1 Mahē nen ige mey a tin̄tin̄qoy nohohole non Tigsas en, kēy mam̄adeg malig hag, tō nēdēmdēm bēvēlwoy maqal kēy gatay nagagasēg gengen. Kēy mavan me niviwti vōyō veg bagatgat. Ige Juw a mavan me lepnō tegha, a kēy hohole nagatgat Tikrik, kēy matwolwol ige Juw a nitiy et vōnō Tisrael, a kēy hohole nagatgat Tujuw. Ige tavalnogongēn matwolwol ige tēg vōnō veg ige nay nonoy. Veg ige tēg vōnō vanvan veheg kēy mahē kēy asēg negengen vel qōn̄.

2 Bastō ige hal son̄wul nam̄e vōyō ōlōl tiwag me ige viwti del mey a nitin̄qoy, tō vap so, "Et wē te so kemem dēmveteg navatvatne ne hohole non Ḡod tō so van me net yowyowveg begengen.* 3 Ba yathithik wa yatētētek, itōk so kimi etyak net buliviyō den kimi bemgumgu agōh, ige et mey a ige del ēglal so kēy nōyheg mi Nuvu Yon̄, wa kēy nēmnay. 4 Tō kemem tig maymay tasga latatay wa toytoylō nohohole non Ḡod."

5 Tō ige del nemlaklak bohohole nan, tō kēy metyak Steven a kē nēdēmtig wa nōyheg mi Nuvu Yon̄, tiwag mi Filip, Prokoras, Nikanor, Timon, Parmenas, wa Nikolas. Nikolas en, kē nage Tantiok, am̄ag kē notog lolqōn̄ ba mavan me motog hiy Juw. 6 Kēy mēvētgiy kēy how lengon ige hal. Tō ige hal matatay goy kēy, tō matan̄ namney apwoy wa mavawē kēy.

7 Noyoy non Ḡod maga tasga, mak tō ige tin̄qoy mam̄adeg a mam̄adeg n̄a Jerusalem. Wa tō ige pris m̄adeg mēdēmtig Tigsas.

8 Tō Steven en, ikē nōyheg mi nasgōp wa naman non Ḡod. Tō kē mak nēvēglal wa naphah a nitiy wē lengon ige sil. 9 Ba ige viwti vitwag mamatwolwol kē aē. Kēy ige Juw a nage Tasayrine, wa Taleksanria, wa den loprovēns Silisia wa Esia. Am̄ag kēy ige slev, tō kēy ōl nēm̄ tatay nonoy so, Nēm̄ Tatay non Ige a Notog Taywah. Kēy vēy vavaleh tiwag mi Steven 10 ba kē nilalaket goy kēy vaga, veg kē nēmnay wa nōyheg mi Nuvu Yon̄.

11 Bahnentō, kēy hatig hag tō wēl ēwē yatkel et so hole galgal lahan, a so, "Kemem moyon̄teg kē, kē mohole sapsapwōy Mosis tiwag mi Ḡod."

12 Tō nohohole gōh mak ige sil et malaklak te, tiwag mi ige m̄agoy ige Tisrael, wa tō ige vatvatgo ne Le. Tō kēy tēy kē, tō m̄ōk kē van lengon ige lililwo non ige Tisrael a lōyōstiwag non ige Sanhedrin. 13 Tō kēy melep yatkel et so vēgal Steven. Kēy magal so, "Steven nihole hethet tasga hiy Nitiy Ēm̄ Bolol gōh wa tō Nele non Mosis. 14 Kemem moyon̄teg kē mavap so Tigsas Tanasaret so niak hethet Nēm̄ Bolol gōh, tō kē so nileh Nele a Mosis melep tō me."

15 Ba ige del a lelo yōstiwag en, namtay del van a lengon Steven en. Tō kēy met van nangon qele nango in̄sel.