1 Lēvētmahē nen Nēqēt Mayanag Herod niqtēg ak memeh ige tēlēm̄ yon̄. Tō kē mōm̄ōk yatkel et lēm̄ yētyēt. 2 Kē mētēy Jemes, a ikē nitin̄qoy vitwag a ēthēn Jon. Tō Herod mōlvayēg ige nonon so kēy totm̄ēt yak nēqtēn Jemes mi nagasel bepgal. 3 Herod met van so ige lililwo Tujuw nemlaklak bemtehal nen, tō kē nemyōs so nitēy se Pita. Herod mak meygōh lamahē a kēy hay tiwag me Begengen Yowlege, nōqōn̄ liwo begengen bērēyt a nis tateh alon. 4 Tō kēy mētēy Pita van lēm̄ yētyēt, tō m̄ōk kē lemnen ige bepgapgal so etgoy kē. Ige bepgapgal nen, kēy niviwti vēvet a ige bulvet liviwti vitwag. Ba Herod nidēmdēm so nivēvēg Pita lengon ige sil lēkle Gengen Yowlege.

5 Bastō Pita notog lēm̄ yētyēt, ba ige tēlēm̄ yon̄ tatay maymay hiy Ḡod veg kē.

6 Am̄ag den Herod so nilep lō Pita en, anqōn̄ nen Pita lēm̄ yētyēt. Kē memtiy lēvētnan yoge bepgapgal vōyō, tō nējēn mēlēgteg tiwag kēytēl. Tō yoge bepgapgal vōyō se tig tō mete ēm̄ en. 7 !Ey, et van nen, nin̄sel non Welan mavan ganwon me, tō namyeyen mihin̄yeg lelo ēm̄ yētyēt! Tō nin̄sel nen niwohqal naqaqayan Pita so niak matyak kē. Tō nin̄sel vap van hiy kē wo, "!Hatig ēgē!" Tō nējēn nisisgoy yak den namnen Pita.

8 Tō nin̄sel nivap van hiy Pita so, "Leleh ba hey nasandol nōnōm." Tō Pita mak tatag qeleanen. Tō nin̄sel wo, "Hey nōkōt nōnōm, ba tatag no."

9 Tō Pita nikalō tatag nin̄sel nan, ba kē nidēmdēm so kē niqoyqoy ēwē. Ba kē et ēglal te so hēyhēywē a so kē makalō en. 10 Tō kōyō mavan heylō me, mavan vēyvēy net betetgoy mey am̄ag, wa net betetgoy mey vōyō negi, dēn̄ me namtegeay a natle bakakalō yow lelo vōnō. Tō namtegeay nen mawak mahgen, tō kōyō kalō. Kōyō vanvan me lemtehal vitwag en, tō nin̄sel niqlen̄ ganwon den kē.

11 Tō Pita nidēmsas lok van, tō kē wo, "Togtōkē no niglal hēywē so Welan mēvētleg me nin̄sel nonon. Kē mavaēh no den namnen Herod wa natawye dēmdēm del mey a ige Juw mēdēmvasig tō aē."

12 Pita met vēglal so nage geh nen et qoyqoy te, tō kē nivan n̄a lēm̄ non Mere a tita non Jon Mak. Ige dēmtig m̄adeg mahay tiwag van nen batatay. 13 Tō Pita nidin̄din̄ a lemte ēm̄ aslil. Tō nam̄alm̄al yowyowveg vitwag a nahan Roda nivan me so niet tow so ihē. 14 Tō kē niyon̄teg vēglal naln̄an Pita. Ba kē nemlaklak aē a nēkēkēn, ak tō nalon mōqōn̄ so niwak namte ēm̄. Kē meplag lokse van hiy ige sil en, tō nivap van hiy kēy wo, "!Pita tig tō yow lemte ēm̄ kē!"

15 Ba kēy meplu wo, "Nēk so qaqa." Ba kē nimaymay aso hēywē en. Ba ige sil en vap van hiy kē so, "Ba wun nin̄sel non Pita ēwē."

16 Ba Pita midin̄ tasga namte ēm̄ qeleanen. Kēy so wak yow namte ēm̄ qelekē Pita, tō kēy mamamakē aē a nilwo. 17 Ba Pita nivēglal van hiy kēy mi namnen so kēy tog yon̄. Tō kē nikaka van hiy kēy qeleave tō Welan melep lō kē den nēm̄ yētyēt. Tō kē nivap van hiy kēy wo, "Vasem van hiy Jemes* tiwag mi ige dēmtig yatkelgi bēdēmdēm agōh." Tō Pita nihatig tō nivan lepnō tegha.

18 Taval meyen nan hag nen, ige bepgapgal moyowlin̄lin̄ aē, tō kēy dēmdēm sosok so nahap mak hiy Pita qelegōh. 19 Herod mosok Pita vel mahē del ba et etsas hōn te kē. Tō kē mēvēhge van ige a metetgoy tō Pita so kē meqlen̄ qeleave. Tō kē mēvēvēg kēy so wuh mat kēy.

Me atgiy, Herod nihatig den Judea tō nivan tog n̄a Sisaria. 20 Herod mololgagay ige Tataya tiwag mi Saydon a nēkēkēn, ba ige lililwo lepnō vōyō nen mēdēmdēm so van so et kē. Kēy so ak natm̄at tiwag mi Herod veg ige gōh wēlwēl negengen nagay vēlēs a lepnō nonon. Tō kēy mewseg me net vitwag nahan Blastus so nimyin̄ kēy. Blastus en, kē net ēlēltegoy nēm̄ non Herod. Tō Blastus mōlōl nōyōstiwag vitwag.

21 Tō Mayanag met yak nōqōn̄ vitwag, lōqōn̄ togolgol nen en, tō kē nihey nam̄e malmal nonon ige mayanag, tō nihag hiy van letno haghag nonon, tō niqtēg hohole van hiy ige sil. 22 Tō ige del nen ōlōl wo, "!Igōhkē naln̄an ḡod, et naln̄e et te!" 23 Tō vag tiwag ēwē nin̄sel non Welan niwohqal kē veg kē et dēmap te Ḡod. Tō nōl mētēhiy nataqn̄ēn, tō kē nimat.

24 Tō Noyoy Ēwē veg Ḡod maga vel mahē, tō ige sil m̄adeg mēdēmtig.

25 Tō Banabas kōyō Sol mavatēp Jerusalem so hog van nēsēm bemyimyin̄ begengen nagay.✝ Mahē kōyō mōm̄ōk veteg bah en, tō kōyō melep Jon a nahan itan Mak en, tō kēytēl m̄ōl lok Antiok.