1 Van lelo vōnō Jerusalem en, Sol vēgsoy lapgetō so niwuh matmat ige tin̄qoy non Tigsas. Lōqōn̄ vitwag Sol mavan hiy Nipris Liwo. 2 Kē nemyōs so nivan n̄a lepnō Damaskus, so nisoksok ige a damdam Namtehal Ne Ēh.* Kē so nivēl m̄ōlm̄ōl lokse ige Krēstēn nan, tō so van tēy kēy lēm̄ yētyēt a Jerusalem. Bastō kē nivēhge Nipris Liwo so niyap neletes hiy ige ēm̄ yon̄ Tujuw a Damaskus so biyin̄ kē. Tō Nipris Liwo memgugoy kē.

3 Bahnentō, Sol nihatig tō so nivan Damaskus ēgēn. Kē nivanvan sisqet me napnō nan wah, nihin̄yeg liwo nivan me hag lōtōk en, tō nihin̄yeg walēg goy kē. 4 Sol nisisgoy hōw lēvētan en, tō niyon̄teg nohohole nivan me hiy kē wo, "!Sol, Sol! ?Nēk ak tōqtōqyeg tō no gōh bahap?"

5 Ba Sol meplu wo, "?Inēk ihē, Welan?"

Tō nohohole nivan lok me hiy kē wo, "Ino Tigsas, a nēk ak memeh tō no anen. 6 Hatig ba van tenenen a lepnō, ba dēyē net vitwag tavasemlō van hiy nēk nahap a nēk so galeg."

7 Ige mey a mavan tiwag tō me mi kē en tig tō nen et hohole geh te. Kēy moyon̄teg naln̄e hohole, ba et etsas te et te. 8 Sol nihatig den nēvētan en, tō so nivalwey namtan, ba kē et etet te. Bastō kēy mētēy namnen, tō tigtēylō kē hay lepnō Damaskus. 9 Tō kē et etet te, et gengen te, wa et in te nēbē bōqōn̄ vētēl.

10 Nitin̄qoy vitwag non Kraēs aē a Damaskus en, nahan Ananias. Tō Welan mohole van hiy kē loqoyqoy so, "!Ananias!"

Tō kē meplu so, "!O-oh Welan, ino agōh!"

11 Tō Welan nivap so, "Van a lēm̄ non Judas, a lemtehal a kēy ōl nahan so ‘Netnenen.’ Ba vēhge net vitwag nahan Sol, a nage Tatarsus. !Ey, kē nitatay! 12 Wa kē metsas loqoyqoy so net vitwag nahan Ananias mavan me hiy kē, tō nim̄ōk namnen apwon, tō so kē nietet lokse."

13 Tō Ananias meplu so, "Welan, woqse et mal kaka vatag me hiy no veg net nan, wa veg bahaphap mey nehet a kē mak tō hiy ige yon̄ nōnōm n̄a Jerusalem. 14 Tō kē mavan me mahē gōh lahan ige pris lililwo tō so tēy ige del mey a ōlōl van lehe."

15 Ba Welan nihole lok van hiy kē so, "!Van! Veg no mal etyak net nan so nivasemlō nahek hiy ige lolqōn̄, tiwag mi ige mayanag lililwo nonoy, wa ige Tisrael se. 16 Tō no mahgēk tavasemlō van hiy kē noyon̄ memeh a kē tavan tēy heylō lehek."

17 Tō Ananias nivan, nihayveg hay lēm̄ nan, tō nim̄ōk namnen apwon Sol. Tō kē vap so, "Ithik Sol, Welan Tigsas mēvētleg no, ikē a maklō kē van hiy nēk a lemtehal. Kē mēvētleg no tō so nēk tetet lokse vēh, wa tōyheg mi Nuvu Yon̄."

18 Vag tiwag ēwē tō nage vitwag qeleso nēvēyn̄ih nisisgoy yak den namtan Sol. !Tō Sol nietet lokse! Tō kē nihatig tō kēy vasugyon̄ kē. 19 Kē musu gengen bah nen en, tō nēhyēn nimaymay lokse.

Kē motog natkelgi tiwag mi ige tin̄qoy a Damaskus. 20 Tō vag tiwag ēwē kē niqtēg toytoy so Tigsas ikē Ēntēn Ḡod a lēm̄ tatay non ige Juw. 21 Ige a moyon̄teg van notoytoy non Sol en, kēy mamamakē aē a nēkēkēn. Tō kēy wo, "Net gōh a makak tōqtōqyeg tō ige dēmtig a lelo vōnō Jerusalem en. !Vaga kē nemyōs so niwuh matmat ige mey a ōlōl nahan Tigsas! Tō kē mavan me gōh so nitēy lokse kēy, tō so van tēy kēy hiy ige pris lililwo bēvēvēg."

22 Tō notoytoy non Pol mavan maymay malig se hag, mak tō so ige Juw et hole gatay site kē aē, veg kē mohole m̄ōleg galsi so Tigsas ikē Kraēs.

23 Lēkle qōn̄ m̄adeg en, tō ige Juw mahay tiwag me tō vonopnog so wuh mat Sol. 24 Ba kē moyon̄teg noyoy nan. Negeay liwo a nevet navan walēg goy napnō nan, tō kēy ēlēltegoy namtegeay ne vōnō vel meyen wa vel anqōn̄, so wuh kē. 25 Bastō anqōn̄ ige tin̄qoy nonon melep kal kē hag legeay, tō mōm̄ōk kē letbey liwo, tō voyoy tēqēl kē how lēvētan.

26 Tō Sol mavan lok me Jerusalem, ba makak etgal so nivan tiwag mi ige tin̄qoy, ba kēy del memtēgteg qēt kē. Veg kēy et dēmtig te kē, aso kē nitin̄qoy non Tigsas en. 27 Ba Banabas memyin̄ kē, tō nilep kē me hiy ige hal. Tō Banabas mavasemlō van hiy kēy qeleave tō Sol metsas Welan a lemtehal, tō atgiy kē motoytoy maymay lahan Tigsas n̄a Damaskus.

28 Bastō Sol mēvēl tiwag me ige dēmtig a lelo vōnō Jerusalem, tō nitoytoy maymay hiy ige sil bohohole non Welan. 29 Vaga, kē nihole maymay, wa nivēyvavaleh tiwag mi ige Juw a kēy hohole mi nagatgat Tikrik. Tō kēy helhel etgal so wuh kē. 30 Ige yathēthēn moyon̄teg en, tō kēy lepyak kē, tō van tēy kē n̄a lepnō Sisaria. Tō kēy mēvētleg m̄ōl lok kē lepnō Tarsus.

31 Tō mahē nen ige tēlēm̄ yon̄ Judea, Kalili, wa Samaria en, kēy motog mi natm̄at wa tateh mētēgteg. Tō Nuvu Yon̄ mak maymay kēy, tō mavasusup kēy. Ige dēmtig mam̄adeg malig se hag, tō kēy nēdēmap galsi Welan.

32 Pita mavanvan walēg lepnō susu non ige Juw wa ige Tasamaria. Tō kē nivan vatēp ige yon̄ non Ḡod a lepnō Lida. 33 Mahē gōh kē metsas net vitwag nahan Ayneas. Ayneas gōh, tekel taqn̄ēn namat, tō kē men letno tamge nonon bēte levetēl. 34 Tō Pita nivap van hiy kē so, "Ayneas, Tigsas Kraēs nivaēh nēk. Hatig ba lokveg natamge nōnōm."

Tō vag tiwag ēwē Ayneas niyow hatig. 35 Tō ige sil del n̄a Lida metsas so Ayneas mēwē lok, tō kēy muwulyis van hiy Welan. Wa tō ige a loprovēns Saron se.

36 Ba hay lepnō Jopa en, nitin̄qoy vitwag aē a nalqōvēn. Nahan Tabita, ba kēy ōlōl kē so Dokas lagatgat Tikrik. Vaga kē nōyheg mi namgumgu mey nēwē wa nimyin̄ tasga ige m̄asay. 37 Lamahē nen nogom maqal kē, tō kē mamat. Kēy musuwsuw nataqn̄ēn, wa melveteg kē hag lelo din vitwag a lēm̄ alge.

38 Ba Lida sisqet Jopa, tō ige tin̄qoy moyon̄teg so Pita a Lida. Bastō kēy mēvētleg yoge vōyō so vangoy kē. Tō kōyō mavap van hiy Pita so, "!Van ēgē me hiy kemem!"

39 Tō Pita mahatig, madam kōyō, mēdēn̄ me vētmahē nen. Tō kēy van tēy kē lidin nan. Tō ige lōqōvēn nay mitig walēg Dokas wa ten̄ten̄. Tō kēy mavasem van hiy Pita nahap a kē mususuy geh tō, mahē a kē laptō tiwag mi kēy.

40 Tō Pita mōvōylōlō kēy, tō kē nivatiqaw, wa nitatay. Tō kē met van hiy nataqn̄ēn tō nivap so, "!Tabita, hatig!"

Tō Dokas mavalwey namtan, metsas Pita, tō nihag ketket. 41 Tō Pita nitēy namnen wa lep hatig kē. Tō Pita niōlōl tiwag me ige yon̄ wa ige nay, tō vasem van hiy kēy so Dokas mēh lok.

42 Tō noyoy ne age gōh maga vel mahē del Jopa, tō woqse et mēdēmtig Welan. 43 Me atgiy en, Pita motog nusuvay misin n̄a Jopa, lēm̄ nonon net vitwag nahan Simon. Kē net batagtaghiy nipni bōlōk.