1,2 Lēkle ēte son̄wul nanm̄e vēvet, Ḡod mavasemlō me so nok so van n̄a Jerusalem. Tō kamyō Banabas mavan me Jerusalem. Tō Titus madam kamyō.✝ Tō kamtēl mōyōstiwag tiwag mi ige m̄agoy ne ēm̄ yon̄. Kamtēl mōyōstiwag mi kēy ēwē veg, so kēy wo et buste notoytoy mino en, tō no tiple mugumgu yeghuquy ēwē. Tō no mavasemlō m̄ōleg noyoy ēwē mey a nok toytoy van hiy ige mey et Juw te. Tō kēy mēwēhgoy.

3 Ipluk a Titus en, ikē nage Tikrik, ba kēy et vap maymay te van hiy kē so tep vēglal kē tatag van lēvēnan ige Juw.* 4 Nohohole bēvēglal gōh mavan me den yatkel et a kēy galgal goy so kēy yaplōplōn gēn. Ige gōh metvēy lēm̄ yon̄ so halhalveg bat gēn. Kēy nemyōs so etsas so Tigsas Kraēs mak taywah gēn qeleave, veg kēy nemyōs so lēg maymay gēn tō so gēn tatag lokse nēmētwōn ige Juw. 5 Ba kemem mitig maymay so gatgoy kēy, veg kemem nemyōs yeh so etgoy galsi nohohole hēyhēywē van loyoy ēwē en, tō so kimi telep galsi vēh.

6 Ba ige m̄agoy ne ēm̄ yon̄ en, nahay aē a so kēy et lililwo. Ba no et dēmdēm te aē veg kēy so kēy so et liwo si tateh. Veg van lengon Ḡod, ige del haytēyēh vēlēs. Ba ige et lililwo gōh, kēy et leh te noyoy ēwē namuk. 7 Kēy met van so Ḡod mal m̄ōk no so nok vasemlō noyoy ēwē gōh van hiy ige lolqōn̄, qele kē mōm̄ōk tō Pita so nivasemlō noyoy ēwē van hiy ige Juw. 8 Ḡod mōm̄ōk kal no mi namaymay nonon, so nok van me nahal non ige lolqōn̄, qele kē mōm̄ōk kal tō Pita so kē nahal non ige Tisrael. 9 Ige m̄agoy ne ēm̄ yon̄ Jerusalem en wa, Jemes, Pita, ba Jon. Kēytēl met vēglal nasgōp a Ḡod melep me hiy no. Tō kēytēl van me tō ol namneytēl me hiy no tiwag mi Banabas, veg kēytēl met van so kemem haytēyēh vēlēs. Tō kemem movonm̄ēt hōw so vēlwoy namgumgu, kamyō toytoy namun mamyō hiy ige lolqōn̄, bastō kēytēl toytoy namuytēl hiy ige Juw. 10 Tō ige hal mavap me hiy kamyō so kamyō dēmsas ige m̄asay, bastō so biyin̄ kēy. Ba no mal dēmsas vatag kēy, tō no nemyōs so ak namgumgu qeleanen.

11 Mahē a Pita mavan me Antiok en, tō nok van me tō tig van lengon, tō hole maymay van hiy kē, veg kē mak nage mey a et tenenen te.✝ 12 Veg am̄ag, Pita itōk tō. Kē megengen tiwag tō mi ige non Tigsas mey a et Juw te. Ba me atgiy en, Jemes nivētleg me yatkel et Tejerusalem so nivatēp kemem. Mahē a kēy mēdēn̄ me nen, tō Pita nibah gengen tiwag mi ige mey et Juw te. Pita mabah gengen veg kē memtēgteg ige viwti mey a nemyōs so tetep vēglal ige mey et Juw te. 13 Tō ige yaplōplōngēn Tujuw, kēy madam nēmētwuge het nen, tiwag mi Banabas se.

14 Tō no met van so kēy et tatag te nēmētwuge mey netnenen, a tatag nohohole hēyhēywē van loyoy ēwē. Tō no mohole maymay van hiy Pita aē van lengoy del. No mavap so, "?Bahap tō nēk vasōsōp ige mey et Juw te so kēy tatag namtevōn ige Juw? Veg inēk Nujuw, ba nēk et tatag te namtevōn ige Juw; nēk tatag namtevōn ige mey et Juw te."

15 No mavasemlō galgalsi lokse van hiy Pita, so kamyō et net helhele non ige lolqōn̄ te, ba kamyō nitiy et Tisrael. 16 Tō kamyō nēglal vatag so nēmētwuge tit m̄ōk togolgol vēhte net vitwag van lengon Ḡod, so kē wo matatag tō Nele. Ba net a nidēmtig Tigsas Kraēs en, kē nen a Ḡod tet van so kē netgolgol lengon. Tō kamyō mēdēmtig Tigsas Kraēs, so m̄ōk togolgol kamyō van lengon Ḡod. Tō kamyō netgolgol heylō nēdēmtig nan, ba et heylō te namgumgu tatag Nele. Veg namgumgu mey net nimgumgu tatag Nele en, namgumgu nan et haytēyēh hōn te so net nan nitgolgol tiwag mi Ḡod.

17 Togtōkē gēn matēg van hiy Kraēs so gēn netgolgol. So gēn wo galeg nahap mey Tigsas mōlvayēg en, ba nim̄ōleg so gēn wo gengenyeg aē en, tō namanig nan so Kraēs mavahiy gēn so gēn so gengenyeg. Ba et qele te nen. !Tigsas et net begengenyeg te!

18 Am̄ag no mavan yak tō den namtehal ne Le tō so dam namtehal non Kraēs. So namtehal ne Le nan, no wo madam lokse, tō nēmētwuk tavasem so no net begengenyeg.

19 ?Ba qeleave no mavan m̄ōleg den Nele? Tatag van nēdēmdēm alon Nele en, no mal mat vatag aē. Qeleso kēy mowos kal no lowolwol tiwag mi Kraēs. Veg no mal mat en, nēvēvēg ne Le mabah, tō togtōkē no mēh so ak malaklak Ḡod. 20 Togtōkē, et ino te a nok tog ēhēh tō agōh, ba nēh non Kraēs notog tiwag mi no. Nataqn̄ik a nēh a nok tog tēy tō qiyig gōh en, nok ēh mi nēdēmtig hiy Ēntēn Ḡod, veg kē natam no wa tō kē mukēg nēh nonon veg no, tō kē mavaēh no. 21 No tit suwyeg yak vēhte nasgōp non Ḡod. Veg sowo net vitwag tetgolgol vēh van lengon Ḡod a kē natatag Nele en, tō namanig nan so Kraēs mamat yeghuquy ēwē.