Namgumgu Namun Ige Hal 25

Pol mitig lengon Mayanag Festus

1 Vētmahē Festus nidēn̄ me loprovēns, tō lēkle qōn̄ vētēl en, kē nihatig den Sisaria tō nivan Jerusalem. 2 Tō ige pris lililwo tiwag mi ige lililwo Tujuw hohole visipteg Pol van hiy Festus. 3 Tō kēy mēvēhge van namyōs nonoy vitwag so Festus nivētleg lok Pol me Jerusalem. (Veg kēy mal vonm̄ēt nowmat nēdēmdēm vitwag so wuh kē a lemtehal.)

4 Ba Festus meplu kēy van so, "!Tateh! Pol totog lap Sisaria, tō sisqet nok m̄ōl lokse Sisaria. 5 Bastō itōk so yatkel et lililwo nonmi dam no. So kē wo mak nahap mey nehet, tō kēy tēvēy vavaleh tiwag mi kē aē."

6 Tō Festus motog se Jerusalem nōqōn̄ tege levetēl, siso son̄wul. Tō kē qoyo m̄ōl lokse Sisaria tiwag mi ige Juw. Tō taval meyen en, Festus nivap van hiy ige bepgapgal so lep lō Pol me hiy kē. 7 Tō Festus nihaghiy hōw letno haghag non ige vēvēg, tō Pol nivan me. Tō ige Juw a mavan tō me den Jerusalem mitig dēln̄et kē. Tō kēy qētēg vēvēg kē mi nēdēmdēm m̄adeg mey a nitiy het yeh. Ba nohohole nonoy et tig te aē so vasemlō so nēdēmdēm nan hēyhēywē.

8 Tō Pol niplu so nitigoy lok kē mahgen, so "Nok et tig het te Nele non ige Juw, siso Nitiy Ēm̄ Bolol, siso Mayanag Sisa."

9 Ba Festus nemyōs so niak malaklak ige Juw, tō kē mavap van hiy Pol wo, "?Nēk nemyōs so van Jerusalem tō nok so vēvēg nēk tatag nēdēmdēm geh gōh?"

10 Ba Pol meplu lok van so, "Nok tig vatag tō gōh letno vēvēg non Sisa, a nitiy mahē a nēk so vēvēg no aē. !Nēk nēglal galsi so nok et ak te hap mey nehet te van hiy ige Juw! 11 Sowo no mak tō nage mey nehet a haytēyēh so wuh no aē en, itōk. No tit vēhge vēhte nēk so tog wuwuh no. Ba sowo natawye vēvēg gōh et hēyhēywē tē, tō tateh et telep no van hiy ige agōh. !Ba no nemyōs so Mayanag Sisa mahgen nivēvēg no aē!"

12 Tō Festus mohohole susu tiwag mi ige vēwti leln̄an, so yon̄teg nēdēmdēm nonoy. Bastō kē nivap van hiy Pol so, "Nēk mal vēhge mahge so Sisa so nivēvēg nēk, tō entō nōk en, nēk van hiy Sisa!"

Pol mitig lengon Nēqēt Mayanag Akripa

13 Lēkle qōn̄ vēvēh qiyig, Nēqēt Mayanag Akripa kōyō tētan vitwag nahan Bernis mavan me Sisaria so vatēp Festus. 14 Kōyō motog nusuvay misin, tō Festus nivasem van hiy mayanag nēdēmdēm veg Pol. Festus mavap so, "Net vitwag togtō lēm̄ yētyēt gōh, Felix mōm̄ōk veteg tō kē. 15 Mahē no mavan Jerusalem en, ige pris lililwo tiwag mi ige lililwo goy ige Juw mohole me natkel dēmdēm veg kē. Kēy nemyōs so nok so vēvēg mat kē. 16 Ba no meplu goy kēy so nēvēwti vitwag wo mitig het net vitwag en, et vēnan ige Torom te so lep nowmat kē van hiy ige tavale nonon. Ba kēy del tohohole nogoy, tō so net nan teplu vēh nēdēmdēm nonoy.

17 "Bastō kēy mavan tiwag me gōh, ba nok et dēyē te, tō taval meyen nan hag en, nok haghiy van letno haghag bēvēvēg, tō vap van hiy ige bepgapgal so lep bat me Pol. 18 Mahē kēy mitig kal hag so vap so kē mak nahap mey nehet en, kēy et hole te hap te qele nok dēm van so kēy so hole. 19 Ba kēy hole gatay tō nēdēmdēm batatay nonoy en, veg net vitwag a nahan Tigsas mey a mal mat, ba Pol vap so kē nēh lapgetō.

20 "Ba nok et ēglal galsi te aē bēdēmdēm agōh, so tēvēvēg nēdēmdēm nan qeleave. Mak tō a no mēvēhge Pol wo, ‘?Nēk nemyōs so van Jerusalem, tō so vēvēg nēk van nen?’ 21 Ba kē mēvēhge so kē nitog lap me lēm̄ yētyēt Sisaria, veg kē nemyōs so Mayanag Sisa tēvēvēg kē. Tō no mavap van hiy ige mino so etgoy galsi Pol gaydēn̄ aso no metsas namtehal mey nēwē en, tō qoyo vētleg kē hiy Sisa n̄a Rom."

22 Tō Akripa nivap van hiy Festus so, "Ah, ba no nemyōs so yon̄teg temuk nohohole non net anen!"

Tō Festus wo, "Talōw en, nēk qoyo yon̄teg temu kē."

23 Bastō taval meyen en, Festus niōlōl nōyōstiwag liwo. Tō ige lililwo non ige bepgapgal tiwag mi ige lililwo telepnō vanvan me. Tō Akripa kōyō Bernis hayveg hay lēm̄ yōstiwag, tō kēy lep vasgēt kōyō mi namlaklak liwo. Tō Festus nōlvayēg ige bepgapgal so lep bat me Pol.

24 Tō Festus nivap so, "Mayanag Akripa tiwag mi ige sil a taq sey tō gōh, atmi et van net gōh. Ige Juw del Tejerusalem tiwag mi ige mey a togtō agōh en, kēy mēvēvēhge tō no veg net agōh, tō kēy ōlōl tawtaw aso kē nitog togtog ēh se. 25 Ba mahē a no mēvēvēg kē en, nok et etsas te hap vitwag te aso kē tamat vēh aē. Ba kē mēvēhge Sisa so nivēvēg kē. Bastō no mēdēmdēm so vētleg kē. 26 Ba nok et etsas te dēmdēm vitwag te aso no tayap vasem vēh van hiy welan mino veg net agōh. Bastō no melep lō kē me lengomi del, yakhag yeh inēk Mayanag Akripa, tō so nēk tēvēhge vēh kē mi nēvēvēhiy bah en, tō no qoyo yap neletes aē. 27 Veg lēdēmdēm mino en, et wē te so tēy maymay net vitwag so vētleg kē bēvēvēg, ba et vasemlō te so kē mak tō nahap mey nehet."