1 Mahē kemem mukēg veteg kēy en, tō kemem yem labaklap tō gam. Kemem mahatig en magam togolgol nowmat a lepnō Kos. Tō taval meyen kemem dēn̄ me lepnō Rodes. Kemem ukēg veteg Rodes tō van Patara. 2 Mahē gōh, kemem metsas nabaklap vitwag so nivan Fonisia. Tō kemem yem lok van labaklap nen tō van. 3 Kemem magam sisqet van napnō Sayprus. Kemem etet napnō Sayprus a lok hiy nalo yoy, tō kemem gam tasga lok hiy loprovēns Siria. Kemem mēvēykal natkelgi van lepnō Taya en, veg ige labaklap en so heh yak yatkel haphap a lepnō nan en.

4 Kemem metsas ige tin̄qoy yatkelgi van Taya en, tō kemem motog mi kēy nōqōn̄ liviyō. Tō kēy vap van hiy Pol heylō Nuvu Yon̄ so kē nitog vanvan qete Jerusalem. 5 Nōqōn̄ liviyō nibah en, tō kemem so van tasga lokse lemtehal nonmem. Tō kēy del mitiok kemem, kēy tiwag mi ige lōqōvēn wa ige nētnētm̄ey se. Kēy van yak den napnō liwo nan tō van dēn̄ ale. Tō kemem del vatiqaw hōw lēvēthiyle nen tō tatay. 6 Kemem matatay bah en, tō vap tata van hiy kēy tō yem lokse labaklap, tō ige dēmtig nen m̄ōl.

7 Kemem lep lokse namtehal nonmem den Taya tō gam dēn̄ me Potolemays. Kemem melep bah nohohole tamtam van hiy ige dēmtig van nen en, tō motog mi kēy nōqōn̄ vitwag. 8 Taval meyen kemem mahatig tō gam dēn̄ Sisaria. Tō Filip mokokm̄egoy kemem lēm̄ nonon. Filip en, kē net bavavasemlō noyoy ēwē, wa am̄ag, ikē vitwag den ige buliviyō bohoghog gengen n̄a Jerusalem.✝ Tō kemem motogtog tiwag mi kē. 9 Ige m̄alm̄al nonon bulvet a et leg geh qete, kēy ige belgēlgēg.

10 Kemem motog bah nōqōn̄ m̄adeg en, tō net vitwag nivan tēqēl me den Judea. Kē net belgēlgēg, nahan Agabus. 11 Kē mavan me hiy kemem tō nilepyak nogoytig nonon Pol. Tō kē mēlēg namnen tiwag mi nayn̄on mahgen aē ba mavap so, "Nuvu Yon̄ mavap so, ‘Ige lililwo Tujuw van Jerusalem tēyēt namne et benon goytig gōh qeleanen, tō kēy tōm̄ōk kē van lemnen ige mey a et Juw te.’ "

12 Kemem moyon̄teg van noyoy gōh en, tō kemem tiwag mi ige sil Tisisaria me helhel etgal so gatgoy so Pol nitog vanvan Jerusalem. 13 Ba amtan Pol wo, "?Bahap tō kimi ten̄ten̄ me so ak lolwon no qelegōh? No nētēymat so kēy so lēg no Jerusalem. !Wa no nētēymat so matwēl nahan Welan Tigsas!"

14 Veg kē et leh te nēdēmdēm nonon, tō kemem mukēg veteg qelenen, ba mavap so, "Itōk so namyōs non Welan niaktig."

15 Kemem motog natkelgi se bah en, tō tēytēymat so van hag Jerusalem. 16 Yatkel tin̄qoy Tisisaria madam kemem. Tō kēy mavantēy kemem a lēm̄ non Nason. Nason gōh nage Tasayprus, ikē nitin̄qoy non Tigsas a nēte. Tō kemem memtiy lēm̄ nonon.

17 Mahē kemem dēn̄ me Jerusalem en, tō ige yathithik wa yatētētek melep vasgēt kemem mi namlaklak. 18 Taval meyen Pol mavan vatēp Jemes, wa tō kemem tiwag mi ige qēt ēm̄ yon̄ del Tejerusalem. 19 Tō Pol mohole malaklak van hiy kēy, tō nikaka m̄ōleg van hiy kēy nahap a Ḡod mak tō van hiy ige mey a et Juw te heylō namgumgu namun.

20 Kēy moyon̄teg van qelenen, tō kēy ōliwo Ḡod aē. Tō kēy vap van hiy Pol so, "Ithimem, nēk nēglal so ige Juw tey vag vēh a mal dēmtig Tigsas, tō kēy del natatag galsi Nele non Mosis. 21 Tō kēy moyon̄teg so nēk mavap van hiy ige Juw a mey a tog tiwag tō mi ige mey a et Juw te en so ukēg veteg Nele non Mosis. Kēy moyon̄teg so nēk mavap van hiy kēy so nitog so tep vēglal ige nētnētm̄ey nonoy, bastō so nitog tatag van nēvēnangēn. Tō noyoy galgal gōh tiple ak so ige sil dēmdēm hethet veg nēk.

22 "?Tō gēn tak qeleave? Veg noyoy taga vel mahē so nēk mal dēn̄ me. 23 Ba itōk so nēk ak qelegēn: Net vēvet nongēn mal vatvat van hiy Ḡod bagaygay mamah. 24 Mahē nagaygay mamah so nibah, itōk so nēk tig tiwag mi kēy mahē a kēy ak wenwen tō sisiy qas nēlēy. Tō nēk temyin̄ kēy mi nēsēm bahaphap nan. Sowle, gēn ak qelegōh en, tō ige sil tet vēglal so noyoy veg nēk et hēywē te, ba nēk nadam galsi Nele non Mosis.

25 "Ba veg ige dēmtig mey a et Juw te en, kemem mayap tō neletes van hiy kēy so nitog gengen nēphog mey a kēy molol tō van hiy ḡod galgal, nitog gengen naday, nitog gengen nēphog mey a naday aē, wa nitog legleg solosloteg."

26 Bastō taval meyen Pol melep ige bulvet gōh, tō kē niak wenwen kē tiwag mi kēy. Tō Pol nihayveg hay Litiy Ēm̄ Bolol non ige Juw so nim̄ōk nōqōn̄ tenenen mey a kēy telep van namlay vivitwag so olol aē, mahē a kēy ak wenwen bah.

27 Sisqet nōqōn̄ liviyō nibah, yatkel Juw Tesia metsas Pol Litiy Ēm̄ Bolol. Tō kēy ak tēqtēqyeg ige sil, tō tēy maymay Pol. 28 Tō kēy ōlōl so, "!Yēhē Tisrael, atmi van me biyin̄ kemem! Net gōh, kē a mitig tavale tō tiwag mi ige Tisrael, bastō Nele non Mosis wa Nēm̄ Bolol nongēn. Kē mavanvan tō vel mahē tō nivatvatne ige sil bahaphap mey a et tatag te Nele. !Tō entōgōh, kē mal lep batbat me ige Tikrik lelo Ēm̄ Bolol nongēn tō mak solosloteg vētmahē yon̄ agōh!" 29 Kēy mavap qelegōh veg am̄ag kēy metsas tō Trofimus tiwag mi Pol a Jerusalem. Trofimus nage Tefesas. Tō kēy mēdēmdēm so Pol melep bat tō kē van lelo Ēm̄ Bolol, ba et hēywē te.

30 Ige sil del a Jerusalem en moyon̄ ninhet qēt aē, tō kēy valaplag hay lelo Ēm̄ Bolol tō tēy maymay Pol tō yap lō kē den Nēm̄ Bolol. Tō kēy tabegoy namte Ēm̄ Bolol. 31 Ige nen so wuh mat Pol wah. Tō net liwo goy ige bepgapgal non ige Torom yon̄teg so nēvēygēl liwo wow tō a lepnō. 32 Tō kē nihatig tō nilep ige yowyowveg tiwag mi ige bepgapgal nonon, tō kēy gityak tēqēl how hiy ige sil. Ba mahē a ige sil metsas van net liwo tiwag mi ige bepgapgal en, tō kēy ukēg kē den vēvēhyuw mi kē.

33 Tō net liwo nan mētēy Pol, tō nivap hiy ige bepgapgal so lēg maymay kē mi nējēn vōyō. Tō net liwo mēvēhge ige sil so kē nahan et wa kē mak nahap mey nehet. 34 Tō nēvēwti a taq tō en, kēy ōlōl bege tegtegha. Veg bohohole solosloteg tiwag mi naln̄e ōlōl tawtaw nen en, net liwo et lep hōn te nēdēmdēm tenenen. Bastō kē nivap van hiy ige bepgapgal so van tēy Pol n̄a lēm̄ nonoy. 35 Kēy van dēn̄ me natamlaglag a lemte ēm̄ en, ba ige sil nemyōs lepgetō so vēhyuw mi Pol. Ba ige bepgapgal tigoy Pol, tō hah ketket kē so lep bat kē lelo ēm̄. 36 Veg ige sil a damdam tō kēy en, kēy ōlōl tawtaw so, "!Wuh mat kē!"

37 Tō sisqet so kēy so lep bat Pol hay lēm̄ nonoy wah, kē nihole van hiy net liwo en wo, "?No tavap te hap vēh van hiy nēk?"

Ba net liwo nivap van hiy kē wo, "?Ey, nēk hohole mi nagatgat Tikrik? 38 Nok dēm so nēk nage Titsip, so inēk a meqtēg tō natvale tiwag mi kapman, tō melepyak ige teyvag vet buwuwuh et tō mitig helem̄ag kēy lepnō vadalm̄eg en."

39 Tō Pol meplu goy so, "Ō-ō-ō, ino Nujuw, nage Tarsus a lepnō Silisia. Ino nage telepnō mey a nēwē anen. ?Itōk so nok hole tusu van hiy ige sil?"

40 Tō net liwo mukēg Pol so nihole. Pol nitig kal hag natamlaglag en, tō kē niak nēvēglal mi namnen so ige sil so togtog yon̄. Mahē ige sil mataq yoyon̄ en, tō Pol niqtēg hohole van hiy kēy mi nagatgat Tujuw.