1 Mahē kemem mēdēn̄ galsi aslil en, tō kemem mēglal van so napnō gōh nahan Malta. 2 Nasm̄al niqtēg sam̄al wa mahē nomomyiy, ba ige telepnō nan natamtam, veg kēy meben nep liwo tō lep vasgēt kemem del.

3 Tō Pol nivēlvēlsey me nēyēt lēt liwo, tō nim̄ōksey nēyēt lēt hag apwo ep. Mahē a nep mesew en, tō nam̄at n̄itn̄it nitesolō me, tō nin̄it maymay namnen Pol. 4 Ige lepnō nen et van qelekē nam̄at n̄itn̄it dam tō lemnen Pol, tō kēy hohole mahgey so, "Net gōh, ikē net buwuwuh et! Ikē et mat te lenaw, ba ḡod bēvēvēg et buste so kē niēh." 5 Ba Pol metetetn̄eg namnen ewo tō nam̄at nan nisisgoy n̄a lep. Ba Pol et metewot te. 6 Ige sil mēdēmdēm so namnen Pol tēyēg, siso kē tisisgoy tō nimat. Tō kēy menyē tō metgoy kē van a nemsin, ba tateh hap niak Pol aē. Bastō kēy leh lok nēdēmdēm nonoy, tō vap so, "Akē ḡod vitwag agōh."

7 Ba mahē a kemem tog tō aē en et yeh te den nēvētan non mayanag telepnō anen, nahan Publius. Kē melep vasgēt kemem n̄a lepnō nonon, wa metgoy galsi kemem. Tō kemem motog tiwag mi kē bōqōn̄ vētēl. 8 Ba imam non Publius nogom liwo, nogom momyiy nak kē, wa natqan meplag. Tō Pol nivatēp kē, wa nim̄ōk namnen hag apwon net gom nan, nitatay goy kē, tō kē niwē lokse. 9 Lēklan me atgiy, ige gom del lepnō nen van se me hiy Pol en, tō kēy se mēwē. 10 Tō kēy mēdēmap kemem tō mēvēl me natapēva a nam̄adeg. Tō kemem motog tiwag mi kēy nōwōl vētēl. Mahē a kemem tēytēymat so van en, kēy mēvēl se me hiy kemem nahaphap aso biyin̄ kemem aē lemtehal.

11 Nabaklap vitwag mahal lap tō lepnō gōh mahē nelen̄ namaymay. Nabaklap nan Taleksanria, tō ige labaklap meplakas nango qētok mi nototgal non ḡod vayam nonoy. Tō kemem gam yak lok mi nabaklap nan. 12 Tō kemem mēdēn̄ lepnō liwo Sirakus, tō memtiy bōqōn̄ vētēl. 13 Tō kemem ēqyeg, tō gam walēg hiy Regium. Tō taval meyen Nelen̄ Hey nihatig. Tō taval meyen lokse kemem dēn̄ me Puteoli. 14 Tō kemem metsas ige dēmtig yatkelgi van anen, tō kēy mēvēhge kemem so tog tiwag mi kēy niwik vitwag. Bahnentō kemem hatig den mahē nen tō vanvan hiy Rom.

15 Tō ige dēmtig n̄a Rom en moyon̄teg so kemem vanvan me ēgēn, tō kēy vanvan me wa vēyhēgēt mi kemem lemtehal. Ige gōh mavan me a yeh tewiwi, yatkel et mavan me den Apius Maket, wa yatkel et se den napnō a nahan Nabangalo Vētēl. Mahē a Pol metsas kēy en, nēhyēn mamaymay lok, tō kē mēvēwē Ḡod aē.

16 Bahnentō, kemem dēn̄ me Rom. Tō ige bepgapgal mukēg Pol so nitog mahgen tiwag mi net bepgapgal vitwag aso nietetgoy kē. 17 Lēkle qōn̄ vētēl Pol nivētleg goy ige lililwo non ige Juw a van lepnō anen. Kēy mavan tiwag me en, tō kē nivap van hiy kēy so, "Yēhē yathithik, nok et ak te hap mey nehet te hiy ige sil nongēn siso lēvēnan ige yatqōtqōngēn. Ba kēy mētēy no n̄a Jerusalem tō mōm̄ōk no van lemnen ige Torom. 18 Tō ige Torom mēvēhge sosok so no mak nahan het, ba kēy et etsas hōn te het te aso no tamat vēh aē. Tō kēy nemyōs so ukēg wawah no den nēm̄ yētyēt, 19 ba ige Juw et buste. Bastō no mēvēhge mimiy ēwē so Sisa so nivēvēg no. Ba nok et vap te hap mey nehet te hiy ige sil mino. 20 Veg bege goh en, no mēvēhge so yōstiwag mi kimi aē. Kēy mēlēg no mi nējēn gōh veg no nēdēmtig navatvat a Ḡod melep tō van hiy ige Tisrael."

21 Tō ige Juw nen vulu goy kē van so, "Kemem et tēy te letes te siso noyoy veg nēk den Judea. Wa ige yathithimi mey a mal van tō me den Judea en, kēy et vasemlō te hap mey nehet te veg nēk, tateh. 22 Ba kemem nemyōs so yon̄teg nēdēmdēm nōnōm. Veg gēn nēglal so ige sil a vel mahē geh nōk en, kēy hole visipteg tō nēvēwti nōnōm."

23 Tō Pol tiwag mi ige Juw nen etyak nōqōn̄ vitwag aso kēy so yōstiwag aē. Lōqōn̄ nen en, ige Juw m̄adeg woy mavan me tō met Pol a mahē a kē togtog aē en. Meqtēg lemtap, dēn̄ lemyēpyep en, kē mavap m̄ōleg nēdēmdēm ne meyeyen talge non Ḡod. Wa kē makak etgal so kēy dēmtig nēdēmdēm veg Tigsas. Mahē a kē nihohole qelegōh en, kē nihole gatay Nele non Mosis tiwag mi nayapyap namun ige lēgēlgēg.

24 Yatkel Juw mēdēmtig nohohole non Pol, ba yatkelgi et dēmtig te. 25 Tō ige Juw m̄ōlm̄ōl ba a mi nēvēy vavaleh vēlēs. Ba am̄ag den kēy m̄ōlm̄ōl en, Pol nihole nage vitwag van hiy kēy so, "Nohohole a Nuvu Yon̄ mohole heylō net lēgēlgēg Isaya van hiy ige tamatmayge nongēn hēyhēywē, so,

26 ‘Nēk van ba vasem van hiy ige nōk so

kimi toyon̄teg, toyon̄teg ba kimi tit yon̄teg vēglal vēhte.

Kimi tet, tet, ba tit et vēglal vēhte.

27 Veg nēdēmdēm nonoy mal maymay qēt,

wa nēdēln̄ay mal wonwon,

wa kēy mal vatqep namtay.

So tateh tō en, togtō kēy tet mi namtay,

wa toyon̄teg mi nēdēln̄ay,

wun kēy tōm̄ōleg vēh lēdēmdēm nonoy.

Tō kēy teleh vēh nēdēmdēm nonoy tō dēmtig no,

tō no tak wē lokse kēy.’✝

28 "Bastō nok vaplō van hiy kimi so Ḡod tēvētleg noyoy nonon bēh gayaq hiy ige mey a et Juw te, tō ikēy en, kēy toyon̄teg."

29 [Kē mohole bah en, tō ige Juw m̄ōlm̄ōl ba a mi nēvēy vavaleh vēlēs.]*

30 Pol motog bēte wonwon vōyō lēm̄ a kē niwēlwēl. Tō ige mey a vanvan me so vatēp kē en, kē telep vasgēt kēy del. 31 Kē nitoytoy bemyeyen talge non Ḡod, wa nivatvatne ige sil veg Welan Tigsas Kraēs, a tateh dēmdēm mētēgteg geh mi kē, wa tateh et nihigoy kē den nohohole.