1 Kraēs mukēg wawah gēn tō so gēn tog m̄ōleg galgalsi. Tō atmi tig maymay lap. Nitog so kimi van lokse me neslev.

2 !Atmi yon̄teg, ino Pol, a nok vap van hiy kimi! So kimi wo mukēg kimi van so tep kimi, tatag van Lele en, tō Kraēs tit biyin̄ hōnqal vēhte kimi. 3 Nok so vap maymay lokse van hiy kimi. So net vitwag den kimi wo mukēg kēy van so tep vēglal kē, tō kē mas ak vel haphap a Nele mavayēg van kē. 4 So kimi wo mamatēg van hiy Nele so kimi tenenen van lengon Ḡod en, tō kimi mahgemi tototyak kimi den Kraēs, tō nasgōp teqlen̄ den kimi. 5 Ba kemem en, kemem titig apwo dēmtig, heylō Luvu. Tō kemem temlaklak so dēyē so Ḡod niak tenenen kemem.

6 Kemem nētēy lap nēdēmtig, veg nēdēmtig nitiy wē yeh. Mahē gēn muqul tiwag van mi Kraēs Tigsas en, et tiykē yeh te sowo kēy mal tep vēglal gēn si et tep vēglal te gēn. Nitiykē yeh en, nēdēmtig mey a nemn̄ēs goy natamtam.

7 Mahē a kimi moyon̄teg noyoy ēwē am̄ag en, qeleso kimi meskiyak valeh, tō sisqet so kimi lalaket. ?Ba entō gōh, nahap meteygoy kimi? ?Ihē mihigoy kimi, tō kimi et tatag te nohohole hēyhēywē gōh? 8 Mey gōhkē et dēmdēm non Ḡod te, a mal ōlōl vatag kimi. 9 Etgoy galsi kimi den navatvatne het bele, veg "nis a nusu en, kē nigaleg naflawa liwo nisis." 10 Ba heylō Welan no nēdēmtig so kimi toyon̄teg wa tokokm̄egoy nēdēmdēm mino. Tō ihēte a niakak hethet kimi en, Ḡod telep van nēvēvēg hiy kē aē.

11 Yathithik wa yatētētek, dēm tow van hiy ige mey a nemyōs so tep vēglal kimi. Am̄ag, mahē a no et dēmtig qete Kraēs en, no nemgugoy kēy. So nok wo toytoy lapgetō so tep vēglal net en, togtō kēy tit ak memeh vēhte no. Sowo qelenen en, togtō mahē nok hohole gatay namatmat non Kraēs apwo wolwol en, tit ak hethet vēhte nēdēmdēm nonoy. Ba nok et mugugoy te kēy, tō kimi nēglal vatag so kēy akak memeh lapgetō no. 12 !Ba no nemyōs so ige mey a kēy nemyōs so tep kimi en, nitiy wē yeh so kēy wot lok kēy mahgey!

13 Yathithik wa yatētētek, Ḡod may ōlōl yak kimi so van taywah. Ba kimi et van taywah te so dam nēdēmdēm bataqn̄ige* mey nehet, ba kimi so vēy biyin̄ kimi vaga, veg kimi notog vēy tamtam kimi. 14 Nele vitwag niaktig Nele tegtegha del. Nohohole nan qelegēn so, "Atmi tam ige a kēy notog walēg kimi qele nēk tam lok nēk mahge."✝ 15 Ba kimi sowo motogtog vēyvēygēl en, tō kimi qeleso notok, a kēy vēy n̄itn̄it lok hiy kēy mahgey. Tō kimi tiple doldoldendel lok kimi.

16 Bastō nok vap van hiy kimi, van tatag Nuvu Yon̄. Sowo kimi wo matatag Nuvu, tō kimi tit ak vēhte nahaphap het a nataqn̄ige nemyōs. 17 Veg nataqn̄ige nēvēyvēygēl tiwag mi Nuvu Yon̄, wa Nuvu Yon̄ nēvēyvēygēl tiwag mi nataqn̄ige, veg kōyō natvale. Tō bege gōh en kimi tit ak vēhte nahaphap mey kimi namyōs. 18 Ba Nuvu Yon̄ wo mitig helem̄ag kimi en, Nele tit tigoy vēhte kimi.

19 Ige del tēglal so namyōs nitaqn̄ige en nahap; togay het, legleg hethet, legleg solosloteg, 20 mogmogo goy ḡod tegtegha, hewhew mat net, togtog tavatvale, vēvēhyuw, qeneqneg, boboel, sosotel, nēvēyvēygēl memeh, togtog vēlvēlwoy, 21 inin qaqa memeh, akak tēqtēqyeg, wa tō yatkel haphap mey a et wē te. Tō nok vap lō togolgol van hiy kimi yipteg agōh, qele no mavap tō van hiy kimi am̄ag. Ige mey a kēy akak qelenen en, Ḡod tit mayanag goy vēhte kēy.

22 Ba nēwe Vu Yon̄ en, ikē natamtam, namlaklak, natm̄at, namhuy, naln̄e magaysēn, wē mi net, dēmtig, 23 dēmbēbēw. Wa tō Nuvu Yon̄ nivatne nēk so etgoy nēmētwu so nitnenen vaga. Wa tō naln̄e tigoy nahaphap het. Tateh le so nitigoy kimi den nage geh agōh. 24 Ige non Tigsas Kraēs en, kēy mal ukēg veteg nēdēmdēm hethet a nikalō me den nataqn̄ige. Qeleso kēy mal wos nataqn̄ige van lowolwol. 25 Atmi et Nuvu Yon̄ gōh, kē mal lep vatag me nēh hiy gēn. Veg bege gōh en, gēn so van tatag kē. 26 Nehet so gēn sosotel gēn si keskes yak vēygēl si vēy qeneqneg gēn.