Namgumgu Namun Ige Hal 14

Pol kōyō Banabas vatēp Ikonium

1 Mahē Pol kōyō Banabas dēn̄ me lepnō Ikonium, kōyō mavan lēm̄ tatay non ige Juw qele kōyō galeg vaga en, tō kōyō toytoy van hiy ige sil, ba notoytoy mēwēwē bah. Tō mayap ige Juw tiwag mi ige m̄adeg Tikrik, tō kēy dēmtig Tigsas. 2 Ba ige Juw mey a et dēmtig te Tigsas en, kēy mavan velvel hiy ige mey a et Juw te so tig het ige a nēdēmtig. Mak tō ige sil dēmdēm hethet hiy ige yathēthēn aē. 3 Bastō, yoge hal nen motog lepnō nen nusu hoyo, tō kōyō et mētēgteg te, ba motoytoy lahan Welan. Kōyō mavatne gatay nasgōp non Welan. Tō Welan melep van naman nonon hiy kōyō so galeg naphah wa nēvēglal so vasemlō so nohohole nonon hēyhēywē. 4 Tō ige lelo vōnō nen motog vēlwoy, veg yatkelgi madam yoge hal, bastō yatkelgi madam ige Juw.

5 Mak tō niviwti a et dēmtig te noyoy ēwē en, kēy muqultiwag so vēyle tiwag mi yoge hal. Niviwti nen, kēy ige Tujuw tiwag mi ige a et Juw te, wa tō ige lililwo nonoy. Kēy movonvon tiwag so yim mat kōyō. 6 Ba yoge hal moyon̄teg noyoy gōh en, tō kōyō meplaplag qeleqlen̄ tō mavan lepnō tegha. Tō kōyō mavan loprovēns tegha, Likaonia. Tō kōyō mavatēp walēg napnō Listra tiwag mi Dēbē, wa tō mavan velvel lepnō geh nen. 7 Tō kōyō mavasemlō tasga noyoy ēwē lelo vōnō geh anen.

Ige sil a Listra en, kēy dēmdēm so Banabas kōyō Pol yoge ḡod nonoy tam̄ag

8 Van lepnō Listra en, net vitwag aē a mowot me naqyus. Lēh del nonon en, kē et vanvan hōn te. 9 Kē nihaghag ba niyon̄yon̄teg van nohohole non Pol. Tō Pol met togolgol van hiy kē, tō met vēglal so net gōh nēdēmtig, tō nēdēmtig nan tavaēh kē. 10 Tō Pol magayka a nilwo so, "Hatig, ba tig ketket!" Vag tiwag ēwē naqyus nen niyowhatig, tō nivanvan kēlkēl.

11 Mahē a ige sil met van nahap a Pol mak en, tō kēy ōlōl lagatgat Tilikaonia so, "!Yoge ḡod mēhēw tēqēl me qele net ēgēn!" 12 Tō ige sil nen qētēg ōl kōyō mi nahan ḡod tam̄ag nonoy. Banabas, kēy mōl kē so "Zeus," wa mōl Pol so "Hermes." Veg Pol, kē net bohohole noyō qeleso Hermes net bohohole non Zeus.*14:12 Zeus wa Hermes en, kōyō ḡod galgal nonon ige Tikrik. Zeus en, namyanag liwo non ige ḡod, wa Hermes noyowyowveg nonon.

13 Nēm̄ yon̄ non Zeus sisqet napnō. Tō nipris lēm̄ yon̄ nen mētēymat so niak nolol vitwag van hiy yoge hal. Kē melep me yatkel bōlōk, tō niheygoy kēy mi nakaskas, tō melep me lemtegeay ne vōnō so wuhmat kēy. Veg nipris tiwag mi ige sil nemyōs so galeg nolol aē.

14 Ba Banabas kōyō Pol moyon̄teg en, tō valaplag me hiy ige sil, mahayhay namalsam nōyō veg kōyō mololwon a nēkēkēn. Tō kōyō ōlōl van hiy kēy wo, 15 "?Yēhē, bahap tō kimi so ak nage qelegōh? !Kamyō net woywoy ēwē qele kimi en! Kamyō vanvan tēy me noyoy ēwē hiy kimi gatay nitiy Ḡod. Veg ige ḡod tam̄ag, kēy yeghuquy ēwē. !Atmi van me hiy Ḡod mey a nēh, a kē mitin̄ nōtōq, nēvētan, nanaw, wa nahaphap del geh van alon en! 16 Me am̄ag en, Ḡod mukēg ige telemyam so tatag vēlēs nēmētwōy. 17 Ba kē mavasemlō kē van hiy kimi mi nahaphap mey nēwē. Kē mēvētleg me nasm̄al den alge, wa nemes gengen, so niōyheg nalo taqami, tō so niak nalo taqami nimlaklak."

18 Mi nohohole goh en, kōyō mihigoy ige sil so nitog olol mi nōbōlōk van hiy kōyō, ba et towoyig te so higoy kēy.

19 Mey atgiy, yatkel Juw mavan me den Antiok tiwag mi Ikonium, tō mēvēl ige sil. Tō kēy miyim Pol mi nevet, tō yap lō kē den napnō, wa seleslen̄ den kē. Veg kēy dēm so kē mal mat. 20 Ba ige tin̄qoy telepnō nen mavan me mitig dēln̄et kē, tō kē nihatig lok. Tō kē nihayveg lokse hay lelo vōnō. Tō taval meyen nan, Pol kōyō Banabas hatig tō van n̄a Dēbē.

Lemtehal non Banabas kōyō Pol bōm̄ōlm̄ōl lok me en, kōyō mavan walēg lok mahē a kōyō mavan tō me aē am̄ag

21 Pol kōyō Banabas motoytoy se van lepnō Dēbē en, tō mak ige m̄adeg mēdēmtig se. Tō Pol kōyō Banabas so m̄ōl lokse en, ba kōyō mavan tatag lokse namtehal a kōyō mavan lō tō me aē. Kōyō mavan heylō Listra, Ikoniam, tō van me Antiok. 22 Vel vōnō gōh en, kōyō mohole biyin̄ nēdēmdēm non ige tin̄qoy, wa mavap hiy maymay kēy so tig netnet lēdēmtig. Kōyō mavap van hiy kēy so, "Gēn tavan heylō nememeh m̄adeg bah en, tō gēn qoyo hayveg lemyeyen non Ḡod."

23 Vel ēm̄ tatay en, kōyō metyak tēymat ige lililwo nan. Tō heylō latatay wa lagaygay mamah nonoy en, kōyō mōm̄ōk kēy lemnen Welan mey a kēy nēdēmtig kē. 24 Tō kōyō mavan heylō me Pisidia, tō mēhēw tēqēl me heylō loprovēns Pamfilia 25 tō dēn̄ lepnō Pega. Tō kōyō mavasemlō se Noyoy Ēwē van lepnō anen. Tō kōyō hēwtēqēl lepnō vitwag Atalia, 26 tō madam nabaklap vitwag tō m̄ōl lok me Antiok. Mahē nan a kēy matatay tō van hiy Ḡod aē am̄ag, a so nimyin̄ kōyō bemgumgu a kōyō magaleg.

27 Kōyō dēn̄ me Antiok en, tō kōyō ōlōl tiwag me ige tēlēm̄ yon̄ so vasemlō nahap a Ḡod magaleg tō tiwag mi kōyō. Tō kōyō mavasemlō van aso qeleave Ḡod mawak namte-ēm̄ ne dēmtig hiy ige mey a et Juw te. 28 Tō kōyō motog tiwag van mi ige tin̄qoy telepnō nen suvay misin.