1 Nōqōn̄ Pentekos* mavan me en, tō ige del mey a nēdēmtig Tigsas en, kēy nahag tiwag mahē vitwag. 2 Kēy haghag leptō wah, kēy yon̄teg qelekē naln̄e len̄ liwo nivan ganwon me, tō nēm̄ nan niōyheg mi naln̄e valiqōqō. 3 Tō kēy met nahapqiyig qeleso nagayme ep mavan me, tō nep nen nivēl woywoy, ba niyow hag velvel apwoy del. 4 Tō kēy del mōyheg mi Nuvu Yon̄, wa tō qētēg hohole mi nagatgat tegtegha. Veg Nuvu Yon̄ nileplep van naman hiy kēy aē.

5 Ba lōqōn̄ liwo nan, ige Juw m̄adeg vanvan me den napnō tegtegha so vatēp Jerusalem. Kēy mavan me den vel vōnō lelo mayam, wa kēy nēdēmap galsi Ḡod. 6 Kēy moyon̄teg naln̄e valiqōqō gōh tō kēy van tiwag so et. Tō kēy mamamakē veg kēy yon̄yon̄teg vēglal nohohole geh gōh mi nagatgat nonoy togolgol.

7 Kēy mamamakē aē a nēkēkēn, tō kēy hohole wo, "!Atmi yon̄teg tow! ?Wō ige gōh ige Takalili ēwē? 8 ?Qeleave tō vivitwag den gēn moyon̄teg vēglal nagatgat togolgol nonon? Veg igēn del gōh mavan me den napnō tegtegha. 9 Wa yatkelgi mavan me den Patia, Midia, Elam, Mesopotamia, Judea, Kapadosia, Pontus, Esia, 10 Frigia kōyō Pamfilia, Itsip tiwag mi yatkel vōnō n̄a Libia a sisqet Sayrine. Wa tō ige Torom geh gōh 11 (yatkel Juw tiwag mi ige mey a motog lolqōn̄ tō am̄ag), wa ige Tikrit, tiwag mi ige Tarabia. !Ba kēy hohole mi nitiy gatgat togolgol nongēn bahaphap lililwo a Ḡod magaleg geh tō."

12 Kēy mamakē aē, wa kēy et ēglal galsi te aē. Tō kēy vēy vēvēhiy lokse kēy, "?Wō qeleave qelegōh yēhē?" 13 Ba yatkel et boyboyheg kēy, ba vavap so, "Ige gōh min meh nawaen."

14 Ba Pita nihatig hag tiwag mi ige hal son̄wul nanm̄e vitwag en, tō nihole liwo van hiy ige sil so, "!Yēhē bulbulsal! Kimi ige Juw, tiwag mi ige Tejerusalem del en, atmi yon̄teg galsi me hiy no. Ba nok vasemlō galsi van hiy kimi nam̄e dēmdēm ne age agōh. 15 Ō-ō-ō, ige gōh et toron̄ te qele a kimi vap en, veg nalo levevet ēwē a lemtap. 16 Nage a kimi met gōh en, ikē qele a net belgēlgēg Joel mayap vasem tō, so

17 "Ḡod vap so ‘Babah ne qōn̄ en, no tōlōwyeg galsi Nuvu mino apwon ige del,

Ige nētnētm̄ey tam̄an wa ige nētnētm̄ey lōqōvēn nonmi en, kēy tohohole lēgēlgēg.

Tō ige lōmlōmgep nonmi tet nahap a Ḡod taklō van hiy kēy.

Tō ige tamatmayge nonmi toqoyqoy noqoyqoy den namyeyen talge.

18 Lōqōn̄ nen no tōlōwyeg tēqēl me Nuvu mino apwon ige mugumgu mino, ige tam̄an tiwag mi ige lōqōvēn,

tō kēy tohole lēgēlgēg.

19 Lōtōk alge no tagaleg naphah,

tō lemyam antan kē kimi tetsas nēvēglal nam̄adeg.

Tō naday tolon̄ wa nep taga tiwag mi nahō a nemtēmtēl.

20 Am̄ag den nōqōn̄ non Welan en, nalo temlēglēg, wa nōwōl tavan me nilawlaw qeleso naday.

Nōqōn̄ non Welan tavan me, ikē nōqōn̄ liwo wa ikē nēlēn̄as.

21 Tō ige del mey a kēy ōlōl van lahan Welan en, Welan tavaēh kēy.’✝

22 "!Yēhē Tisrael, yon̄teg galsi nohohole mino! Tigsas Tanasaret en, Ḡod mavasemlō galsi so ikē hēyhēywē. Veg kimi nēglal vatag naphah, nēvēglal, wa namgumgu lililwo a Ḡod mak heylō kē lengomi. 23 Ḡod mōm̄ōk kē lemnemi qele a kē mēdēmdēm vasig tō aē am̄ag. Tō kimi mukēg kē van lemnen ige gengenyeg a et Juw te tō so wuh mat kē apwo wolwol. 24 Ba Ḡod me lepyak nememeh ne matmat den kē, wa mak ēh lok kē den namte. Veg namte tit tēygoy vēhte kē. 25 Veg am̄ag Mayanag Devēt mohole gatay Welan so,

Vaga nok etet so Welan nitig helem̄ag no.

Veg kē tiwag mi no en, tō no tit mētēgteg vēhte.

26 Veg bege gōh en natqek nimlaklak wa naplek niōlōl mi namlaklak.

Nok dēmdēyē so nēk tavaēh no, nataqn̄ēk tō m̄ōkheg vēh veg bēdēmdēm nan.

27 Veg nēk tit ukēg veteg te no leqyan̄,

wa nēk tit ukēg veteg vēhte Net Yon̄ nōnōm so niqōn.

28 Nēk mal vasemlō me namtehal ne ēh hiy no,

tō van lengē en nēk tōyheg no mi namlaklak.✝

29 "Eh yathithik, nok so vasemlō temunmi van so tamayge Devēt mamat en, tō kēy metvig kē, tō nōqyōn entō tiwag mi gēn qiyig agōh. 30 Ba Devēt en, ikē net lēgēlgēg, tō kē nēglal navatvat non Ḡod. Veg Ḡod melgēg tō so nim̄ōk bōbō nonon so nihag leleh letno mayanag non Devēt. 31 Kē met nahap a so tavan me en, tō kē mavaplō so Kraēs tahatig lok, aso Ḡod tit ukēg veteg vēhte kē Amnō*, wa nataqn̄ēn tit saq vēhte.

32 "Tigsas gōh en, Ḡod mak ēh lok kē den namatmat. Kemem met mi namtamem, tō kemem vasemlō van hiy kimi. 33 Tō Ḡod melep kal kē, tō m̄ōk kē van lemtō nonon. Tō Ḡod melep van Nuvu Yon̄ nonon hiy kē, qele a kē mal vatvat vatag. Tō Tigsas mōlōwyeg me Nuvu Yon̄ nonon, tō kimi met, wa moyon̄teg ēgēn.

34 "Wa tō, Devēt et vēykal te lemyeyen talge, ba kē mohole gatay bōbō nonon lokse, tō mavap so,

Welan mavap hiy Welan mino, so ‘Nēk haghiy letno liwo a lemtō mino,

35 ba nēk dēyē gaydēn̄ a nok tēvēvēg ige tavale nōnōm, tō m̄ōk tēqēl kēy how labalbe yēn̄ē tō vayvay apwoy.’✝

36 "Sōwlē, yēhē ige Tisrael del, nok hole maymay hiy kimi so Tigsas, a kimi mowos kal kē lowolwol en, Ḡod mōm̄ōk kal kē so ikē Welan wa Kraēs."

37 Ige sil moyon̄teg qelegōh en, tō nohohole nan meyey lepyay. Tō kēy mohole hiy Pita tiwag mi ige hal yatkelgi, wo, "?Yathithik, wō kemem tak qeleave?"

38 Tō Pita meplu, so "Atmi dēm leh, ba van me vasugyon̄ lahan Tigsas Kraēs, tō so kē nidēmveteg negengenyeg nonmi. Tō kē tohog van Nuvu Yon̄ hiy kimi. 39 Ḡod mavatvat tō aē, hiy kimi, tiwag mi ige yantintimi, tiwag mi ige mey a yeh ōk. Navatvat gōh hiy ige del mey a Welan Ḡod nongēn niōlōl kēy." 40 Tō Pita mavap vētday kēy mi nohohole tegtegha se, tō vēhge maymay kēy so, "!Atmi van yak den ige het qiyig kē, veg nēvēvēg tiple qal kimi!"

41 Ige mey moyon̄teg noyoy gōh wa mēdēmtig en, kēy mavasugyon̄. Lōqōn̄ nen, ige a muqul tiwag mi ige non Tigsas en, kēy teyvag tēl (3,000).

42 Tō kēy tēy maymay navatvatne non ige hal, tō kēy tatay vaga, hayhay tiwag vaga, wa gengen yon̄ vaga. 43 Tō Ḡod mak woqse vahah wa nēvēglal heylō ige hal, tō ige del mihiyey aē. 44 Vaga kēy hay tiwag, tō kēy gasēg nahaphap del tiwag. 45 Tō kēy n̄eyeg nēvētan nonoy tiwag mi yatkel haphap se, tō so biyin̄ ige vivitwag bemyōs nonoy. 46 Kēy qultiwag galsi. Vel qōn̄ kēy hay tiwag Litiy Ēm̄ Bolol non Ḡod. Tō kēy gengen tiwag velvel ēm̄. Kēy gengen mi namlaklak, wa kēy dēm bēbēw kēy. 47 Tō kēy ōl liwo Ḡod. Tō ige sil memlaklak hiy kēy. Tō vel qōn̄ Welan nilep van niviwti et se hiy ige a kē so nivaēh kēy.