1 Akripa nivap van hiy Pol so, "Nēk tohole vēh so tigoy lok nēk mahge ēgēn."

Bahnentō, Pol nihog kal namnen tō niqtēg hohole. 2 Kē wo, "Qiyig gōh no tohole gatay natawye vēvēg del a ige Juw mak sey tō a veg no en. Tō no nemlaklak so tig lengē, Mayanag Akripa, so vulu nēdēmdēm nonoy. 3 Veg nēk nēglal galsi nēdēmdēm lēvēnan ige Juw, bastō nage a kēy vēyvēy vavaleh aē en. Tō nok vēhge van hiy nēk so nēk yon̄teg matdiy me hiy nohohole mino.

4 "Ige Juw del nēglal galsi namtevuk, meqtēg tō no notogtog lepnō mino, mahē no nōlōmgep, gaydēn̄ a no motogtog tō Jerusalem. 5 Kēy mal ēglal tō no a nēte. So kēy temyōs en, togtō kēy tavasem vēh van hiy nēk so ino nam̄e Farisi. Veg ige Farisi natatagoy galsi yeh natawye Le del batatay nonmi den ige Juw tegtegha. 6 Tō nok tigtō gōh bēvēvēg veg nok dēmdēyē bavatvat non Ḡod, a kē melep tō van hiy ige yatqōtqōmi. 7 Navatvat nan en, ige ginwotwot son̄wul nanm̄e vōyō non ige mino, kēy se nēdēmdēyē so lep. Veg bege gōh en, kēy mogmogo Ḡod vel anqōn̄ wa vel meyen. !Mayanag, ige Juw mēvēvēg no veg bēdēmdēyē nan! 8 ?Bahap tō kimi dēmdēm so nemeh mi Ḡod so nilep hatig net den namte?

9 "Hēywē, am̄ag no mahgēk dēmdēm so itōk so nok tak nahaphap m̄adeg, a so tavale tiwag mi Tigsas Tanasaret. 10 Tō van lelo vōnō Jerusalem en, no mak nahaphap mey nehet m̄adeg hiy ige yon̄ non Tigsas. Tō no mōm̄ōk ige m̄adeg non Tigsas lēm̄ yētyēt lahan ige pris lililwo. Tō mahē a ige lililwo muvug tiwag so vonm̄ēt so wuhmat kēy en, no memhuy aē. 11 Nok van walēg nēm̄ tatay so ak memeh kēy, tō vaga en, nok akak etgal so kēy so hole hethet hiy nahah a Tigsas en. No mololgagay kēy a nēkēkēn, tō no mavan lepnō tegtegha tō ak tōqtōqyeg kēy.

12 "Veg bege gōh en, no mavanvan hiy napnō Damaskus a lahan ige pris lililwo. 13 Mayanag, lēlwomyen nok vanvan lapgetō lemtehal en, tō nok etsas navalwey a mihin̄yeg me den nōtōq. Namyeyen nan nemyeyen galsi den nalo, tō mihin̄yeg walēg no tiwag mi ige a vanvan tiwag tō mi no en. 14 Kemem del misisgoy qēt how lēvētan. Tō nok yon̄teg a nohohole vitwag mavan me den hag lōtōk en mi nagatgat non ige Tisrael, a mavap so, ‘?Sol, Sol, bahap tō nēk ak memeh tō no qele gōh? Nēk akak memeh ēwē nēk a nēk vēhyuw tō mi no anen.’ 15 Tō no wo, ‘?Inēk ihē Welan?’ Ba Welan meplu lok me so, ‘Ino Tigsas, a nēk ak memeh tō no anen. 16 !Hatig ba tig mi nayn̄ē! No mal vasemlō no van hiy nēk ēgēn tō so nēk van me net yowyowveg mino. Tō nēk tavan me noyowyowveg mino bavavasemlō nahap mey a nēk met. Nēk so vasemlō van hiy ige sil nahap a nēk met tō mi namte, bastō yatkel haphap se aē a no tavasem van hiy nēk atgiy. 17 Tō no tavaēh nēk den ige sil nōnōm wa den ige mey a et Juw te. Tō nok so vētleg nēk hiy ige mey a et Juw te, 18 so wak namtay, tō so kēy tig kēlē den namlēglēg tō van me lemyeyen. Nok vētleg nēk van hiy kēy so kēy so van yak den mahē a Satan nilwo goy, ba van me so Ḡod nimyanag goy kēy. Tō no tēdēmveteg nubug nonoy, tō no tuqul tiwag kēy mi ige mey a noyon̄ vatag veg kēy nēdēmtig no.’

19 "Mayanag Akripa, veg bege gōh en, no mēdēmap galsi nohohole a mavan me den nōtōq. 20 No meqtēg Damaskus, tō mavan Jerusalem, tō mavan walēg vel vōnō a Judea, wa tō mavan hiy ige mey a et Juw te. Tō no mavasemlō van hiy ige sil so kēy so dēm leh, tō wulyis van hiy Ḡod, tō ak namgumgu mey a nivasemlō so kēy mal dēm leh. 21 Veg bege gōh en, ige Juw mētēy no lelo Tiy Ēm̄ Bolol, tō makak etgal so wuh no. 22 Ba Ḡod memyin̄ tasga no gaydēn̄ me qiyig gōh, ak tō nok tig tō lengomi ige mayanag tiwag mi ige sil. Tō nok vasemlō van nēdēmdēm vēlēs mey a ige lēgēlgēg tiwag mi Mosis mavaplō tō so tak tig. 23 Ige lēgēlgēg mavap so Kraēs toyon̄ memeh, tō kē totogyeg a mahatig den namatmat, wa tō kē taklō namyeyen hiy ige Juw tiwag mi ige mey a et Juw te."

24 Vētmahē a Pol nihohole nahaphap geh gōh en, kē nitigtigoy lok kēy mahgen, ba Festus mohole a nilwo so, "!Pol, nēk naqaqa! Nēk dēmdēm meh bololmeyen nōnōm, ak tō nēk maqaqa aē."

25 Ba Pol wo, "Festus, nēk nam̄e et. Ba nok et qaqa te, nohohole mino hēyhēywē wa namanig nan aē. 26 Veg Mayanag Akripa nēglal galsi aē bahaphap geh agōh, tō no tohohole togolgol vēh van hiy kē. Ba nok dēm so tateh hap geh a kē et etsas te, veg nage geh gōh et wowow yoyon̄ te mahē su ēwē. 27 ?Mayanag Akripa, nēk nēdēmtig nohohole non ige lēgēlgēg? !Veg no nēglal so nēk nēdēmtig kēy!"

28 Ba Mayanag Akripa mavap lok van hiy Pol wo, "?Nēk dēm van so nēk teleh togotgo vēh no so van me Nēkrēstēn lēvētmahē malte gōh?"

29 Tō amtan Pol wo, "Sowo mahē malte, siso mahē hoyo, ba nok tatay so et inēk mahge te, ba ige del a yon̄yon̄teg tō nohohole mino qiyig gōh en, kēy so van me qele ino. Ba nējēn a kēy mēyēt no aē gōh en, nok et buste so kēy yēt kimi aē."

30 Bahnentō, Nēqēt Mayanag Akripa kōyō mayanag liwo Festus hatig. Tō Bernis tiwag mi ige del a mahag tiwag tō mi kēy en, kēy del hatig, 31 tō kakalō den nōyōstiwag. Tō kēy hohole mahgey lokse so, "Net gōh et ak te hap mey nehet te so nimat aē siso nivan lēm̄ yētyēt."

32 Tō Akripa nivap van hiy Festus so, "Kamyō tukēg vēh kē, ba tateh ēgēn veg kē mahgen mēvēhge tō so Sisa so nivēvēg kē."