1 Lēkle qōn̄ tēvēlēm, Nipris Liwo Ananias mavan Sisaria, kē tiwag mi ige lililwo non ige Juw wa net bele vitwag, nahan Tertulus. Ige gōh mavan me so vasemlō nehet del non Pol van hiy Mayanag Liwo Felix. 2 Tō kēy ōlōl bat me Pol lōyōstiwag, tō Tertulus niqtēg hohole lō nehet non Pol, tō nivap so, "Felix. !Inēk nam̄e et liwo! Natawye metehal ne mugumgu nōnōm netnenen, mak tō ige sil del motog letm̄at tōtēn nēk. Wa natawye haphap mey a et tenenen te en, nēk mak tenenen qēt lokse heylō nēmnay nōnōm. 3 Tō vētmahē del kemem yon̄teg nēwē aē, wa tō kemem vēwē nēk aē. 4 Ba nok et buste so hohole hoyo se van aē. No nemyōs so nēk ukēg kemem so hohole tusu ēwē bege agōh. 5 Kemem metsas so net gōh, ikē net bakak qōqōve haphap. Kē mak solosloteg qēt nēdēmdēm non ige Juw del a lelo mayam. Tō ikē net liwo ne vēwti non Net Tanasaret. 6 Bastō nage vitwag se, kē mehelhel etgal tō so niak solosloteg Nitiy Ēm̄ Bolol. Tō kemem tēy kē aē. [Tō kemem nemyōs so vēvēg kē mi nitiy le nonmem, 7 ba net liwo Lisias mētēy tōqtōqyeg kē den kemem, 8 tō mavayēg kemem so van me hiy nēk.]* Ba nēk mahge qoyo vēvēg kē, tō nēk qoyo etsas mahge van nahaphap del a kē mak geh tō."

9 Wa ige lililwo Tujuw mavap se so natawye hohole nen hēywē.

10 Bahnentō, Mayanag Liwo Felix niak nēvēglal van hiy Pol so kē so nihole. Tō Pol wo, "Mayanag Liwo Felix, veg no nēglal so nēk metgoy tō ige Juw nēte m̄adeg, tō no nemlaklak so vulu goy nohohole nonoy. 11 Nēk soksok etgal tow, so nēk tetsas vēh veg no mavan tō Jerusalem so mogmogo goy Ḡod natkelgi ēwē, et hep te den nōqōn̄ son̄wul nanm̄e vōyō. 12 Tō kēy et etsas te no a nok vēyvēyle tiwag mi net, si akak tōqtōqyeg ige sil lelo Ēm̄ Bolol, si lēm̄ tatay tegtegha, siso lelo vōnō. 13 Tō nemeh mi kēy so vasemlō nahap a kēy mitil tō no aē veg nohohole nan et hēyhēywē te.

14 "Ēwē nohohole vitwag a nēhēyhēywē en, nok damdam namtehal nonon Tigsas tō mogmogo goy Ḡod non ige yatqōtqōnmem. Kēy vap so namtehal nan et tiy metehal te. Ba ino en, no nēdēmtig qēt natawye Le non Mosis, tiwag mi nayapyap del namun ige lēgēlgēg. 15 Tō nēdēmtig mino hiy Ḡod nahaytēyēh a qele nonoy en a nēdēmtig nan aso ige mey nēwē, tiwag mi ige mey nehet, kēy del tahatig qēt lokse den namte. 16 Bastō nok akak etgal so ak nage mey a netnenen hiy Ḡod, wa hiy ige sil.

17 "No mal van yak tō den Jerusalem nēte suvay m̄adeg. Tō no mavan lokse me so leveteg nolol namuk, wa tō so m̄ōk veteg nolol bemyimyin̄ van hiy ige m̄asay Tejerusalem. 18 Mahē kēy metsas no lelo Tiy Ēm̄ Bolol non Ḡod en, no mal wenwen bah lengon Ḡod, tō nok et qul tiwag te mi ige sil, wa tō nok et ak solosloteg tē nēdēmdēm nonoy. 19 Ba yatkel Juw Tesia en, kēy so van me so tig temuy van lengē. Tō sowo no mak hēywē nage mey nehet, tō ige nen a tohole tavale vēh mino aē. 20 Si vēhge ige lililwo gōh, itōk so kēy mahgey vasemlō so kēy metsas te hap mey nehet mi no mahē a no mitig lōyōstiwag nonoy. 21 Ba no mavap ēwē tō nage vitwag, a no nitig lengoy, so ‘!Kēy vēvēg no veg no nēdēmtig so Ḡod tōlōl lok ige nonon den namatmat!’ "

22 Ba Mayanag Felix en, kē nēglal galsi namtehal veg Tigsas. Tō kē mihigoy qōtō nuvug, ba vap so, "Mahē so net liwo Lisias so nivan me en, tō nok qoyo vonm̄ēt nēdēmdēm veg kimi." 23 Tō Felix mōlvayēg ige lililwo non ige bepgapgal so tēy goy qōtō Pol. Ba kē mavap van hiy kēy so kēy su ukēg Pol nitatal m̄ōleg, tō ukēg ige nonon van me vatēp kē tō lep te hap van aso kē nemyōs.

24 Lēkle qōn̄ vēvēh qiyig en, Felix kōyō ēgnōn nahan Drusila, nalqōvēn Tujuw, kōyō mavan me. Tō kōyō vētleg goy Pol so yon̄teg temōyō nakaka a Pol nikaka gatay nēdēmtig veg Kraēs Tigsas. 25 Tō Pol nihohole gatay namtehal botogtog tenenen, tō bitigtigoy et den nahaphap mey nehet, wa bēvēvēg non Ḡod mey a tavan me. Ba Felix moyon̄teg nakaka en, tō kē memtēgteg aē, tō nivap van hiy Pol so, "Itōk, nēk van qōtō. Nok qoyo vētleg goy nēk lōqōn̄ tegha." 26 Lamahē nen, nēdēmdēm non Felix so Pol telep bat te sēm van hiy kē so ukēg taywah kē den lēm̄ yētyēt. Tō a Felix nivētvētleg goy Pol vaga qelenen, tō nikaka tiwag mi kē.

27 Bahnentō lēkle ēte vōyō en, Felix nibah den natno liwo, tō Posius Festus nileh kē. Ba Felix mak so Pol nihag lap lēm̄ yētyēt, veg kē nemyōs so niak malaklak ige lililwo Tujuw.