1 Mahē Apolos lapgetō Korint en, Pol madam namtehal a nivan woy napnō, tō nidēn̄ me Efesas. Tō kē metsas yatkel tin̄qoy van anen. 2 Tō Pol mēvēhge kēy van wo, "?Mahē a kimi mēdēmtig en, kimi mōyheg mi Nuvu Yon̄?" Ba kēy meplu goy kē van so, "!Tateh! !Kemem et ēglal hōn te veg Nuvu Yon̄, so aē si tateh!"

3 Tō Pol mēvēhge wo, "?Ba kimi mohyon̄ mi nahan vasugyon̄?"

Ba kēy meplu so, "Kemem mohyon̄ mi navasugyon̄ mey a Jon magaleg tō."

4 Ba Pol wo, "Navasugyon̄ namun Jon en, ikē navasugyon̄ bēdēmleh den negengenyeg. Tō kē mavap van hiy ige sil so dēmtig net mey a tavan me atgiy, tō net nan a Tigsas en."

5 Kēy moyon̄teg van qelenen en, tō kēy del mavasugyon̄ lahan Welan Tigsas. 6 Tō Pol matan̄ apwoy, tō Nuvu Yon̄ mēhēw kēy, tō kēy qētēg hohole mi nagatgat tegtegha, tō qētēg lēgēlgēg. 7 Ige lēvēwti nan, kēy tege son̄wul nanm̄e vōyō.

8 Pol motog tiwag mi ige Juw bōwōl vētēl. Kē motoytoy maymay lēm̄ tatay nonoy so niwseg me nēdēmdēm nonoy bemyeyen talge. 9 Ba yatkelgi et dēmtig te, tō mavan mēqēt maymay. Tō kēy hohole hethet Bemtehal mey Nēwē lengon ige sil. Bastō Pol mēvēl yakyak ige tin̄qoy tiwag mi kē, tō nivatvatne kēy vel qōn̄ luskul vitwag nahan Tiranus. 10 Nage gōh mavan tasga gaydēn̄ bēte vōyō, mak tō noyoy veg Welan maga walēg qēt Esia, hiy ige Juw wa ige mey a et Juw te.

11 Tō Ḡod mak nam̄e vahah heylō namnen Pol. 12 Yatkel et mēvēhge Pol so tan̄qal nemen̄men̄ susu si so natvēl malmal. Tō kēy so m̄ōk apwon ige gom. Tō nogom, wa tō nuvu het, niqleqlen̄ den kēy.

13 Yatkel Juw vanvan walēg so vōyyakyak nuvu het den ige et. Tō kēy helhel etgal so vōyyak nuvu het lahan Welan Tigsas. Kēy mavap so, "!Atmi vayak lahan Tigsas, mey a Pol nitoytoy gatay!" 14 Ige mugumgu gōh, kēy liviyō, ikēy yantēntēn nipris liwo vitwag non ige Juw, nahan Iskeva.

15 Nōqōn̄ vitwag nuvu het mavap van hiy kēy wo, "?Ino nēglal Tigsas, tō no nēglal veg Pol, ba kimi gōh nahan etgeh?" 16 Tō net a nuvu het aē mi kē niyow hatig tō nivēhyuw tiwag mi kēy, mak tō kēy meplaplag den nēm̄ a neleleh tateh wa tō memtemtewot. 17 Noyoy nan maga walēg ige Juw wa ige Krik del a notogtog Efesas. Tō namtēgteg maqal kēy del tō kēy mēdēmap galsi nahan Welan Tigsas.

18 Tō ige m̄adeg a nedēmtig mahatig hag lengon ige sil tō mavasemlō nubug nagay. 19 Tō ige dēmtig m̄adeg mey a kēy mehewhew tō am̄ag en, kēy mēvēl lōlō tiwag me nōbōk behewhew, tō hil qēt lemtan ige sil. Ba nōbōk geh gōh en, nēsēm nan neketket a neketket, nēsēm nimil son̄wul tēvēlēm (50,000).*

20 Bastō nohohole non Ḡod niga tasga, tō nileh nēh non ige m̄adeg.

21 Lēkle haphap del gōh en, tō Pol nemyōs so nivatēp Jerusalem. Tō kē mepnog namtehal nonon so nivan walēg Masedonia, wa Akaya, tō me atgiy kē so nivan dēn̄ me Jerusalem. Tō kē vap so, "Mahē nok vatēp bah Jerusalem en, ba itōk so nok van n̄a Rom." 22 Tō Pol mēvētleg noyowyowveg vōyō, Timoti kōyō Erastus, hiy Masedonia. Tō kē mahgen mahag lap qōtō tusu Esia.

23 Lamahē nen, nēvēygēl liwo len̄ n̄a Efesas bōtōti dēmdēm Bemtehal Ēwē veg Tigsas. 24 Net vitwag nahan Demetrius, kē nemgumgu lēsēlva, tō kē nimhemhe nēm̄ susu a qele nēm̄ yon̄ non ḡod lōqōvēn a Atemis. Ba kē nitēytēy nēsēm liwo aē, veg ige m̄adeg wēlwēl, kē tiwag mi yatkel et se a kēy nemgumgu lemgumgu anen.

25 Lōqōn̄ vitwag Demetrius mētēy nuvug hiy ige del a kēy mugumgu se qeleanen. Tō kē mavap van hiy kēy wo, "Yēhē, kimi nēglal galsi so namgumgu nongēn gōh, gēn nētēytēy nēsēm liwo aē. 26 !Ba atmi et van Pol wow tō gōh! !Nohohole nonon mal leh nēdēmdēm non ige m̄adeg Tefesas gōh tiwag mi Esia! Pol mavap so ḡod mey a net mitin̄ ēwē tō en, ikē et tiy ḡod te. 27 Veg bege gōh en, ige sil tiple hohole hethet bemgumgu namungēn. Tō ige sil tiple dēmdēm hethet veg Nēm̄ non Atemis, tō lepyak kē den natno liwo nonon. !Atemis gōh, ige del Tesia tiwag mi ige del lemyam mogmogo goy kē!"

28 Mahē kēy moyon̄teg van qelenen en, ba kēy mololgagay, tō kēy ōlōl a nilwo so, "!Atemis nage Tefesas neketket a neketket yeh!"

29 Tō ige sil telepnō nen moyon̄teg navaliqōqō gōh, tō kēy mosotak aē tō kēy valaplag me. Tō kēy hatig hag tō tēy maymay yoge yaplōplōn Pol, Gayus ba Aristakas. Kōyō nage Tamasedonia ba vanvan tatag Pol. Tō kēy mētēy kōyō, tō van tēy lelo gemel liwo.

30 Tō Pol nemyōs so nihayveg hay so nihohole van hiy ige sil, ba ige tin̄qoy et ukēg te kē. 31 Tō ige lililwo lakapman Tesia se, a ige bulbulsal non Pol, kēy mēvētleg noyoy hiy kē so kē nitog vanvan hay letno yōstiwag.

32 Hay lelo gemel gōh en, ige sil mēdēmdēm vōvōyō aē. Yatkel et ōlōl boel bege vitwag, wa yatkelgi ōlōl boel bege tegha. Ba taqse sil et m̄ōleg te aē so nēdēmdēm bōyōstiwag nen qeleave. 33 Tō yatkel Juw mey a et Krēstēn te mēvētgiy van net vitwag nahan Aleksanda a lengo sil. Tō kē mak nēvēglal mi namnen van hiy kēy so togtogyon̄, veg kē nemyōs so niōl gontegoy ige Efesas den tiltil ige Juw. 34 Ba ige sil et van qelekē Aleksanda en Nujuw, tō kēy qētēg ōlōl tawtaw lokse "!Atemis nage Tefesas neketket a neketket yeh!" Tō kēy mōlōl qelegōh bawa vōyō.

35 Bahnentō, net liwo vitwag telepnō liwo nen nihatig hag tō nihigoy kēy. Bastō nihole so, "Yēhē sil Tefesas, ige del nēglal galsi so Efesas gōh en, ikē napnō mey a nētēygoy nēm̄ yon̄ liwo a nonon ḡod liwo nongēn a Atemis en. Wa ige del nēglal a so gēn netgoy galsi nevet yon̄ nonon a misisgoy tō me den hag lōtōk en. 36 Tō tateh et nivap so et hēyhēywē te. Tō itōk so kimi del hag yoyon̄ ba dēmdēm galsi bah en, bastō kimi qoyo ak te hap mey nehet. 37 Veg kimi melep bat me yoge gōh, ba kōyō et vap te hapte mey aso nehet van hiy ḡod nongēn. Wa kōyō et tan̄tan̄hephep te lēm̄ yon̄ nongēn.

38 "So Demetrius tiwag mi ige a mugumgu tiwag mi kē wo dēmdēm so net vitwag mak nehet hiy kēy en, itōk so kēy van lokot, tō hole gatay hiy ige mayanag bēvēvēg. Tō kēy del tēvēyvēyvavaleh vēh aē. 39 Bastō sowo nahap tegha se aē a kimi nemyōs so hole gatay se en, tō kimi tōlōl vēh nōyōstiwag liwo a litiy metehal nan.

40 "Nok vap qele gōh, veg sowo ige lililwo Torom met naksok nilwo a net et dēmap te kēy aē en, tō kēy tiple vēvēg gēn aē. Ba gēn tit vulu vēhte kēy, veg gēn et ēglal te so gēn yōstiwag tō gōh bahap." 41 Net liwo gōh mohohole bah en, tō nivētleg m̄ōlm̄ōl lok ige sil.