Namgumgu Namun Ige Hal 4

Pita kōyō Jon nitig lengo Kansel Sanhedrin bēvēvēg

1 Mahē Pita kōyō Jon hole laptō hiy ige sil wah, ige lililwo van me hiy kōyō. Kēy ige pris, tiwag mi ige bēlēltegoy Tiy Ēm̄ Bolol, wa ige Sadusi.*4:1 Ige Sadusi en, ikēy napati vitwag non ige Juw. Kēy et m̄adeg te qeleso Nafarisi, ba ige et lililwo m̄adeg en, kēy ige Sadusi. Vaga kēy vagal mi ige Farisi. Ige Sadusi nēdēmtig so mahē net so nimat en, kē tit hatig lokse vēhte. Tō kēy dēmtig so tateh in̄sel, wa tateh vu geh lemyam. 2 Kēy mololgagay veg ige hal motoytoy gatay Tigsas hiy ige sil. Veg kōyō motoytoy so mahē Tigsas mamat wa mēh lokse en, kē mak namtehal hiy ige sil so tētēy vēh nēh lap. 3 Tō kēy mētēy kōyō. Ba veg sisqet mahē niqōn̄ en, kēy mōm̄ōk bat kōyō lēm̄ yētyēt mēdēn̄ taval meyen. 4 Ba nam̄adeg den ige sil mey moyon̄teg noyoy, kēy mēdēmtig, tō qul tiwag ige non Tigsas. Bastō ige non Tigsas en, kēy van me teyvag tēvēlēm (5,000).

5 Taval meyen nan hag, ige lililwo Tejerusalem mahay tiwag bōyōstiwag nonoy. Ikēy ige mayanag, ige tamatmayge bitigtig helem̄ag, wa ige vatvatgo ne Le. 6 Tō Anas se, a kē nam̄agoy ige pris, tiwag mi Kayafas, Jon, wa Aleksanda, tiwag mi yatkel et se den niginwotwot non ige pris. 7 Kēy del mōyōstiwag so vēvēg Pita kōyō Jon. Tō kēy mēvētgiy kōyō van lēvētnay ba vēvēhiy kōyō, wo "?Lahan maymay wa lahan hē kōmyō magaleg qelenen?"

8 Pita nōyheg mi Nuvu Yon̄, ba mavap van hiy kēy so, "!Yēhē ige mayanag wa ige lililwo! 9 Sowo kimi helet etgal kamyō so qeleave tō kamyō mak namgumgu mey nēwē van hiy net quyus gōh, wa tō so qeleave nayn̄on mēwē lokse, itōk. 10 Atmi del yon̄teg galsi, wa ige del Tisrael se. Net gōh, kē nitig lengomi tō kē mēwē heylō lahan Tigsas Kraēs Tanasaret, mey a kimi mowos lowolwol, ba Ḡod mavaēh lok kē den namatmat. 11 Tigsas en, ikē

‘nahan̄ vet mey a kimi bētēytēy ēm̄ mepsipteg tō en,

tō kē may van me nam̄e han̄.’✝4:11 Psalm 118:22

12 "Kē mahgen tavaēh vēh net, veg tateh hah tegha se a Ḡod melep van so vaēh net aē."

13 Kēy met van so Pita kōyō Jon et hiyey te, tō kēy met vēglal so kōyō et sukul galsi te, tō kēy mamakē bololmeyen nōyō. Tō kēy met vēglal so kōyō motog tiwag tō mi Tigsas. 14 Kēy nemyōs so et hethet kōyō, ba kēy met vēglal net a mēwē lokse nitig tiwag mi kōyō en, tō tateh hap se so kēy so vap.

15 Tō kēy m̄ōk lō kōyō den nōyōstiwag, tō kēy vonopnog veg kōyō. 16 Kēy vēy vēvēhiy lokse kēy wo, "?Gēn tak qeleave hiy yoge gōh? Veg nisil del Tejerusalem mal ēglal so kōyō mak naphah mey nitiy wē, tō gēn tit lēn̄lēn̄teg vēhte. 17 Ba noyoy gōh tiple ga vētmahē del. Itōk so gēn gatgoy kōyō so nitog hohole nowmat se lahah agōh."

18 Tō ige lililwo ōlōl kōyō tō mōlgontegoy kōyō so nitog hohole gatay lokse wa nitog vatvatgo lahan Tigsas. 19 Ba Pita kōyō Jon meplu goy kēy so, "?Kimi dēmdēm van qeleave, itōk so kamyō yon̄teg kimi si so yon̄teg Ḡod? 20 !Kamyō tit tēygoy vēhte nahap mey a kamyō met wa moyon̄teg tō!"

21,22 Tō kēy soksok lēlēge namtehal a so tēvēvēg vēh kōyō aē, veg ige sil ōliwo Ḡod bephah nan. Veg net a Ḡod mavaēh kē en, nēte nonon mal lege son̄wul vet. Bastō kēy mēvēgsoy kōyō, tō ukēg kōyō.

Natatay non ige mey a nēdēmtig Tigsas

23 Mahē ige m̄agoy ige pris tiwag mi ige lililwo mukēg taywah Pita kōyō Jon en, tō kōyō van lok hiy ige nonoyō. Tō kōyō vasemlō nohohole del nonoy.

24 Ige nonoyō moyon̄teg en, tō kēy mahay tiwag me tō kēy ōlōl van hiy Ḡod, so "Welan, nēk mitin̄ tō nōtōq, nēvētan, nanaw, wa nahaphap del van aē en. 25 Nēk mohole tō heylō leplan Devēt, net mugumgu nōnōm wa bōbō nongēn. Nēk melep me nohohole gōh heylō Nuvu Yon̄, so

‘?Bahap tō ige lolqōn̄ lolgagay hiy Ḡod,

tō ige sil vonopnog yeghuquy ēwē?

26 Ige mayanag telemyam tēymat so vagal,

tō ige lililwo mahay tiwag me

so tavale mi Welan,

wa mi Kraēs nonon.’✝4:26 Psalm 2:1-2

27 "Hēywē, Herod tiwag mi Pontus Paelat mahag tiwag mi ige mey et Juw te, wa tiwag mi ige sil Tisrael. Tō lelqelqevōnō gōh en, kēy mepnog so tavale mi net mugumgu yon̄ nōnōm, Tigsas, a nēk matan̄ōp tō kē, so ikē Kraēs. 28 Ba nahap a nēk mēdēm vasig tō mi navak nōnōm en, kēy malaylay.

29 "Togtōkē, nēk et galsi van hiy ige lililwo a kēy tig het tō kemem gōh. !Ḡod, vaphiy maymay kemem ige mugumgu nōnōm so tig netnet bavaplō nohohole nōnōm! 30 Hog kal namne so vaēh ige gom ba ak nēvēglal wa naphah lahan net mugumgu nōnōm Tigsas, a noyon̄."

31 Bahnentō, kēy matatay bah nen, tō nēm̄ a kēy hag tō aē en miyiyeg. Tō kēy ōyheg mi Nuvu Yon̄, tō kēy vasemlō nohohole non Ḡod mi navaksay.

Notogtog non ige a nēdēmtig Tigsas

32 Tō ige a nēdēmtig en, kēy memwugoy lēdēmdēm wa lelo taqay del. Tō vitwag et vap te so nonon mahgen, ba kēy magasēg kēy bahaphap del nonoy. 33 Tō nohohole non ige hal naman nan aē. Tō kēy mavasemlō galsi so Tigsas mahatig lok me den namatmat. Tō nasgōp del notog tiwag mi kēy. 34 Alon mi kēy tateh et mey a kēy nemyōs namyimyin̄. Veg ige mey a lēvētan tiwag mi nēm̄ nonoy aē en, kēy men̄yeg. Tō kēy melep nēsēm nan 35 tō van tēy me hiy ige hal, so biyin̄ kēy aē. Tō ige hal magasēg nēsēm nan hiy ige a nemyōs namyimyin̄.

36 Net vitwag aē mi kēy, ikē Jōsēp, ba ige hal mōl tō so Banabas, ba nēdēmdēm nan alon so "net bavasōsōp." Kē niginwotwot non ige Livay, tō napnō nonon Sayprus. 37 Tō kē men̄yeg tekel vētan nonon. Tō kē melep me nēsēm nan, tō nilep van lengon ige hal mi nēdēmap.