1 !Atmi et nam̄e tamtam a Imam melep me, a kē niōlōl gēn so yantēntēn Ḡod! Tō gēn agōh. Ba ige sil telemyam et ēglal te gēn. Namanig nan, veg kēy et ēglal te kē.

2 Yēhē bulbulsal, togtōkē igēn yantēntēn Ḡod. Et m̄ōleg qete so gēn tavan me qeleave. Ba gēn nēglal so, mahē Kraēs nivan lok me en, gēn tavan me qele ikē, veg gēn tet galsi vēh so kē qeleave. 3 Tō ige del a mōm̄ōk nēdēmdēm nonoy so kēy van me qele Kraēs en, kēy ak so namtevuy niwenwen qeleso kē newenwen.

4 Ba ige del a akak negengenyeg en, kēy helhel nele, veg negengenyeg en, ikē nehelhel le. 5 Tō kimi nēglal so Kraēs mal van me so nilepyak natawye gengenyeg del, tō tateh gengenyeg mi Kraēs. 6 Ihēte a nuqultiwag mi kē en, kē tit tog vēhte legengenyeg. Ba ihēte a notog legengenyeg en, kē et et temun te Kraēs, wa kē et ēglal te kē.

7 Yēhē yantintik, etgoy net tiple gal kimi bemtehal ne gengenyeg. Net a niakak nage mey netnenen en, kē netnenen qele a Kraēs netnenen. 8 Ba net a niakak mey nehet en, ikē net non Satan, veg Satan mal gengenyeg den naqtēqtēg ne mayam. Veg bege gōh Ēntēn Ḡod mavan me, so niak sisgoy namgumgu namun Satan. 9 Ihēte a mowot me den Ḡod en, kē et tog te legengenyeg, veg kē melep tatag namtevōn Imam. Kē tit tog vēhte legengenyeg veg kē mowot me den Ḡod. 10 Gēn tet vēglal vēh so ige yantēntēn Ḡod ave, wa ige yantēntēn Satan ave. Veg net a et akak te nage mey netnenen, wa tō net a et tam te ēthēn en, ikē et ēntēn Ḡod te.

11 Veg igōhkē nahalses a kimi moyon̄teg tō me leqtēqtēg, gēn so vēy tamtam gēn. 12 Nitog akak qele Ken, a kē net non Satan wa muwuh mat ēthēn.✝ ?Tō Ken muwuh mat kē bahap? Veg nēmētwun nehet, ba nēmētwun ēthēn netnenen. 13 Yēhē yathithik wa yatētētek, sowo ige et telemyam et buste kimi, tō kimi nitog mamakē aē.

14 Gēn ēglal so gēn mavayak den lamatmat, hiy nēh, veg gēn tamtam ige yathēthēngēn wa yatētētangēn. Net a et tamtam te en, kē notogtog lap lamatmat. 15 Ihēte a et buste ēthēn en, kē qeleso net buwuwuh mat et. Tō kimi nēglal so net buwuwuh mat et en, tateh ēh lap mi kē. 16 Nitiy tamtam qelegēn; Tigsas Kraēs mōm̄ōk hiy how nēh nonon hiy gēn. Tō gēn se so m̄ōk hiy how nēh nongēn hiy ige yathēthēngēn. 17 ?So net vitwag wo nam̄ye haphap telemyam, tō kē nietsas ēthēn a nemgamgaysēn, tō kē et et lolwē te kē, tō qeleave veg kē? ?Natamtam non Ḡod aē mi kē si tateh?

18 Yēhē yantintik, gēn nitog tamtam mi nohohole si nan̄yege ēwē, ba mi namgumgu wa mi nēhēyhēywē.

19,20 Mahē gēn tamtam hēywē ige tegha, gēn nēglal so gēn ige non Ḡod a Nēhēyhēywē. Mahē a gēn yon̄teg me hiy gēn so nalo taqangēn et tenenen te lengon Ḡod en, itōk so gēn dēmsas so gēn ige non Ḡod. Tō nēdēmdēm gōh tak muhuy nalo taqangēn. Veg Ḡod nilwo den nalo taqangēn, wa kē nēglal nahaphap del.

21 Ige yaplupluk, sowo namhuy aē lelo taqangēn, tō gēn tit mētēgteg vēhte so van me lengon Ḡod. 22 Tō gēn lep den kē nahap te a gēn vēhge, veg gēn tatag nele nonon, wa ak nage a kē nimlaklak aē. 23 M̄eygōhkē nele nonon, gēn so dēmtig nahan Ēntēn Tigsas Kraēs, wa gēn so vey tamtam gēn, qele a Kraēs mōlvayēg tō me hiy gēn. 24 Net a nitatag nele nonon en, kē nuqultiwag mi Ḡod, wa Ḡod nuqultiwag mi kē. Igōhkē qeleave a gēn so ēglal so Ḡod nuqultiwag mi gēn, veg Nuvu a kē melep tō me hiy gēn.