1 Ihēte a nēdēmtig so Tigsas ikē Kraēs en, net nan mowot me den Ḡod. Tō ihēte a nitamtam Namam en, kē nitamtam se nēnētm̄ey a mowot me den kē. 2 Igōhkē qeleave gēn so ēglal so gēn tamtam ige yantēntēn Ḡod, tō gēn tam Ḡod wa ak tatag nele nonon. 3 Veg gēn tam Ḡod qelegēn, gēn dam nele nonon. Tō nele nonon et meh te so tatag. 4 Veg ige del a mowot me den Ḡod en, kēy nalalaket goy namyam gōh. Tō gēn lalaket goy namyam mi nēdēmtig nongēn. 5 ?Tō ihē nilalaket goy namyam? Ige ēwē a nēdēmtig so Tigsas ikē Ēntēn Ḡod.

6 Ikē mavan me heylō nēbē wa naday, ikē Tigsas Kraēs.* Kē et van heylō te nēbē ēwē, ba heylō nēbē wa naday. Tō Nuvu Yon̄ nivasemlō kē, veg Nuvu en nēhēyhēywē vēlēs. 7 Tō nage wōy vētēl nivasemlō kē: 8 Nuvu wa nēbē wa naday. Tō nēdēmdēm vētēl gōh en, ikē vitwag woy.* 9 Nage wōy vētēl gōh en, Ḡod melep van so nivasemlō Ēntēn. Veg gēn yon̄yon̄teg net nivasemlō nahap vitwag en, bastō gēn so yon̄teg Ḡod se mahē kē nivasemlō se nahap vitwag, veg nohohole non Ḡod nitiy ketket yeh den nohohole non net. 10 Net a nēdēmtig Ēntēn Ḡod en, Nuvu non Ḡod nitog hay mi kē so nivasemlō nēhēyhēywē. Net a et dēmtig te Ḡod en, kē nivap so Ḡod en nagalgal, veg kē et dēmtig tē nahap a Ḡod mavasemlō veg Ēntēn. 11 Tō igōhkē nahap a Ḡod mavasemlō en, so Ḡod melep me nēh lap hiy gēn, tō nēh gōh mi Ēntēn. 12 Net a nitēy goy Ēntēn en, kē nitēy nēh; net a et tēy goy te Ēntēn Ḡod en, kē et tēy te nēh.

13 Nok yap neletes gōh van hiy kimi tō so kimi tēglal vēh so kimi nētēy nēh lap, kimi a nēdēmtig lahan Ēntēn Ḡod en. 14 M̄eygōhkē gēn nēglal m̄ōleg veg Ḡod, so gēn wo vēhge nahap te mey a tatag van namyōs nonon en, kē toyon̄teg gēn. 15 Bastō, gēn wo ēglal so kē noyon̄teg gēn bēvēvēhge nongēn, tō gēn ēglal so gēn mal lep nahap a gēn mēvēhge tō den kē.

16 So net vitwag wo met ēthēn wo mak negengenyeg a et bamatmat te, itōk so kē nivēhge Ḡod veg ēthēn. Tō Ḡod so nilep nēh van hiy ēthēn a negengenyeg nonon et bamatmat te. Negengenyeg aē mey a totot yak vēh natalege den nēh non Ḡod. Nok et vap gatay te begengenyeg nan, so kē nitatay veg. 17 Natawye haphap het del a net niakak en, ikēy negengenyeg, ba negengenyeg aē mey a et bamatmat te.

18 Igēn nēglal so ige del a mowot me den Ḡod en, kēy tit togtog vēhte legengenyeg. Tō Ēntēn vitwag woy a mowot me den Ḡod en, kē netgoy kēy. Ba Im̄ey nehet a Satan en, kē tit tan̄qal vēhte kēy. 19 Gēn nēglal so igēn ige non Ḡod, ba ige del telemyam en, kēy notog laln̄an Im̄ey a Nehet. 20 Tō gēn ēglal so Ēntēn Ḡod mavan me tō melep me nololmeyen, ak tō so gēn ēglal kē mey a nēhēyhēywē. Tō gēn nuqultiwag mi kē mey a nēhēyhēywē, tō nuqultiwag mi Ēntēn a Tigsas Kraēs. Ikē nitiy Ḡod wa nēh lap.

21 Yēhē yantintik, atmi etgoy galsi kimi den ige ḡod galgal.