1 !Yēhē yantintik, nok yap neletes gōh van hiy kimi tō so kimi tit gengenyeg te! Ba so ihēte wo me gengenyeg en, net vitwag aē a so nitig leh gēn van hiy Namam. Ikē Tigsas Kraēs, mey a kē netnenen. 2 Tō namatmat nonon matamgoy negengenyeg nongēn. Ba et gengenyeg nongēn vēlēs te, ba non ige sil del telemyam.

3 Mi megōh en, gēn tēglal aē so gēn nēglal Ḡod, sowo gēn dam nele nonon. 4 Ihēte a nivavap so, "No nēglal kē," ba kē et dam te nele nonon en, ikē net galgal, tō nēhēyhēywē tateh mi kē. 5 Ba ihēte a nitatag nohohole non Ḡod en, nitiy tamtam non Ḡod hay alon mi kē. Mi megōh gēn nēglal aē so gēn nuqultiwag mi kē. 6 Ihēte a nivavap so kē niqultiwag mi Ḡod, kē mas vanvan qeleso Tigsas nivanvan.

7 Yēhē yaplupluk, nok et yap te van hiy kimi nele gayaq vitwag, ba nele a kimi mal yon̄teg vatag tō am̄ag, a kimi melep tō beqtēqtēg yon̄yon̄teg ne Yoy Ēwē. Nele tam̄ag nan en, navatvatne a kimi moyon̄teg tō. 8 Ba nele a nok yapyap van hiy kimi gōh en, nele nan negyaq se. Nele nan en, namtevun Kraēs mavasemlō so nele netnenen, wa namtevumi nivasemlō se so nele netnenen, veg togtōkē namlēglēg niqleqlen̄ den kimi, wa nitiy meyeyen nihin̄yeg me.

9 Ihēte a nivavap so kē notog lemyeyen, ba kē et buste ēthēn wa tētan en, net nen notog lapgetō lemlēglēg. 10 Net a natam ēthēn wa tētan en, kē notog lemyeyen, tō tateh hap a tak sisgoy kē. 11 Ba net a et buste ēthēn wa tētan en, kē notog lemlēglēg, tō kē nivanvan lemlēglēg, tō kē et ēglal te so kē nivanvan lō ave, veg namlēglēg ne bug mak matbē namtan.

12 Yēhē yantintik, nok yap neletes gōh van hiy kimi

veg Ḡod mal dēmveteg negengenyeg nonmi heylō Tigsas Kraēs.

13 Yēhē kimi ige imam, nok yap van hiy kimi

veg kimi mal ēglal kē mey a mal tog yak tetō me mahē a namyam tateh qete.

Yēhē lōmlōmgep, nok yap van hiy kimi

veg kimi mal lalaket goy Nuvu Het*.

14 Yēhē yantintik, nok yap van hiy kimi

veg kimi nēglal Imam.

Yēhē kimi ige imam, nok yap van hiy kimi

veg kimi mal ēglal im̄ey a kē mal tog yak tetō me mahē a namyam tateh qete.

Yēhē lōmlōmgep, nok yap van hiy kimi

veg kimi namaymay,

wa veg nohohole non Ḡod notog hay letqami,

wa veg kimi may lalaket goy Nuvu Het.

15 Atmi nitog tamtam namyam wa nahaphap van alon en. So net wo nitam namyam en, tō natamtam non Imam tateh mi kē. 16 Veg vel haphap het del van lelo mayam en et van te me den Imam, ba nivanvan me den namyam. Nahaphap nan qelegēn: net nimyōs kokoym̄eg nahaphap het a nataqn̄ige nemyōs, wa kē niwowowhiy vel haphap a kē nietet mi namtan, wa kē nidēmyak kē so kē nam̄ye haphap. 17 Ba namyam gōh tiwag mi vel haphap a ige wowowhiy en, kēy teqleqlen̄ qēt. Ba net a niak tatag namyōs non Ḡod en, kē totogtog lap.

18 Yēhē yantintik, babah ne qōn̄ mal nognog me. Qele a kimi moyon̄teg so natvale non Kraēs tavan me, tō ige tavale m̄adeg may van me. Bastō gēn nēglal so nōqōn̄ mal nognog me. 19 Kēy mavan me den nēvēwti nongēn, ba kēy et tiy viwti nongēn te. Veg, so kēy wo nitiy viwti nongēn en, tō kēy totog lap lavatvatne nongēn. Ba mahē a kēy mavanyak den navatvatne nan en, tō kēy mavasemlō so kēy del et viwti nongēn te.

20 Ba veg kimi en, Ḡod mey Noyon̄ mal tan̄ōp kimi mi Nuvu Yon̄, wa kimi del nēglal nēhēyhēywē. 21 Nok yap van hiy kimi, et veg te so kimi et ēglal te nēhēyhēywē, ba veg kimi nēglal nēhēyhēywē. Wa veg kimi nēglal so tateh galgal nivan me den nēhēyhēywē.

22 ?Ba net bagalgal en, ihē? Ikē net a nivavap so Tigsas et Kraēs te. Net nan, ikē natvale mi Kraēs, wa kē nitiayak Namam tiwag mi Nintigi. 23 Ihēte a nitiayak Nintigi en, kē et qultiwag te mi Namam. Ba ihēte a lep vasgēt Nintigi en, kē nuqul tiwag se mi Namam.

24 Navatvatne a kimi moyon̄teg vatag tō leqtēqtēg en, atmi ak so navatvatne nan nitog lelo taqami. Navatvatne a kimi moyon̄teg tō leqtēqtēg en, so kē wo notog hay mi kimi en, tō kimi nuqultiwag mi Nintigi wa mi Namam. 25 Tō m̄eygōhkē nahap a kē mavatvat tō me hiy gēn, ikē nēh lap.

26 Nok yap neletes gōh hiy kimi veg ige vatvatgo het tiple gal kimi. 27 Ba Ḡod mal tan̄ōp kimi mi Nuvu Yon̄, tō Nuvu nivatvatne kimi bevel haphap del. Kimi tit mōyōs se vēhte net bavatvatne. Navatne non Nuvu Yon̄ en, kē nēhēyhēywē vēlēs, tō et galgal te. Tō qele Nuvu mal vatne kimi aē en, atmi qultiwag mi kē.

28 Bastō yēhē yantintik, qultiwag lap mi Kraēs, tō so, mahē a kē niaklō kē en, gēn titig lalaket qēt vēh, ba tit mamayge vēhte lengon mahē a kē nivan me. 29 Veg kimi nēglal so kē netnenen, tō kimi nēglal se so ihēte a niakak nage mey netnenen en, kē mowot me den Ḡod.