1 Tō net m̄agoy ige pris nivēhge Steven wo, "?Wō nage del gōh hēywē?"

2 Tō Steven meplu so, "!Ige yathithik tiwag mi ige imam mino, yon̄teg me hiy no! Mahē bōbō nongēn Abraham motog tō Mesopotamia, tō kē et van qete hiy Haran en, Ḡod a nēlēn̄as maklō kē mahgen van hiy kē. 3 Tō Ḡod mavap van hiy kē so, ‘Ukēg veteg napnō nōnōm wa ige nōnōm, tō van me a lepnō mey a no qoyo vasem van hiy nēk.’

4 "Bastō Abraham mukēg veteg lepnō nan, a kēy ōl se so Kaldea, tō mavan motog Haran. Mahē imam nonon mamat bah en, kē mavan me hiy lepnō Kanan a kimi tog tō aē qiyig agōh. 5 Ba Ḡod et lep te vētan hōn te van hiy kē. Ḡod et su togyak te vētan te van hiy kē, ba Ḡod mavatvat so kē telep van nēvētan gōh van hiy kē tiwag mi ige ginwotwot nonon. Ba mahē nen Abraham tateh ēntēn qete.

6 "Ḡod mohole van hiy kē bēdēmdēm gēn, ‘Ige ginwotwot nōnōm mey a vanvan lap tō me en, kēy tavan me ige et halvan a lepnō mey a et nonoy te. Tō ige telepnō nen tak so kēy ige slev. Tō kēy tak memeh ige nōnōm bēte m̄eldēl vag vet (400). 7 Ba no tēvēvēg kēy aē.’ Tō Ḡod mavap so, ‘Tō me atgiy, ige nōnōm qoyo van yak den napnō nan, tō van me mahē gōh so ōliwo no.’✝ 8 Tō Ḡod mavatvat van hiy Abraham so kē Ḡod nonon, tō Abraham movonm̄ēt so kē so nitep vēglal ige ginwotwot nonon.✝

"Tō Abraham ēntēn Isak, tō kē metep vēglal kē lēkle qōn̄ levetēl. Tō Isak ēntēn Jakop, tō Jakop yantēntēn ige tam̄an son̄wul nam̄e vōyō, a ikēy ige yatqōtqōngēn.

9 "Ba ige yatqōtqōngēn mamatwolwol ēthēy a Jōsēp, tō kēy men̄yeg kē so kē nivan me neslev n̄a Itsip. Ba Ḡod notog tiwag mi kē, 10 tō mavaēh kē den nahaphap het del a maqal kē. Tō Ḡod melep nasgōp wa nēmnay van hiy kē lengon Fero, a nēqēt mayanag non ige Titsip. Bastō Fero mōm̄ōk Jōsēp so kē nimyanag liwo goy Itsip, wa natawye yōnyōntey non Fero.

11 "Tō lēklan me atgiy, namay liwo maqal Itsip wa Kanan. Kēy memgamgaysēn qēt, tō ige yatqōtqōngēn en, kēy et etsas te gengen hōn te. 12 Jakop moyon̄teg so negengen aē Itsip, tō kē nivētleg ige yatqōtqōngēn so van totogyeg. 13 Ba mahē kēy mavan vagyō en, Jōsēp maklō kē van hiy kēy. Tō Fero moyon̄teg so Jōsēp en, ige nonon togolgol mavan me. 14 Tō Jōsēp mēvētleg nahal hiy imam nonon a Jakop so van me Itsip, tiwag mi ige nonon del. Ba kēy del son̄wul liviyō nanm̄e tēvēlēm (75).

15 "Bastō Jakop mavan me Itsip, tiwag mi ige nētnētm̄ey nonon, a kēy yatqōtqōngēn. Tō kēy del mamat qēt mahē anen. 16 Tō me atgiy, kēy qoyo van tēy nataqn̄ēn ige gōh n̄a Kanan, so tivig nataqn̄ey leqyan̄ non bōbō Abraham. Naqyan̄ nan tekel vētan n̄a Sekem, mey a Abraham mēwēl yak tō den ige ginwotwot non Hamor mi nēsēm.

17 "Tō mahē monognog me so Ḡod niaktig navatvat a kē melep tō van hiy Abraham. Ige non Abraham mavan me nam̄adeg a nam̄adeg. 18 Tō namyanag gayaq niqtēg tig helem̄ag napnō Itsip, ba net nan et ēglal hōn te Jōsēp. 19 Namyanag gōh, kē nōqōvē, kē nigalgal ige nongēn, wa niak memeh ige yatqōtqōngēn. Wa kē mak qelegōh so kēy ukēg veteg nowmat ige nētnētm̄ey susu aslil, tō so kēy matmat.

20 "Wa mavan tenenen me vētmahē a Mosis mowot en. Kē nētnētm̄ey vitwag mey a nōwōswōs wa newenwen lēs. Tō kēy metgoy kē bōwōl vētēl lēm̄ non imam nonon. 21 Mahē kēy melep lō kē en, tō nam̄alm̄al non Fero melep yak kē, tō matatagoy kē qeleso ēntēn tenenen. 22 Tō kē milwo hag mi nololmeyen del non ige Titsip. Tō kē mavan me nam̄e et bohohole wa bemgumgu.

23 "Vētmahē nēte son̄wul vet (40) tenenen nonon Mosis en, nēdēmdēm vitwag mavan me hiy kē so nivatēp lokse ige yathēthēn a ige Tisrael. 24 Tō Mosis metsas net Titsip nilm̄elm̄eh net Tisrael vitwag. Ba kē mētēy namnen net Tisrael nan, tō memyin̄ kē, tō nivalehyam wa muwuh mat net Titsip nan.

25 "Tō Mosis mēdēmdēm so ige nonon ēwē so et vēglal so Ḡod so nivaēh kēy heylō kē. Ba kēy et m̄ōleg te so Ḡod mōm̄ōk Mosis so niukēg taywah kēy den ige Titsip. 26 Taval meyen nan hag en, Mosis et van qelekē yoge Tisrael vēytitit tō anen. Tō kē nihole muhuy kōyō van so, ‘!Ey, ithi mōyō! Wo bahap tō kōmyō aksok tō qelegōh?’

27 "Ba net a kē mak qōqōvē tō ēplōn en, kē nitēm yak Mosis, tō nivap wo, ‘?Qeleave? ?Ihē mōm̄ōk liwo tō nēk so nimyanag goy kemem tō so vēvēg kemem? 28 ?Wō nēk so wuh se no, qele nēk muwuh tō net Titsip anoy ōk?’

29 "Mahē Mosis moyon̄teg van en, kē mavan qelen̄ den Itsip, tō motog a lepnō Midian qeleso net halvan. Tō yoge nētnētmēy tam̄an vōyō nonon mowot van anen.

30 "Lēkle ēte son̄wul vet, Mosis mavan n̄a lepnō vadalm̄eg a sisqet nuwutwut liwo Sinai. Tō Nin̄sel non Ḡod nikalō me hiy kē qeleso nep a nilawlaw hiy nēqētēnge su. 31 Mosis met wa kē mamamakē aē. Kē mavan sisqet me so niet galsi en, tō kē niyon̄teg naln̄an Ḡod vap so, 32 ‘Ino Ḡod non yatqōtqō, Ḡod non Abraham, Isak, wa Jakop.’ Mosis mihiyey aē, wa kē memtēgteg so niet.✝

33 "Tō Welan mavap van hiy kē so, ‘Lepyak nowoheyhey ne yēn̄ē, veg vētmahē a nēk tig tō aē en noyon̄. 34 No mal etsas nememeh a hiy ige mino n̄a Itsip. Tō no mal yon̄teg naln̄e ten̄ten̄ nonoy. Tō no mēhēw tēqēl me so vaēh kēy. Sōwlē, nok vētleg lokse nēk n̄a Itsip.’✝

35 "Mosis gōh a kēy mēlēn̄lēn̄teg tō kē, so ‘?Ihē mōm̄ōk liwo tō nēk so nimyanag goy kemem tō so vēvēg kemem?’ Heylō nin̄sel a maklō tō van hiy kē a lēqētēnge en, Ḡod mahgen mēvētleg Mosis so nimyanag wa vaēh kēy. 36 Net gōh mitig helem̄ag kēy den Itsip. Tō kē mak nēvēglal wa naphah m̄adeg n̄a Itsip, Lenaw Lawlaw, wa lepnō vadalm̄eg bēte son̄wul vet.

37 "Wa tō Mosis gōh a mavap tō van hiy ige Tisrael aso, ‘Ḡod tetyak net vitwag den ige nōnōm so van me net lēgēlgēg a qele ino.’ 38 Tō Mosis gōh motog tiwag mi kēy lepnō vadalm̄eg, tiwag mi nin̄sel a mohole tō van hiy kē luwutwut Sinai, wa tiwag mi ige yatqōtqōngēn. Ḡod melep van hiy kē nohohole bēh, so nilep me hiy gēn.

39 "Ba ige yatqōtqōngēn et yon̄teg te kē. Kēy mitiayak kē, wa kēy mēdēm lok Itsip. 40 Kēy mavap van hiy Aron so, ‘Tin̄ ige ḡod nongēn a so kēy tig helem̄ag gēn. Veg Mosis, net a mitig helem̄ag gen den Itsip en, gēn et ēglal te so nahap mak kē.’ 41 Nok hole gatay mahē kēy mitin̄yak ḡod galgal qeleso ninti bōlōk. Tō kēy melep van nolol hiy ḡod galgal nan, tō kēy mak negengen liwo aē, so dēmap nage a kēy mak tō mi namney.

42 "Ba Ḡod mitig kēlē kēy. Tō Ḡod mukēg kēy so kēy mogmogo goy nuvu ne vit, ne wōl, wa ne lo, qeleaso net lēgēlgēg vitwag mayap tō aē, so

?Kimi Tisrael, lēte son̄wul vet (40) a kimi mavanvan walēg lepnō vadalm̄eg en,

kimi melep kal tō nolol me hiy no? Tateh.

43 Kimi vanvan tēy natvēlgapye non ḡod galgal a Molek,

wa nototgal vet non ḡod nonmi a Refan,

mey a kimi mak tō so mogmogo goy kē.

!Veg bēdēmdēm nen no tōsōyteg yak kimi n̄a tekel vōnō Babilon!✝

44 "?Ba qeleave natvēlgapye non Ḡod? Ige yatqōtqōngēn migilgeg kal natvēlgapye nan tatag qele Ḡod mavasemlō tō van hiy Mosis. Tō kēy mavan tēy walēg a lepnō vadalm̄eg. 45 Nēm̄ nen en, kēy melep tabay van hiy yatqōtqōngēn leln̄an Josua. Tō ige nen mavan tēy heylō natvēlgapye nan lepnō Kanan. Mahē nen a kēy meskalgoy tō nēvētan gōh den ige benoyvōnō a Ḡod mōvōyyak tō kēy den. Tō natvēlgapye nan, kē totog dēn̄ lōqōn̄ non mayanag Devēt, 46 a kē mak Ḡod memlaklak. Devēt nemyōs so tēy kal nitiy ēm̄ hiy Ḡod non Jakop, tō kē mēvēhge Ḡod aē. 47 Ba Solomon ēwē a tak vēh, tō migilgeg kal.

48 "Ba Ḡod a neketket yeh en, kē et togtog te lelo ēm̄ a net ēwē mētēy tō mi namnen. Qele net lēgēlgēg mavap tō so,

49 Welan nivap so,

‘Namyeyen alge, ikē natno haghag mino,

wa namyam gōh natno vayvaysig mino.

?Nahan ēm̄ kimi so tēy me hiy no?

?Tō nok so mitiy ave?

50 !Vel haphap del no mal ak qēt mi namnēk!’✝

51 "!Kimi gōh niqtimi maymay! Nēdēmdēm nonmi qeleso ige lolqōn̄, wa nēdēln̄ami et wak te. !Vaga kimi tigoy Nuvu Yon̄ qeleso ige yatqōtqōmi! 52 ?Wō net lēgēlgēg aē a ige yatqōtqōmi et ak tōqtōqyeg te kē? Kēy muwuh matmat ige mey a melgēlgēg tō so Welan so nivan me, ikē mey a nitiy tenenen. !Tō qiyig gōh kimi men̄yeg wa muwuh mat kē! 53 Kimi mak qelegōh, kimi a mētēygoy tō Nele mey a ige in̄sel mavasemlō tō, ba kimi et yon̄teg te."

54 Ige lililwo Tisrael moyon̄teg en, tō kēy lolgagay lelo taqay, tō kēy n̄itn̄it nēlwoy van hiy kē. 55 Ba Steven, mōyheg mi Nuvu Yon̄, tō niet ketket hag alge tō metsas nēlēn̄as non Ḡod, wa metsas Tigsas tigtō a lemtō non Ḡod. 56 Tō amtan wo, "!Ey, et hag en! Nōtōq mawak wa Ēntēn Net tigtō a lemtō non Ḡod!"

57 Ba ige lililwo ōlōl a nilwo, wa tan̄goy nēdēln̄ay. Tō kēy miyiyak van hiy kē, 58 tēy maymay kē, tō yap lō kē den namtegeay ne vōnō. (Tō ige a mēvēgal tō Steven en, kēy mēvēl veteg neleleh taslil nonoy van hiy nōlōmgep vitwag, nahan Sol.) Tō kēy qētēg yimyim Steven so wuh mat kē.

59 Kēy yimyim Steven nen, ba kē nitatay wo, "!Welan Tigsas, lep vasgēt natalek!" 60 Kē moyowtaq hōw tō niōlōl so, "Welan, nitog m̄ōkm̄ōk nubug gōh van hiy kēy." Steven mohole bah qelegōh en, tō nim̄ōkheg m̄ēt.