Namgumgu Namun Ige Hal 3

Pita mak wē net vitwag a neqyus

1 Lōqōn̄ vitwag en, Pita kōyō Jon mavan me Litiy Ēm̄ Bolol a lelo vētēl a lemyēpyep, togolgol lelo a kēy tatay aē en. 2 Ba net vitwag gōh, kē mowot me neqyus*3:2 Navap neqyus en, nēdēmdēm nan so kē et vanvan te, ba nihag ēwē mahē vitwag.. Vel qōn̄ del kēy lep kē me lemtegeay ne Ēm̄ Bolol. (Namtegeay nan a kēy ōlōl so "Newenwen.") Tō kē nivēvēhge nēsēm den ige sil mey a kēy vanvan basay kē so hayveg kal Lēm̄ Yon̄ alge.

3 Kē nihaghag en, ba met Pita kōyō Jon van me so hayveg hay Lēm̄ Bolol. Tō kē nivēhge van hiy kōyō nēsēm. 4 Ba Pita kōyō met tenenen van hiy kē, tō vap so, "Et me hiy kamyō."

5 Kē met van hiy kōyō, a kē dēm van so kē telep te hap den kōyō. 6 Tō Pita mavap so, "Nēsēm liwo wa nēsēm su tateh mi no, ba nahap a aē mi no en, nok lep van hiy nēk. !Lahan Tigsas Kraēs Tanasaret, nēk hatig ba vanvan!"

7 Pita nitēy namnen mey namtō, tō niyap kal kē. Tō vag tiwag ēwē nayn̄on niwē. 8 Tō kē niyow ketket, nivanvan. Tō kē nihayveg tiwag mi kōyō lelo Ēm̄ Bolol. Tō kē nivanvan kēlkēl, niyowyow, wa niōl liwo nahan Ḡod.

9 Ige sil metsas so kē mavanvan kēlkēl tō mōl liwo Ḡod en, 10 tō kēy mamakē aē veg kēy nēglal so kē net bēvēhge sēm Lemtegeay Wenwen. Tō ige sil mam̄alyow a nēkēkēn bahap a mak wē kē.

Pita nihohole van hiy ige sil

11 Net a meqyōs tō en, kē mēsēl goy Pita kōyō Jon. Tō ige sil mam̄alyow aē, wa ige sil se mosotaq veg kē. Tō kēy meplaplag me mahē nan, a Lamalmali Ēm̄ non Solomon. 12 Pita met van hiy kēy en, tō kē wo, "Yēhē ige Tisrael, bahap tō kimi mamakē aē? ?Bahap tō kimi etet me hiy kamyō? ?Kimi dēm so net gōh mavanvan kēlkēl en, so veg kamyō netnenen? Kamyō et ak wē te kē mi naman non mamyō. Tateh. 13 Ḡod non Abraham, Isak, Jakop, wa Ḡod non ige yatqōtqōngēn en, kē mak naphah gōh tō so niōl liwo net mugumgu nonon. Nok hole veg Tigsas, mey a kimi mitiayak kē, tō m̄ōk kē van lemnen Paelat so wuh mat kē. Paelat nemyōs so ukēg taywah kē en, ba kimi mēlēn̄lēn̄teg kē. 14 Kimi mēlēn̄lēn̄teg Tigsas mey noyon̄ wa netnenen, tō kimi mēvēhge Paelat so ukēg taywah net wuhbel van hiy kimi. 15 Tō kimi muwuh mat nōtōti ēh, ba Ḡod melep kal lok kē den namatmat. Kemem met tō kē mi namtamem, a kē mahatig lokse den namatmat. 16 Heylō nēdēmtig lahan Tigsas en, net gōh, a kimi net vēglal, kē namaymay. Nahan Tigsas, wa nēdēmtig a nivan me heylō kē en, kē mavaēh net gōh lengomi.

17 "Yēhē yathithik, nahap mey nehet a kimi magaleg en, no nēglal so kimi mak veg kimi et ēglal te aē, wa ige lililwo nonmi se. 18 Ba igōhkē namtehal a Ḡod maktig nahap a ige lēgēlgēg melgēg tō, a kēy vap so Kraēs nonon toyon̄ memeh. 19 Tō togtōkē, atmi wulyis nēdēmdēm nonmi, ba van me hiy Ḡod tō so kē nak wenwen kimi den nubug naganmi. Wa tō so Ḡod telep me navawē nonon hiy kimi, 20 wa tō so kē tēvētleg me Kraēs. Veg Ḡod mōm̄ōk Tigsas so ikē Kraēs, tō kē so nimyanag goy kimi. 21 Tigsas totog hag lōtōk alge en gaydēn̄ a Ḡod tak wē lokse nahaphap del. Mey nen nahap a kē mavatvat tō am̄ag heylō ige lēgēlgēg yon̄ nonon. 22 Veg Mosis mavap so,

Welan Ḡod nonmi telep kal net lēgēlgēg vitwag qele ino. Ikē net vitwag den kimi. Tō kimi so yon̄teg kē bahaphap del a kē nihole van hiy kimi.

23 Veg net mey a et yon̄teg te kē en, Ḡod totot yak kē den ige sil tō kē tamatlat.✝3:23 Deuteronomy 18:15, 18-19

24 "Hēywē, togtōkē nahaphap del mey a ige et lēgēlgēg mohole gatay tō am̄ag en, nahaphap nan niakaktig lengōngēn. Qētēg mi Samuel gaydēn̄ ige et lēgēlgēg a mavan me atgiy, kēy mohole gatay qiyig agōh. 25 Tō kimi ige nētnētm̄ey non ige lēgēlgēg, tō kimi tadam tatag navatvat a Ḡod mavatvat tō hiy kēy am̄ag. Ḡod mavatvat van hiy Abraham so, ‘Heylō yantēnti, no tavawē ige sil del telemyam.’✝3:25 Genesis 22:18, Genesis 26:4 26 Tatag van lemtehal nan en, kē melep kal net mugumgu nonon. Tō kē mēvētleg me hiy kimi am̄ag so nivawē kimi. Navawē nan en, kē niwulyis kimi den namtevumi mey nehet."