1 Pol kōyō Silas mavan heylō napnō Amfipolis tiwag mi Apolonia tō mavan dēn̄ Tesalonika. Van lepnō nan en nēm̄ tatay vitwag aē a non ige Juw. 2 Pol mahayveg van lēm̄ tatay nen qele kē niwowow vaga. Nōqōn̄ M̄ōkheg vētēl en, Pol muqul tiwag mi kēy so hole gatay Nayapyap Yon̄ veg Kraēs. 3 Kē mavatne kēy so Nayapyap Tēnēte mavap so Kraēs toyon̄ memeh, tō me atgiy, tahatig lokse den namatmat. Kē wo, "Tō Tigsas a nok vasemlō van hiy kimi en, ikē Kraēs."

4 Tō yatkel Juw den kēy mēdēmtig, tō muqul tiwag mi Pol kōyō Silas. Wa tō ige Tikrik m̄adeg mey a kēy mogmogo goy Ḡod muqul tiwag, wa ige lōqōvēn m̄adeg non ige lililwo telepnō nen, kēy se mēdēmtig. 5 Ba ige Juw meqneg kōyō aē, tō kēy van tō vēl ige qōvē, tō kēy mak nēvēwti liwo vitwag tō kesyak nēvēygēl liwo. Kēy meplag van lēm̄ non Jeson so tēy Pol kōyō Silas, so vantēy kōyō me hiy ige sil.

6 Ba kēy et etsas te kōyō, tō kēy tēy Jeson tiwag mi ige dēmtig yatkelgi se, tō gamteg kēy van lengon ige lililwo telepnō. Tō ige sil nen gaygayka hag wo, "Yoge mey a mak tēktēk tō vel mahē lemyam en, kōyō mal dēn̄ me vētmahē gōh, 7 tō Jeson mal lep vasgēt kōyō me. Kēy del helhel nele non nēqēt mayanag Sisa, veg kēy vap so namyanag tegha aē, a nahan Tigsas."

8 Ige lililwo wa ige telepnō moyon̄teg qelegōh en, tō kēy moyon̄ ninhet aē. 9 Tō kēy mēvēvēg Jeson kēy so tamgoy mi nēsēm, tō kēy ukēg taywah kēy.

10 Anqōn̄ nan how nen en, tō ige yathēthēy vētleg yak Pol kōyō Silas n̄a Berea. Kōyō dēn̄ van mahē nen en, tō kōyō van hay lēm̄ tatay non ige Juw. 11 Tō vel qōn̄ Pol kōyō Silas vatvatne ige Juw. Ige Juw nen, kēy nam̄e et yeh den ige Tetesalonika, veg ige Juw Teberea netet m̄ōleg Nayapyap Yon̄ so navatvatne nan hēywē si tateh, tō kēy nemlaklak yeh so yon̄teg. 12 Bastō ige Juw m̄adeg mēdēmtig, tiwag mi ige Krik m̄adeg, wa ige lōqōvēn nan a netey natno lililwo.

13 Ba mahē a ige Juw Tetesalonika moyon̄teg so Pol nitoytoy nohohole non Ḡod n̄a Berea en, tō kēy van se me Berea. Tō kēy mak nēdēmdēm non ige sil mem̄geygey, tō so kēy tiple vēygēl se. 14 Tō ige dēmtig nen vētleg yak togotgo Pol den Berea, ba Silas kōyō Timoti tog lap. Tō Pol nihēw tēqēl hiy nale. 15 Tō ige mey a van tiwag tō mi Pol en, kēy mavan tēy kē mahē hoyo mēdēn̄ Atens. Mahē kēy so m̄ōl lok Berea en, tō Pol mavap van hiy kēy so "Vētleg togotgo me Silas kōyō Timoti hiy no."

16 Pol menyēnyē Silas kōyō Timoti n̄a lepnō Atens. Tō nēdēmdēm nonon et muhuy te veg kē met van so napnō nen nōyheg totgal ne ḡod galgal. 17 Bastō kē nitoytoy hiy ige Juw wa ige tegtegha mey a kēy mogmogo goy Ḡod lēm̄ tatay. Tō kē nitoytoy se hiy ige sil lehyay vel qōn̄. 18 Wa tō yatkel et mēnay vēy vavaleh tiwag mi kē. Ikēy yatkel et a kēy ōl so Epikurean wa yatkel et a kēy ōl so Stoik. Tō kēy vap so, "Net beptōptog hohole solosloteg gōh, kē nihole gatay nahap?" Ba yatkelgi wo, "Kē wun nihohole gatay ige ḡod halvan." Kēy vap qelenen veg Pol nivavasemlō noyoy ēwē a qeleave Tigsas mahatig lokse den namatmat.

19 Tō kēy tēy Pol tō vantēy kē lēm̄ yōstiwag vitwag, nahan Areopagus. Tō kēy vap so, "Kemem nemyōs so ēglal m̄ōleg nēdēmdēm gayaq mey a nēk vavasemlō tō anen. 20 Veg nage a nēk vap geh tō nen, ikē negyaq me hiy kemem. Kemem nemyōs so ēglal galsi namanig ne hohole nan." 21 (Ige et Tatens, tiwag mi ige halvan a tog tō lepnō gōh en, vel qōn̄ kēy hag kaka gatay vēlēs nēdēmdēm gayaq anen.)

22 Bahnentō, Pol mitig ketket hag a lelo yōstiwag a Areopagus en, tō mavap so, "Ige sil lelo vōnō Atens, no mal etsas so kimi gōh ige batatay. 23 Veg mahē a no mavan heylō napnō nonmi en, no metsas qēt nahaphap del a kimi mogmogo goy. Tō no metsas nahye olol vitwag a nayapyap taq tō aē en so, ‘Van hiy ḡod a gēn et ēglal te.’ Tō kimi mogmogo goy Ḡod mey a kimi et ēglal te. Ikē nitiy Ḡod a nok so vasemlō van hiy kimi.

24 "Ḡod a mitin̄ namyam tiwag mi nahaphap del a lelo mayam en, kē nilwo goy nōtōq wa nēvētan. Tō kē et togtog te lēm̄ olol mey a net mak tō. 25 Wa tō kē et mōyōs te namyimyin̄ den ige sil veg nahaphap del nonon aē. Veg Ḡod gōh a kē melep me nōmōkhangēn, wa nēh, tiwag mi nahaphap del. 26 Tō Ḡod mitin̄ ige viwti et del yak den net vitwag, tō so kēy tog velvel vētmahē del lemyam. Tō kē mēvēlwoywoy ige et, so kēy totogtog ave wa tēdēn̄ n̄ēh. 27 Kē mak qelegōh tō so ige et so sok kē, tō halveg dēln̄et vel mahē, tō wun etsas kē. Ba kē et yeh te den gēn vivitwag, veg,

28 Heylō kē en, kemem mēh, tō tak vēh nahaphap, wa tō totog vēh lemyam gōh.

"Qele ige nōnōm mayap tō me am̄ag, so,

Igēn ige nētnētm̄ey nonon.

29 "Veg igēn ige nētnētm̄ey nonon en, tō kimi nitog dēmdēm so Ḡod en, kē qele nōḡōl, si nēsēlva, si nevet. Mey gōh en nototgal mey a net mak mi nēmnay wa nēdēmdēm nonoy. 30 Nēmētwun ige sil mey am̄ag, mahē a kēy et ēglal te Ḡod en, kē et dēm te van aē. Ba togtōkē, kē niōlvayēg ige sil del vel mahē so kēy dēm leh. 31 Veg Ḡod mal etyak nōqōn̄ vitwag so net nonon tēvēvēg ige del telemyam mi nēvēvēg tenenen. Tō Ḡod mal ak ēh lokse net nan den namatmat. Meygōh nivasemlō hiy ige del so nahap a Ḡod mavap gatay Tigsas en, kē nēhēyhēywē."

32 Mahē a ige sil moyon̄teg van so net mahatig lokse den namatmat en, ba yatkel et moboyboy aē. Tō yatkelgi mavap so, "Kemem nemyōs so yon̄teg lokse nēdēmdēm nen den nēk." 33 Tō Pol nukēg veteg kēy tō nivan. 34 Ba yatkel et mēdēmtig Pol, tō matatag kē. Tō ige a madam Pol en, net liwo vitwag lēvēwti non Areopagus nahan Dionisius, wa nalqōvēn vitwag nahan Damaris, tiwag mi yatkel et se.