1 Net vitwag togtō Sisaria en, nahan Konelias, ikē nage Torom. Kē nilwo goy ige vagapgal m̄eldēl vag tiwag (100), ige gōh kēy ōlōl kēy so ige viwti Titali. 2 Kē et Juw te, ba vaga kē ōl liwo Ḡod. Kē net vitwag a nileplep namlan hiy ige sil, tō kē net batatay vaga. Tō kē tiwag mi ige nonon nēdēmap galsi Ḡod. 3 Lemyēpyep vitwag, sisqet tege a lelo vētēl, kē metsas nage vitwag a loqoyqoy. Kē met galsi so nin̄sel non Ḡod mavan me hiy kē, tō mavap so, "!Konelias!"

4 Kē mam̄alyow aē, ba kē met lap van aē, tō kē wo, "?Qeleave, welan?"

Tō nin̄sel wo, "Natatay nōnōm wa nohoghog nōnōm van hiy ige m̄asay en, Ḡod net vēglal. 5 Bastō, vētleg net a Jopa so lep me net vitwag nahan Simon, a tekel han Pita. 6 Kē notogtog lēm̄ non Simon, a net batagtaghiy nipni bōlōk. Kē notogtog sisqet ale."

7 Nin̄sel mohohole bah van hiy kē en, tō kē niqlen̄ lok den kē. Tō Konelias niōlōl me net slev nonon vōyō tiwag mi noyowyowveg vitwag. Noyowyowveg nan ikē net bepgapgal, wa vaga kē nōlōl liwo Ḡod. 8 Konelias mohole m̄ōleg bah van hiy kēytēl bahap a kē met tō en, tō nivētleg kēytēl Jopa.

9 Taval meyen nan hag a lēlwomyen en, kēytēl vanvan me sisqet Jopa. Ba Pita meyem kal apwo ēm̄ alge a letno hag m̄ōkheg so nitatay. 10 Ba namaygay mak Pita tō kē so nigengen. Kēy teyteymat lapgetō negengen nagan wah, tō kē met nage vitwag a qeleso kē niqoyqoy. 11 Kē met nōtōq mawak, tō nage vitwag mēhēw me, qeleso namalmal liwo a net nētēy naqan̄qan̄yan vēvet tō nipyoy tēqēl how antan. Ba woqse haphap nōy alon. 12 Kē nōy mi nahaphap mey nem̄ey wa nahaphap mey a et m̄ey te, qeleso nōbōlōk, noqo, nututu, nēqētqoqo, nam̄at tegtegha, wa nemen tegtegha. Yatkel haphap a ige Juw tegen vēh, wa yatkel haphap a kēy tit gengen vēhte veg Bele nonoy. 13 Tō naln̄e hohole mavan me hiy Pita so, "Hatig, Pita, wuh tegōm hap ba gen."

14 Ba Pita meplu goy kē van so, "Nitog, Welan. Veg no tit gen vēhte negengen mey et yon̄ te wa et wenwen te."

15 Ba nohohole mavan lok me hiy kē so, "Nahaphap mey a Ḡod mak wenwen tō en, nēk nitog vavap so et wenwen te."

16 Kē mak qele gōh vagtēl, tō namalmal nen nivēykal lokse hag lōtōk.

17 Pita dēmdēm soksok namanig ne qoyqoy gōh en wah, tō ige yowyowveg non Konelias mosoksok nēm̄ non Simon, tō kēytēl dēn̄ me namtegeay nan. 18 Tō kēytēl ōlōl van tō vēhge so, "?Wō net a nahan Simon Pita, kē aē megōh?"

19 Pita nidēmdēm sosok lapgetō nōm̄ōleg ne qoyqoy wah, tō Nuvu Yon̄ nivap van hiy kē wo, "Simon, tēlge vētēl soksok nēk. 20 Hatig ba hēw tēqēl how hiy kēytēl. Dam kēytēl, nitog dēmdēm vōvōyō veg no mahgēk mēvētleg kēytēl me."

21 Tō Pita nihēw tēqēl hōw hiy kēytēl, tō nivap van hiy kēytēl wo, "?Ino agōh a kēmtēl soksok no en. Kimi nemyōs no bahap qiyig vitwag?"

22 Ba kēytēl meplu van hiy Pita wo, "Konelias mēvētleg kamtēl me. Kē net liwo non ige bepgapgal, wa kē net tenenen vitwag a kē ōl liwo Ḡod vaga, wa ige Juw del nēdēmap kē. Tō nin̄sel yon̄ mavap van hiy kē so niōlōl nēk so van me lēm̄ nonon, so yon̄teg nohohole nōnōm."

23 Tō Pita melep vasgēt kēytēl me lēm̄ so tog tiwag mi kē. Ba taval meyen nan hag kē mavan tiwag mi kēytēl. Ba yatkelgi mey a nēdēmtig a tog tō Jopa en matatag se kēy. 24 Taval meyen lokse hag kēy mēdēn̄ me Sisaria. Ba Konelias may ōlōl tiwag mi ige nonon, wa ige yaplōplōn, tō kēy dēyē leptō kē anen. 25 Pita nihayveg me lēm̄ en, tō Konelias melep vasgēt kē, tō mavatiqaw goy kē so mogmogo goy kē. 26 Ba Pita nilep kal lok kē, ba nivap so, "!Tig ketket! Ino net ēwē qele inēk en."

27 Pita kōyō Konelias qētēg kaka tō kaka bat hay lelo ēm̄. Tō Pita so et van qelekē woqse sil taq tō lelo ēm̄ en. 28 Tō Pita nihole van hiy kēy so, "Kimi del nēglal galsi so nele nonmem nigatgoy net Tujuw so tit van sisqet vēhte me net telepnō tegha, wa tit vatēp vēhte kē. Ba Ḡod mal vasem me hiy no so no tit ōl hethet vēhte net vitwag so ikē et yon̄ te wa et wenwen te lengon Ḡod. 29 Bastō nok et valeh te mahē a kimi mōlōl no. ?Ba kimi tavap vēh me so kimi mōlōl no me bahap?"

30 Tō Konelias meplu so, "Nōqōn̄ mal vēvet goy, wun se qele agōh a lelo vētēl en, nok tatay lēm̄ mino. Nok so et ganwon van qelekē net vitwag tig tō a lengēk en, kē nehey goy kē mi namalsam a nihin̄hin̄. 31 Kē mavap me hiy no wo, ‘!Konelias! Ḡod mal yon̄teg natatay nōnōm, wa kē mal etsas nohoghog namu van hiy ige m̄asay. 32 Bastō nēk vētleg te et nivan n̄a Jopa, vēhge net vitwag nahan Simon Pita, ba kē nivan me hiy nēk. Net nan notogtog lēm̄ non Simon, a net batagtaghiy nipni bōlōk. Kē notogtog sisqet nanaw.’

33 "Bastō no mēvētleg togotgo hōw hiy nēk en, ba itōk a nēk mavan me. Tō kemem del mahay tiwag me lengon Ḡod so yon̄teg navavap del a Welan mōm̄ōk nēk so vasemlō me hiy kemem."

34 Tō Pita niqtēg nohohole nonon wo, "No mēglal galsi so lengon Ḡod en, igēn del haytēyēh. 35 Ḡod telep vasgēt ihēte a nimogmogo goy kē, wa niak nage mey netnenen van lengon, et ēwē te so kē nage Tisrael si so nage telepnō tegha. 36 Kimi nēglal vatag so Ḡod mēvētleg me nahal hiy ige Tisrael. Nahal nan, noyoy ēwē so natm̄at mavan heylō me Tigsas Kraēs, a ikē Welan non ige del. 37 Tō kimi nēglal aē nahap a maqal n̄a Judea. Nage nan meqtēg Kalili, mahē Jon motoytoy so ige sil so dēm leh wa vasugyon̄. 38 Tō Ḡod metyak Tigsas Tanasaret, tō melep van Nuvu Yon̄ wa naman hiy kē. Tō Tigsas mavan walēg wa magaleg namgumgu mey nēwē, wa kē mak wē lokse ige del mey a natmat mēhēw kēy, veg Ḡod tiwag mi kē.

39 "Tō kemem met mi namtamem nahaphap del a kē mak tō Jerusalem, wa lelo vōnō non Ige Juw. Ige Juw muwuh kē ba mowos kal kē lowolwol. 40 Ba lōqōn̄ vētēl negi Ḡod melep kal lokse kē den namatmat, tō maklō kē van hiy ige et. 41 Ige del et etet te kē, ba ige mey a Ḡod metyak kēy so vasemlō noyoy veg kē. Ige nan kemem gōh a megengen wa minin tiwag mi kē mahē a kē mahatig lokse den namatmat. 42 Kē mōlvayēg kemem so toytoy noyoy ēwē hiy ige sil. Tō kemem vasemlō so ikē net a Ḡod mōm̄ōk tō kē so nivēvēg ige del, ige mey nēh tiwag mi ige mey namat. 43 Tō ige lēgēlgēg del mavasemlō so ige del a nēdēmtig kē en, Ḡod tēdēmveteg negengenyeg nonoy heylō nahan."

44 Mahē Pita hohole lapgetō nage geh gōh en, tō Nuvu Yon̄ nihēw me apwon ige a yon̄yon̄teg tō kē en. 45 Ige dēmtig a madam tō me Pita en, ikēy nage Tujuw, tō kēy mamakē aē veg aso Ḡod melep van nasgōp ne Vu Yon̄ hiy ige mey a et Juw te. 46 Veg kēy met vēglal so Nuvu Yon̄ mōyheg ige tog lolqōn̄ gōh, tō ige tog lolqōn̄ hohole mi nagatgat tegtegha wa ōlōl liwo Ḡod.

Bahnentō, Pita wo, 47 "?Ihē mihigoy so tit vasugyon̄ te ige gōh mi nēbē? !Tateh! !Veg kēy mal lep Nuvu Yon̄ qele igēn!"

48 Tō Pita mōlvayēg so vasugyon̄ kēy lahan Tigsas Kraēs. Tō kēy mēvēhge Pita so tog tekelgi qōtō tiwag mi kēy.