1 Yēhē yaplupluk, nitog dēmdēmtig van vel vatgo, ba helet etgal vel vatgo del, tō so ēglal so kēy mavan me den Ḡod si so tateh. Veg ige lēgēlgēg galgal m̄adeg mal van vel mayam. Navatgo mey netnenen, kē nihole mi naman ne Vu Yon̄, ba navatgo mey nehet, kē nihole mi naman ne vu het. 2 Igōhkē qeleave gēn so ēglal navatgo a nihole mi Nuvu non Ḡod, vel vatvatgo a nivatne so Tigsas Kraēs mavan me mi nataqn̄i et en, navatgo nan mavan me den Ḡod. 3 Ba vel vatvatgo a nivatvatne galgal veg Tigsas en, navatgo nan et van te me den Ḡod. Navatgo qelenen nivanvan me den natvale non Kraēs. Kimi mal yon̄teg am̄ag so kē tavan me en, ba kē mal van me lemyam ēgēn.

4 Yantintik, kimi tiwag mi Ḡod, tō kimi mal lalaket goy ige tavale, veg ikē mey a nuqultiwag mi kimi en, kē nitiy ketket yeh den nuvu het a notog lemyam. 5 Ige vatvatgo het en, kēy ige telemyam. Ba veg kēy ige telemyam en, nohohole nonoy telemyam, tō ige sil telemyam toyon̄teg kēy.

6 Ba igēn non Ḡod. Tō net a nēglal Ḡod en, kē toyon̄teg gēn; net a et non Ḡod te en, kē tit yon̄teg vēhte gēn. Veg bege nan en, gēn tet vēglal vēh navatgo mey a nēhēyhēywē wa navatgo galgal.

7 Yēhē bulbulsal, gēn so vēy tamtam gēn, veg natamtam en nivanvan me den Ḡod. Tō ihēte a nitamtam en, kē mowot me den Ḡod, wa kē nēglal Ḡod. 8 Ihēte a et tamtam te en, kē et ēglal te Ḡod, veg Ḡod en natamtam.

9 Igōhkē natamtam non Ḡod, a kē maklō kē me hiy gēn, Ḡod mēvētleg me Nitiy Ēntēn lemyam tō so gēn tētēy vēh nēh lap heylō kē. 10 Igōhkē natamtam, et ak te so gēn matam Ḡod, ba Ḡod matam gēn, tō mēvētleg me Ēntēn so nimat tō so nitamgoy nubug nongēn. 11 Yēhē bulbulsal, veg Ḡod natam gēn qelegōh, tō igēn se so togtog vēy tamtam gēn.

12 Net vitwag tit et hōn qete Ḡod, ba so gēn wo vēy tamtam gēn en, tō Ḡod tuqultiwag mi gēn, wa nitiy tamtam non Ḡod aē mi gēn. 13 Igōhkē qeleave gēn tēglal so gēn nuqultiwag mi kē wa kē nuqultiwag mi gēn, veg kē mal lep me Nuvu nonon hiy gēn.

14 Nahap a kemem metgeh tō en, kemem vasemlō van hiy kimi, so Imam mal vētleg me Ēntēn so nivaēh ige sil telemyam.✝ 15 Ihēte a nivasemlō so Tigsas, ikē Ēntēn Ḡod en, Ḡod nuqultiwag mi kē, wa kē nuqultiwag mi Ḡod. 16 Tō gēn nēglal wa dēmtig natamtam non Ḡod veg gēn. Ḡod en, ikē natamtam. Net a natamtam vaga aē mi kē en, kē nuqultiwag mi Ḡod, wa Ḡod nuqultiwag mi kē.

17 Igōhkē qeleave natamtam nongēn nivan me nitiy tamtam, so gēn qele Tigsas lemyam agōh. So gēn wo qelegōh, tō gēn titig lalaket vēh lōqōn̄ a Ḡod nivēvēg ige del. 18 Tō nēvēvēg nuqul tiwag mi namtēgteg. Bastō namtēgteg tit qultiwag vēhte mi natamtam. Ba nitiy tamtam tōvōy yakyak namtēgteg. Tō net a nimtēgteg nēvēvēg en, nitiy natamtam tateh mi kē.

19 Gēn tamtam veg Ḡod matam tō gēn am̄ag. 20 Net vitwag wo mavap so, "No natam Ḡod," ba kē et buste ēthēn en, tō kē nigalgal ēwē. Veg net a et tam te ēthēn mey a kē netgeh kē en, kē tit tam vēhte Ḡod mey a kē et etsas te kē. 21 Igōhkē nele a kē melep tō kē me hiy gēn en, net a nitam Ḡod en, kē so nitam se ēthēn.