1 Pol mavan me Dēbē tiwag mi Listra. Ba nitin̄qoy non Tigsas vitwag tog tō anen nahan Timoti. Tita non Timoti gōh, ikē Nujuw vitwag a kē nēdēmtig, tō imam nonon nage Tikrik. 2 Ige yathēthēngēn a Listra tiwag mi Ikoniam mēdēmap Timoti so ikē net ēwē vitwag. 3 Pol nemyōs so Timoti nivan tatag kē, ba ige Juw del a tog tō mahē nen nēglal so imam non Timoti nage Tikrik. Ba Pol metep vēglal Timoti so ak muhuy noboel nonoy. Tō Timoti nidam tatag Pol.

4 Pol tiwag mi yoge yaplōplōn mavan heyheylō vel vōnō geh nen, tō vavasemlō van hiy kēy nele a ige hal tiwag mi ige lililwo lelo ēm̄ yon̄ Jerusalem mōm̄ōk tō. 5 Bastō nēdēmtig non ige tēlēm̄ yon̄ nen mamaymay, tō vel qōn̄ kēy yap batbat me nisil lēm̄ yon̄.

6 Pol tiwag mi yoge yaplōplōn mavan heylō napnō Ḡalasia tiwag mi Frigia. Ba Nuvu Yon̄ et ukēg te so kēytēl so vasemlō noyoy van lepnō Esia. 7 Mahē kēytēl van dēn̄ me lepnō Misia en, tō kēytēl mehelhel etgal so yow lege napnō Bitinia, ba Nuvu non Tigsas et ukēg te. 8 Tō kēytēl mavan lō Misia tō van tasga Troas.

9 Tō anqōn̄ nan en, Pol met nage vitwag a loqoyqoy. Kē met qeleso net vitwag Tamasedonia tig tō anen, ba kē nivēhge maymay van hiy Pol so, "Nēk so van ēgē me Masedonia, so biyin̄ kemem."

10 Pol met bah nage nen en, vag tiwag ēwē kemem sok namtehal tō so van Masedonia. Veg kemem nēglal so Ḡod mōlōl kemem so vasemlō noyoy ēwē van hiy ige sil lelo vōnō anen.

11 Tō kemem melep nabaklap nen tō mukēg den Troas tō magam tenenen van lepnō Samotres. Tō taval qōn̄ nan en, kemem magam tasga dēn̄ me Neapolis. 12 Tō kemem hēw den nabaklap, tō van dēn̄ me Filipae. Napnō Filipae en, kē nam̄e vōnō a loprovēns Masedonia, ba ige lelqelqe vōnō nen ikēy mavan me den Rom. Tō kemem motog natkelgi lelo vōnō anen.

13 Lōqōn̄ M̄ōkheg a Layavēg kemem makalō den nalqelqe vōnō nen, tō van me sili bē liwo, veg kemem moyon̄teg so mahē vitwag nen ige Juw vanvan me batatay aē. Kemem van me mahē nan en, ba ige lōqōvēn mal dēn̄ me, tō kemem haghiy hōw tō kemem kaka ēgēn. 14 Ba nalqōvēn vitwag yon̄teg tō hiy nakaka nonmem en, nalqōvēn nan nahan Lidia. Ikē nage te lelqelqevōnō Tiatira. Ba kē nin̄yen̄yeg namalmal a nalahme ba nēsēm nan neketket geh. Nalqōvēn nan, kē et Juw te, ba kē nataqtaqlun̄ goy Ḡod vaga. Tō Welan mawak nēdēmdēm nonon tō kē mēdēmtig nohohole nonon Pol. 15 Tō ikē tiwag mi ige del lēm̄ nonon wa ige et mugumgu nonon, kēy del mavasugyon̄ qēt. Tō kē nivap me hiy kemem wo, "Sowo kimi dēm van so no nēdēmtig hēyhēywē Welan, ba van me tog qōtō lēm̄ mino." Tō kē nivēhge maymay kemem, tō kemem van lēm̄ nonon ēgēn.

16 Lōqōn̄ vitwag, kemem so van batatay, ba nam̄alm̄al vitwag metsas kemem. Nam̄alm̄al nan, kē neslev. Tō ige welan nonon tēytēy nēsēm liwo veg kē, veg nuvu vitwag aē mi kē bēsēsēil. Tō ige sil wēlwēl ige welan nonon, veg nam̄alm̄al nan netet vēglal nahaphap. 17 Tō nam̄alm̄al nan madamdam lap Pol tiwag mi kemem. Tō kē niōlōl a nilwo so, "!Ige gōh, ige yowyowveg non Ḡod a neketket yeh! !Kēy vavasem van hiy kimi namtehal a kimi so tētēy nēh lap aē!"

18 Kē mak qelegōh nōqōn̄ m̄adeg, ba Pol moyon̄ ninhet aē. Tō Pol mat kēlē me hiy nuvu het nen ba nivap so, "!Mi naman non Tigsas Kraēs, nok vap van hiy nēk so kalō den nam̄alm̄al anen!" Vag tiwag ēwē tō nuvu het nen nikalō den kē.

19 Mahē a ige welan nonon met van qelenen en, tō kēy mēglal tēymat so kēy tit tēy se vēhte nēsēm aē ēgēn. Tō kēy tēy maymay Pol kōyō Silas, tō gamteg kōyō hiy ige lililwo ne vōnō van lehyay. 20 Kēy vantēy Pol kōyō Silas me hiy ige mayanag non ige Torom, tō vap van hiy kēy wo, "!Yoge Juw gōh mavan me ba makak tēqtēqyeg ige sil lelo vōnō nongēn! 21 Kōyō mavasemlō nēmētwuyō mey a nele nongēn Torom mal higoy."

22 Tō ige sil mahatig goy kōyō. Tō ige lililwo non ige Torom mahay qēt namalsam nonoyō. Ba melmelm̄eh kōyō mi nēqētēnge vag m̄adeg. 23 Tō kēy m̄ōk bat kōyō lēm̄ yētyēt. Tō kēy vap van hiy net betetgoy nēm̄ yētyēt so etgoy galsi kōyō. 24 Kē moyon̄teg van qelenen en, tō kē mōm̄ōk bat kōyō a lidin mey a yeh hay alon. Tō mēqlēh maymay nayn̄oyō mi neyep liwo len̄.

25 Sisqet lētn̄ēt ne qōn̄, tō Pol kōyō Silas tatay ba sese neh van hiy Ḡod. Ba yatkel et a lēm̄ yētyēt en hag ba yon̄teg van hiy kōyō. 26 Tō kēy yon̄teg ganwon van a nēm̄ miyiyeg qēt, tō natawye mete ēm̄ del mawak qēt. Tō ige del mey a kēy mēyēt kēy mi nējēn en, nējēn mutuwyak den kēy.

27 Net betetgoy nēm̄ yētyēt nen matyak me so et van qele kē namte ēm̄ del mal wak tawal. Kē dēmdēm so ige hay lelo ēm̄ en mal valaplag qeleqlen̄. Tō kē nilepyak nagasel bepgapgal nonon so nigon mat kē mahgen. 28 Ba Pol magaygayka so, "!Nitog gongon mat nēk! !Kemem del agōh!"

29 Tō net betetgoy nēm̄ yētyēt en niōlōl van hiy net vitwag so nilep me nuqul, tō kē niplag bat hay lelo ēm̄ mi nihiyey, tō vatiqaw hōw a lengon Pol kōyō Silas. 30 Bahnentō, kē nivēl lōlō kōyō yow me tō nivap van hiy kōyō wo, "?Yohē, no tak qeleave tō no tētēy nēh?"

31 Kōyō meplu goy kē van wo, "Nēk dēmtig Welan Tigsas, tō nēk tētēy nēh lap, inēk tiwag mi ige del a lelo ēm̄ nōnōm." 32 Tō Pol kōyō Silas vasem Noyoy Ēwē veg Welan van hiy kē tiwag mi ige del a lelo ēm̄ nonon.

33 Vag tiwag ēwē anqōn̄ nen, kē nivēl lōlō kōyō me, tō nimen̄ m̄ōgm̄ōgteg namtewot noyō. Tō kēy del vasugyon̄ qēt. 34 Tō kē nivan tēy kōyō lēm̄ nonon, tō nilep van negengen hiy kōyō. Tō kē memlaklak a nēkēkēn veg kē mēdēmtig Ḡod, tiwag mi ige del nonon.

35 Mahē mal meyen, tō ige lililwo non ige Torom vētleg me ige yowyowveg nonon lēm̄ yētyēt, so vap so "Ukēg lō yoge anen." 36 Tō net betet goy ēm̄ yētyēt vap so, "Ige lililwo Torom ma vap so nok ukēg taywah kōmyō. Bastō, kōmyō kalō mi natm̄at."

37 Ba Pol vap van hiy ige yowyowveg nen so, "!Nahap qelenen! Kamyō nēteg vōnō Torom ba kēy melm̄eh kamyō lengon ige sil yeghuquy, a nēvēvēg tateh. ?Ba kēy nemyōs so lōn̄veg kamyō, so kamyō so kalō? !Tateh! Itōk so kēy van me, tō tig helem̄ag lō kamyō."

38 Noyowyowveg nivan tō nivasem lokse van naln̄an Pol hiy ige lililwo nen. Kēy a moyon̄teg van aso kōyō nēteg vōnō Torom en, tō kēy memtēgteg. 39 Tō kēy van me, tō vap namgaysēn van hiy kōyō, tō tig helem̄ag kōyō, tō vēhge kōyō so ukēg nowmat napnō anen. 40 Kōyō makalō den nēm̄ yētyēt, tō kōyō mavan vatēp Lidia. Mahē kōyō mohole biyin̄ bah ige dēmtig en, tō kōyō van ēgēn.