Namgumgu Namun Ige Hal 23

1 Pol metyak van hiy ige lililwo Tujuw ne Sanhedrin, ba nihole van hiy kēy wo, "Yēhē yathithik, lēh mino del, no motogtog galgalsi lengon Ḡod gaydēn̄ me qiyig agōh."

2 Tō Nipris Liwo Ananias nivap van hiy ige tig sisqet tō Pol en so kēy so woh nan̄yan. 3 Tō Pol vap van hiy kē so, "!Ḡod towoh se nēk! !Inēk qele nōtōytōy ne ēm̄ aslil a nelm̄eh qagqag galsi, ba alon en nelem! Nēk hag tō nen so vēvēg no mi Nele non Mosis, ba nēk et tatag te Nele nan. Veg nēk mōsōyteg kēy so woh no, ba Nele nagatgoy."

4 Tō ige a tig sisqet tō Pol en hole van hiy kē wo, "!Et wē te so nēk hole qelenen van hiy Nipris Liwo non Ḡod!"

5 Ba Pol meplu wo, "Nemgaysēn, ithik, no et ēglal te aso ikē Nipris Liwo en, veg Nayapyap Yon̄ mavap so, ‘Nitog vavap hethet hiy net mey a nilwo goy ige sil.’✝23:5 Exodus 22:28 "

6 Ba Pol nēglal so yatkel et den kēy ige Sadusi, wa yatkelgi ige Farisi, tō nēvēwti vōyō nen kēy vēy vavaleh tasga. Bastō kē nōlōl van hiy kēy del so, "Yēhē yathithik, ino Nafarisi, wa yatmekmek se, kēy Nafarisi, tō kēy vēvēg no veg no nēdēmtig so Ḡod tōlōl lok ige nonon den namatmat."

7 Nohohole nonon mak tō so ige Farisi wa ige Sadusi qētēg vēyvēyle liwo aē, tō kēy vēlwoy aē nēvēwti vōyō. 8 (Veg ige Sadusi nēdēmtig so mahē net so nimat en, kē tit hatig lokse vēhte. Tō kēy dēmtig so tateh in̄sel, wa tateh vu geh lemyam. Ba ige Farisi en, nēdēmtig nonoy netegha. Kēy nēdēmtig so nahaphap del gōh aē.) 9 Tō nēvēygēl liwo mahatig van a lēvētne yōstiwag en. Bahnentō, yatkel vatvatgo ne Le den ige Farisi hatig hag nen tō hole mi nololgagay so, "!Kemem et etsas te hap mey nehet te aso net gōh mak tō! Wun nin̄sel siso nuvu mohole van hiy kē."

10 Tō kēy mēvēy vavaleh van nen e tō sisqet so kēy vēy titit. Tō net liwo non ige bepgapgal nen memtēgteg goy so kēy tiple hay mununuy Pol. Tō kē nivētleg ige vagapgal so van tēqēl yow, ba lepyak Pol, tō van tēy lokse kē n̄a lēm̄ non ige vagapgal.

11 Anqōn̄ nan en, Welan nivan me hiy Pol tō nivap so, "!Nitog mētēgteg! Nēk so vasemlō se no Rom, qele a nēk mal vasemlō tō no Jerusalem en."

12 Taval meyen nan hag nen, Ige Juw hay tiwag van tō vonvon so wuh mat Pol. Kēy mavatvat so kēy tit gen te hap vēhte tō tit in te hap vēhte gaydēn̄ a kēy wuh mat Pol. 13 Ige a mōm̄ōk nēdēmdēm gōh en, kēy tege son̄wul vet. 14 Tō kēy van tō vasem van nēdēmdēm nonoy hiy ige pris lililwo tiwag mi ige lililwo Tujuw so, "Kemem mavatvat mahgemem so kemem tit gengen vēhte siso in te hap vēhte gaydēn̄ a kemem wuh Pol. 15 Tō kemem nemyōs so kimi so ak qelegēn, atmi vētleg noyoy hay hiy net liwo non ige bepgapgal so lep tēqēl me Pol lōyōstiwag, tō so kimi vēhge te vēvēhiy van hiy kē. Tō kemem tataq dēyē kē a metehal so wuh mat kē."

16 Ba moyōn Pol moyon̄teg gēdi nohohole non ige nen, tō kē nivan tō nivasem van hiy Pol a lēm̄ non ige bepgapgal. 17 Tō, Pol niōlōl noyowyowveg non net liwo, tō nivap van hiy kē so, "Vantēy nōlōmgep nōk hiy net liwo, veg noyoy namun aē mi kē." 18 Tō noyowyowveg nan nilep nōlōmgep nen hay hiy net liwo tō nivap so, "Pol a lēm̄ yētyēt vap so nok so vantēy me nōlōmgep gōh hiy nēk, veg noyoy namu aē mi kē."

19 Tō net liwo nan nitēy namne lōmgep nan, tō kōyō van mahē a nabat, tō kē nivēhge kē van wo, "?Nēk so vap nahap me hiy no?"

20 Tō nōlōmgep wo, "Ige Juw mal vonm̄ēt so vētleg me hiy nēk so lep tēqēl Pol yow lōyōstiwag talōw. Ba kēy so ak ēwē so kēy so vēhge te vēvēhiy van hiy kē. 21 Ba nitog dēmdēmtig kēy van, veg yatkel et den kēy so taq dēyē kē a lēvēt metehal so wuh kē. Kēy nehep den son̄wul vet, wa kēy mal vatvat mahgey so kēy tit gengen vēhte siso tit in te hap vēhte gaydēn̄ a kēy wuh kē. Tō kēy dēyēnyē ēwē so nēk so wēhgoy."

22 Net liwo nen nivētleg yak nōlōmgep nen, ba nivap van hiy kē so, "Nitog vavaplō se so nēk mal vasemlō me noyoy gōh hiy no."

Kēy vētleg yak Pol n̄a Sisaria

23 Tō net liwo nen niōlōl me ige yowyowveg nonon tō nivap van hiy kēy so, "No nemyōs yatkel et so van Sisaria, etyak tēymat ige bepgapgal m̄eldēl vag yō. Bastō ige beplaplag lohos son̄wul liviyō, tiwag mi ige mey nētēy nesey m̄eldēl vag yō. Atmi tēytēymat so van qiyig anqōn̄ a lelo levevet. 24 Ba lep van nohos vitwag hiy Pol so niplag qiyig aē. Tō etgoy galsi kē lemtehal gaydēn̄ kimi lep kē van lemnen Mayanag Liwo Felix."

25 Tō net liwo mayap neletes vitwag van hiy Felix, so,

26 Den Kladius Lisias.

Hiy Mayanag Liwo Felix.

Lemtap nēwē.

Nok so vasem ēwē van hiy nēk veg net agōh. 27 Net gōh, ige Juw mētēy kē, tō kēy helhel etgal so wuh kē. Ba veg no nēglal aē so ikē nētēgvōnō Torom en, tō no tiwag mi ige bepgapgal mino mavaēh kē. 28 Ba no nemyōs so ēglal aē so kēy etet hethet tō kē gōh bahap. Tō no melep bat kē me lōyōstiwag liwo nonoy so vēhge kēy so nēdēmdēm nonoy qeleave. 29 Tō no metsas van so kēy mitil ēwē kē bele nonoy, ba tateh hap mey nehet a kē magaleg, tō kēy so wuh kē aē, siso m̄ōk kē lēm̄ yētyēt. 30 Mahē no moyon̄teg so ige Juw movonm̄ēt nēdēmdēm so wuh kē en, ba nok vētleg nowmat kē me hiy nēk. Tō no mavap tēymat van hiy ige Juw nan so kēy so vasem van hiy nēk nahap mey nehet a kē mak tō.

31 Tō ige bepgapgal nen mak tatag qēt nahap a net liwo nonoy mavayēg tō van hiy kēy. Tō kēy lep Pol tō vantēy gaylat ēwē kē dēn̄ lepnō Antipatris anqōn̄ anen. 32 Tō taval meyen nan hag, kēy vēlwoy kēy, tō ige beplaplag lohos vantēy tēqēl Pol Sisaria. Tō ige bepgapgal yatkelgi m̄ōl kal lok lēm̄ nonoy Jerusalem. 33 Kēy dēn̄ Sisaria en, tō kēy lep neletes van hiy Mayanag Liwo Felix, tō vayēg veteg van Pol hiy kē.

34 Mayanag Liwo meptaptah bah neletes en, tō kē mēvēhge Pol so kē nagetive, tō Pol meplu so kē nage Tisilisia. 35 Bastō, Mayanag Liwo wo, "Itōk. Mahē ige a mitil tō nēk van dēn̄ me en, tō nok qoyo vēvēg nēdēmdēm nan." Tō Mayanag Liwo mavayēg ige bepgapgal nonon so tēy Pol ba etgoy kē lēm̄ non kapman mey a Herod mowos tō.