1 Vētmahē nēvēy vavaleh nen nibah en, tō Pol mōlōl ige tin̄qoy, tō mohole biyin̄ kēy. Tō kē mukēg veteg kēy tō nivan n̄a Masedonia. 2 Kē mavan walēg loprovēns nan, tō nihole biyin̄ ige dēmtig mi navavap m̄adeg, tō nivan dēn̄ Kris. 3 Tō kē motog lepnō nen bōwōl vētēl. Tō Pol nemyōs so gam hiy Siria, tō kē qoyo yow labaklap, ba ige Juw mēdēmdēm so wuh kē. Bastō Pol meleh nēdēmdēm nonon, tō nivan heylō lokse loprovēns Masedonia.

4 Ige yatkelgi madam tatag kē, ige nan wa Sopata, ēntēn Pirus, kē nage telepnō Berea; Aristakas kōyō Sekundus, yoge Tetesalonika; Gayus nage Tēdēbē; tiwag mi Timoti; Tikikus bastō Trofimus, yoge gōh nage Tesia. 5 Ige gōh mavan am̄ag den kemem, tō qoyo dēyē kemem n̄a Troas. 6 Tō kemem gam yak den Filipae lēkle Gengen Liwo Begengen Nēbrēyt a Nis Tateh Alon En, tō lēkle qōn̄ tēvēlēm, kemem qoyo dēn̄ kēy n̄a Troas. Tō kemem motog van nen nōqōn̄ liviyō.

7 Lasante vitwag, kemem megen yon̄ tiwag. Tō Pol mohole van hiy ige viwti nen. Kē mohole mēdēn̄ a lētnētnē qōn̄ veg kē nitēytēymat so nivan veteg kēy taval meyen. 8 Kemem mōyōstiwag tiwag a lidin vitwag a lēm̄ alge, ba nuqul nam̄adeg hag lidin anen. 9 Nōlōmgep vitwag nahag a lemte len̄ vitwag, nahan Yutikus. Ba nēm̄ nan en nehey vahgey vagtēl. Vētmahē a Pol nihohole en, Yutikus nihag mitiy. Kē memtiy taq, tō nisisgoy lō den namte len̄ tō nisisgoy how lēvētan. Tō kēy vanvan so lep kal kē, ba kē mal mat.

10 Tō Pol niplag tēqēl hōw hiy nōlōmgep en, tō nivatiqaw hōw tō nioyveg goy kē. Tō Pol nivap so, "Nitog dēmdēm van aē veg kē nēh." Tō nōlōmgep en, kē nēh. 11 Tō Pol nivan kal lokse hag lidin alge, tō kēy gengen tiwag. Tō kē mohohole tasga tiwag mi kēy mēdēn̄ mahē nimyen. Tō kē qoyo ukēg veteg kēy ēgēn. 12 Tō kēy hatig tō lep m̄ōl nōlōmgep nen lepnō nonon, a kēy del nemlaklak aē aso kē mēh lok en.

13 Tō Pol mēvētleg kemem so gam van Asos labaklap vitwag. Ba Pol mahgen nemyōs so nivan wotanmas dēn̄ Asos, tō kē tadam nabaklap van anen. 14 Mahē a kē mēdēn̄ kemem me Asos en, tō kemem lep kē labaklap tō gam tasga Mitilene. 15 Taval meyen, kemem gam yak den Mitilene tō van me mahē vitwag a sisqet lepnō Kios. Taval meyen, kemem hatig lokse tō gam heylō me Samos, tō taval meyen nan hag en, kemem qoyo dēn̄ Miletus. 16 Ba Pol nemyōs yeh so van dēn̄ Jerusalem am̄ag den Nōqōn̄ Pentekos. Bastō, kē et buste so tog misin Esia. Tō kē mēdēmdēm so nivan veyvey den Efesas.

17 Bahnentō, mahē kemem vēykal me Miletus en, tō Pol nivētleg goy ige lililwo ne ēm̄ yon̄ a Efesas. 18 Tō mahē a kēy mavan dēn̄ kē me en, tō kē nihole van hiy kēy so, "Kimi mal ēglal galsi namtevuk mahē del a no motogtog tō tiwag mi kimi, meqtēg a no mēdēn̄ tō Esia am̄ag. 19 No memgumguteg Welan mi nēdēm bēbēw, wa natn̄ēh mino molon̄ aē. Ige Juw mepnog nēdēmdēm veg no, tō mak no mololwon aē a nēkēkēn. 20 Ba kimi nēglal so vaga a nok toytoy hiy kimi en, nok et lōn̄veg te nahap vitwag den kimi aso temyin̄ vēh kimi aē. Ba no mohoyhoylō kimi yow aslil, wa mavatne kimi hay lelo ēm̄ vivitwag nonmi. 21 No mal vap vētday hiy ige Juw tiwag mi ige Tikrik so dēmleh, tō van me hiy Ḡod, ba dēmtig Welan nongēn Tigsas.

22 "Ba yon̄teg, Nuvu Yon̄ mal hole maymay me hiy no so nok so van n̄a Jerusalem. Tō nok et ēglal te so nahap taqal no mahē nen. 23 Ino nēglal ēwē so, vel vōnō a nok van aē en, Nuvu Yon̄ nihole vētday no. Kē nihole so no tavan qalgoy yatkel metewot wa nēm̄ yētyēt a nawak tēymat veg no. 24 Nōk et dēmdēm meh te van bēh mino mahgēk. Nage mey a nitiy wē yeh en, so nok so ak qēt namgumgu namuk. So nok ak qēt namgumgu mey a Welan Tigsas melep tō me hiy no so vasemlō Noyoy Ēwē veg besgōp non Ḡod.

25 "Yēhē, togtōkē no nēglal so tateh et den kimi tet lokse vēh nangēk, kimi mey a no mavan walēg tō so vasemlō namyeyen talge van hiy kimi. 26 Tō qiyig gōh nok vap van hiy kimi so vitwag den kimi wo meqlen̄ en, tō no newenwen den, 27 veg no mal vasem qēt van hiy kimi nahap a Ḡod nemyōs so kimi so ēglal.

28 "Ba etetgoy galsi kimi, tiwag mi ige sil a Ḡod mōm̄ōk kēy van lemnemi. Nuvu Yon̄ melep van namgumgu hiy kimi so etgoy nisipsip agōh. Kimi del so van me qele ige etetgoy sipsip, tō kimi so etgoy galsi nēm̄ yon̄ non Ḡod. Veg nēm̄ yon̄ gōh en Ḡod mēwēl yak mi namatmat nonon mahgen.

29 "No nēglal galsi so mahē a no mavanyak den kimi en, yatkel et tavan me qele notok tuytuy, tō tehelhel etgal so ak hethet ige sipsip agōh. 30 Tō yatkel et den kimi a lēvēwti agōh, kēy tahatig vēh so leh nēdēmdēm nonmi den nage mey a nēhēyhēywē. Tō kēy titig helem̄ag vēh ige tin̄qoy van lemtehal mey a et tenenen te. 31 !Bastō, etgoy galsi! Ba dēmsas vaga so bēte vētēl nok et m̄ōkheg te bohohole maymay hiy kimi. Nok vatne kimi vel anqōn̄ wa vel meyen, wa nok ten̄ten̄ vaga hiy kimi. 32 Tō nōk m̄ōk veteg kimi van lemnen Ḡod tiwag mi noyoy besgōp nonon. Noyoy nan telep van hiy kimi navak, tiwag mi navawē mey a Ḡod togtēy tō a veg ige yon̄ del nonon en.

33 "Nok et vesves te hiy nēsēlva, nōḡōl, wa neleleh non net tegha. 34 Kimi mahgemi nēglal so mi namnēk mahgēk nok mugumgu bemyōs mino tiwag mi namyōs non ige mey a mugumgu tiwag mi no. 35 No mal vasem namtehal van hiy kimi so kimi so mugumgu a qele no memgumgu tō, wa biyin̄ ige magamgaysēn. No mavatne kimi so kimi so dēmlok navavap non Tigsas, a kē mavap so, ‘Nēk telep navawē liwo bohoghog, den mey a nēk tēygoy.’ "

36 Mahē a Pol mavap bah navavap del gōh van hiy kēy en, tō kē nivatiqaw hōw, tō nitatay tiwag mi kēy. 37,38 Ige del me ten̄ qēt veg Pol mohole so kēy tit et lokse vēhte nangon. Tō kēy del moytitin goy kē, tō pōpōn qēt kē. Tō kēy vantēy kē labaklap.