1 Net vitwag, nahan Ananias, tiwag mi ēgnōn, nahan Saphira, kōyō men̄yeg natkel vētan noyō. 2 Ba kē mohog ēwē van natkel sēm hiy ige hal, tō magalgal so nēsēm del bēvētan anen. Ba kē mōlōn̄veg bat natkel sēm so nonon. Tō ēgnōn nēglal galsi aē, veg kōyō mepnopnog tō so ak qeleanen.

3 Bahnentō, Pita mavap van hiy kē wo, "?Ananias, bahap tō nēk mukēg Satan so nitig helem̄ag nēdēmdēm nōnōm? !Nēk magalgal Nuvu Yon̄ anen! Veg nēk mētēy lōn̄veg natkel sēm ne vētan en so nōnōm mahge. 4 Am̄ag a nēk et n̄eyeg qete en, nēvētan nan nōnōm. Tō nēk men̄yeg en, tō nēk so tēygoy qēt, veg nēsēm nan en nōnōm. ?Nēk magalgal qele gōh bahap? !Nēk et galgal te net, nēk galgal Ḡod anen!"

5 Ananias moyon̄teg van nohohole gōh en, tō vag tiwag ēwē kē nisisgoy tō nimat. Tō ige del a moyon̄teg noyoy gōh en, kēy memtēgteg qēt aē. 6 Tō yatkel lōmlōmgep hayveg hay me, tō m̄on kē, tō hah lō kē, tō tivig kē.

7 Et misin hōn te a lōqōn̄ anen, ēgnōn nihayveg me, ba kē et ēglal qete aso Ananias mal mat en. 8 Tō Pita nivēhge van hiy kē wo, "Saphira, vasem galsi tow so nēsēm ne vētan a kōmyō men̄yeg tō en vēvēh. ?Bah a kōmyō melep me en siso natkelgi nan lapgetō?"

Ba Saphira so, "Nēsēm nan bah anen."

9 Tō Pita wo, "?Bahap tō kōmyō natm̄an nōnōm magalgal Nuvu Yon̄? !Et van kē! Ige a metvig tō natm̄an nōnōm en tig sey tō lemte ēm̄ agōh. !Kēy so hah lō se nēk!"

10 Vag tiwag ēwē anen nalqōvēn nen nisisgoy hōw a leyn̄on ige hal en tō nimat. Ige lōmlōmgep nen hayveg me en, tō et van qelekē so kē mal mat. Tō kēy hah lō se kē, ba tivig kē a laqaqayan natm̄an nonon. 11 Tō namtēgteg liwo maqal ige tēlēm̄ yon̄, tiwag mi ige sil del a moyon̄teg van qele agōh.

12 Tō Nuvu Yon̄ mak nēvēglal wa naphah m̄adeg heylō namnen ige hal lengon ige sil. Ige tēlēm̄ yon̄ qultiwag galsi, tō vaga kēy yōstiwag a Litiy Ēm̄ Bolol, a Lamalmali Ēm̄ non Solomon. 13 Ige tegha nēdēmap ige tēlēm̄ yon̄, ba et yōstiwag te mi kēy, veg namtēgteg aē mi kēy. 14 Tō Nuvu Yon̄ nituan se net m̄adeg hiy kēy a nēdēmtig Welan, ige tam̄an wa ige lōqōvēn. 15 Bahnentō ige sil melep me ige gom lemtehal a Pita nivanvan aē. Kēy muwulhiy kēy how latamge wa leqe nonoy, tō so nēnēnēn Pita niqal yatkel et den kēy. 16 Tō ige sil m̄adeg mavan me den vel vōnō yatkelgi sisqet Jerusalem. Kēy mēvēl me ige mey nogom, wa ige mey a nuvu het maqal tō kēy. Tō kēy del mēwē lokse.

17 Tō Nipris Liwo tiwag mi ige lēvēwti nonon, a nēvēwti nan a ige Sadusi en, kēy moyow hatig veg kēy meqneg ige hal. 18 Tō kēy mētēy kēy, tō mōm̄ōk kēy lēm̄ yētyēt. 19 Tō anqōn̄ nen, nin̄sel non Welan niwak namte-ēm̄ ne ēm̄ yētyēt tō nitig helem̄ag kēy, tō kēy kalō aslil. Tō kē nivap so, 20 "Atmi van tig n̄a Litiy Ēm̄ Bolol, tō vasemlō hiy ige sil del noyoy ne eh lap."

21 Bastō lemtap qōtō en, ige hal makalbat hay Litiy Ēm̄ Bolol tō kēy qētēg vatvatne, qele a nin̄sel mavap tō en. Ba taval Ēm̄ Yon̄ en, net m̄agoy ige pris tiwag mi ige lēvēwti nonoy en, kēy ōlōl tiwag kēy me nēvēwti mayanag, a kēy ōl so Sanhedrin. Lōyōstiwag gōh en, kēy mōlōl vel mayanag del, wa vel et lililwo del non ige Tisrael. Kēy mētēymat bah en, tō kēy ōlvayēg so lep lō me ige hal den lēm̄ yētyēt.

22 Mahē ige yowyowveg nonoy van dēn̄ me lēm̄ yētyēt en, kēy et etsas te kēy. Tō kēy van lok tō vasemlō lok van hiy ige lililwo so, 23 "Kemem mēdēn̄ lēm̄ yētyēt en, tō namte ēm̄ matabeg maymay, wa net bēlēltegoy tigtō aslil en, ba mahē kemem mawak namte ēm̄, tateh su et geh alon."

24 Kēy moyon̄teg noyoy nen, tō net m̄agoy ige bēlēltegoy ne Ēm̄ Yon̄, tiwag mi ige m̄agoy ige pris en, kēy mamakē aē wa kēy et ēglal te so kēy tak qeleave. 25 Ba net vitwag mēdēn̄ kēy, ba vap van hiy kēy so, "!Atmi et! Ige a kimi mōm̄ōk tō kēy lēm̄ yētyēt en, kēy tigtō a lelo Tiy Ēm̄ Bolol, wa kēy vatvatgo ige sil."

26 Bahnentō net m̄agoy bēlēltegoy ne Ēm̄ Yon̄ tiwag mi ige nonon mavan ba melep kēy me. Ba net m̄agoy mavan yon̄yon̄ ēwē, veg kēy mētēgteg so ige sil tiple yim mat kēy mi nevet.

27 Kēy melep kēy me tō mēvētgiy kēy lengon ige Sanhedrin. Tō net m̄agoy ige pris mavap maymay hiy kēy so, 28 "Kemem mal gatgoy maymay tō kimi so kimi nitog vatvatgo se lahan net anen. Ba nahap a kimi mavatvatgo tō mal lilip goy Jerusalem. Tō kimi nēqēt maymay so til kemem bamatmat nonon."

29 Tō Pita wa ige hal meplu goy so, "!Kemem yon̄teg vēlēs Ḡod ba et ige et te! 30 Ḡod non bōbō nongēn melep kal Tigsas den namatmat, kē a kimi mowos kal kē lowolwol so wuh kē. 31 Tō Ḡod melep kal kē tō m̄ōk veteg kē lemtō nonon. Tō Ḡod mōm̄ōk kē namyanag liwo wa kē ivaēh nongēn, tō so kē nimyin̄ ige Tisrael so kēy dēmleh, tō nidēmveteg nēmgōy. 32 Tō kemem vasemlō so nahaphap gōh hēywē. Wa vitwag se Nuvu Yon̄ nivasemlō nēhēyhēywē. Ḡod mal lep Nuvu Yon̄ van hiy ige et a kēy noyon̄teg kē."

33 Ige lililwo moyon̄teg, tō moboel aē, tō kēy nemyōs so wuh mat kēy. 34 Ba net Farisi vitwag, nahan Gamaliel, kē mitig hag lengoy bohohole. Ikē navatgo vitwag Bele, tō kēy del nēdēmap kē. Tō kē nivap van hiy kēy so lep lō qōtō ige hal tusu.

35 Tō kē mavap so, "Yēhē ige Tisrael, dēmdēm galgalsi bahaphap a kimi ak tō hiy kēy en. 36 Kimi dēmlok net Tadias, mey am̄ag. Kē mavan me net liwo vitwag. Kē mohole sotel kē so kē net liwo vitwag, tō kē mēvēl ige et nonon m̄eldēl vag vet (400). Ba ige Torom muwuh mat kē, tō ige et nonon mavan qeleqlen̄. Tō nahaphap del yeghuquy ēwē. 37 Lēklan me atgiy, mahē kēy leplep nahan ige sil en, Judas nage Takalili mavan me net liwo. Kē mōm̄ōk ige nonon so tavale tiwag mi nele. Tō ige Torom muwuh mat se kē, tō ige del a mēdēmtig kē meqleqlen̄ se.

38 "Tō nok so vap van hiy kimi so, vanyak den ige agōh. Ukēg tow kēy qelenen. So kēy wo mugumgu tō tatag nēdēmdēm non net ēwē, tō namgumgu namuy tit tig vēhte. 39 Ba sowo kēy wo mugumgu tatag namyōs non Ḡod en, tō kimi tit higoy vēhte. !Tō kimi tepgapgal ēwē tiwag mi Ḡod mahgen!"

Bahnentō ige lililwo nen mēwēhgoy kē. 40 Kēy mōlōl bat me ige hal, tō kēy melm̄eh kēy, ba mihigoy so kēy nitog hohole se lahan Tigsas. Tō kēy ukēg taywah kēy.

41 Mak tō, ige hal mavan yak den nōyōstiwag Sanhedrin mi namlaklak. Kēy nemlaklak veg Ḡod met van so kēy nesey so ige sil ak mamayge kēy, veg bahan Tigsas. 42 Tō vel qōn̄, Litiy Ēm̄ Bolol wa vel ēm̄ del, kēy et ukēg te so vatvatne tasga wa vasemlō noyoy ēwē veg Kraēs Tigsas.