Nayapyap Yon̄ mavap so,

"Inēk gōh am̄ag, nēk et visipsis te, ba itōk so nēk malaklak.

Inēk gōh am̄ag, nēk et yon̄memeh te beleplep nētm̄ey,

tō itōk so nēk ōlōltawtaw wa sese neh bemlaklak,

nēk et leplep nētm̄ey hōn te ba togtōkē yantinti a nam̄adeg tododoy

nehep den nalqōvēn a ēgnōn notogtog tiwag lap mi kē qeleanen."✝

28 Yathithik wa yatētētek, kimi yantēntēn Ḡod veg kē mavatvat tō aē veg kimi, qele kē mavatvat tō am̄ag veg Isak. 29 Ismael mowot namun me qele ige nētnētm̄ey del, ba Isak mowot namun me heylō Nuvu non Ḡod. Ismael makaksok tiwag mi Isak, tō nēmētvuge qelegōh lapgetō gaydēn̄ qiyig agōh. 30 ?Ba Nayapyap Yon̄ mavap qeleave? Kē mavap so, "Nēk so vōyyak nalqōvēn slev nen tiwag mi ēntēn, kōyō vayak den mahē agōh. Veg ēntēn nalqōvēn slev nen tit m̄agm̄agoy vēhte nahaphap non imam nonon. Nahaphap del geh nen nivan hiy ēntēn nalqōvēn a nawawah."✝ 31 Bastō igēn gōh, et yantēntēn nalqōvēn slev te, ba igēn yantēntēn nalqōvēn a nawawah.