1 Yēhē yaplupluk. Igōhkē neletes namuk vōyō negi van hiy kimi. Van leletes vōyō namuk gōh en, nok so hole matyak ēwē kimi, so kimi dēmlok nēdēmdēm tenenen nonmi. 2 Nok so ak dēmlok kimi veg nohohole non ige lēgēlgēg yon̄ tam̄ag, tiwag mi nele non Welan Ivaēh nongēn, a kemem ige hal mavasemlō tō van hiy kimi.

3 Yakhagyeh, itōk so kimi ēglal so qiyig gōh, a sisqet babah ne qōn̄ en, ige boboyboyheg tavan me. Kēy tadam bemtehal nemyōs het nonoy, tō kēy toboyboyheg a tavap wo, 4 "?Tō qeleave ēnōk? ?Tigsas mavatvat tō aē so nivan lok me, ba kē ave ēnōk? Mal tivig qēt ige tamatmayge nongēn tam̄ag ba nahaphap et leh hōn te, meqtēg yak tō naqtēqtēg ne mayam gaydēn̄ qiyig agōh."

5 Kēy galingoy so am̄ag Ḡod mitin̄ namlēg lōtōk wa namyam mi nohohole nonon. Kē mak so namyam gōh mēwētlō den nēbē wa heylō nēbē. 6 Wa tō, mi nēbē gōh en, kē mēvēvēg ige telemyam am̄ag mi nililip, wa kēy mamat qēt. 7 Ba nohohole a mitin̄ namyam en, nohohole gōhkē mal gatgoy namlēg wa namyam gōh tō so van lep. Wa Ḡod nitēygoy namyam bōqōn̄ a kē tēvēvēg wa tuwuh ige a et dēmap te kē.

8 Yēhē bulbulsal, nitog galingoy nage vitwag agōh. Van lengon Welan nēte 1,000 en, qeleso nōqōn̄ vitwag, wa tō nōqōn̄ vitwag en, qeleso nēte 1,000. 9 Welan et mēlē te van lavatvat nonon, qele a yatkel et dēmdēm so kē nemlē. Ba kē notogtog muhuy hiy kimi, veg kē et buste so net vitwag niwuh qelen̄, ba kē nemyōs so ige del dēmleh. 10 Ba nōqōn̄ non Welan tavan me qele net batan̄tan̄hephep vitwag.✝ Tō lōqōn̄ nan namlēg teqlen̄ mi navaliqōqō liwo len̄, tō nep sew tegen qēt niyinyintey hag lōtōk. Tō namyam gōh wa nage del telemyam en, kēy tavan me temtawle hiy Ḡod.*

11 ?Ba Ḡod tuwuh qelen̄ nage del qeleanen, bastō kimi so akteg? Atmi tog yoyon̄ wa dēmap Ḡod 12 mahē a kimi so dēmdēyē nōqōn̄ non Ḡod. Tō itōk so kimi mugumgu maymay so nōqōn̄ nen nivanvan ēgē me. Lōqōn̄ non Ḡod, namlēg wa niyinyintey del en, nep tegen qēt.

13 Ba gēn dēmdēyē nōtōq gayaq wa namyam gayaq mey nēwē tatag navatvat nonon, namyam mey a ige del wa tawye haphap hay alon en tetnenen.

14 Bastō yēhē bulbulsal, veg kimi dēmdēyē megōh, mugumgu mi navaksami so tog wenwen, tog togolgol, wa tog tam̄at lengon. 15 Atmi dēmsas so Welan nitog muhuy tō so nivaēh ige sil nonon. Haytēyēh qele ēthēngēn Pol, a gēn natam yeh, mayap tō van hiy kimi tatag nēmnay a Ḡod melep van hiy kē. 16 Van leletes namun Pol en vaga kē nihole gatay nahaphap geh agōh. Ba yatkel hohole namun van leletes en, et towoyig te so ēglal m̄ōleg galsi. Tō yatkel et a nēqtēy nowon en, kēy wulyis nam̄e dēmdēm nan, qeleso kēy muwulyis se Nayapyap Yon̄ tegtegha. Ba kēy toyowōlsēn yow en, Ḡod tuwuh wa tēvēvēg kēy.

17 Bastō, yēhē bulbulsal veg kimi mēglal vatag bege gōh en, etgoy galsi kimi tō so kimi tit dam vēhte nagalgal non ige helhel nele wa tit sisgoy vēhte den nēdēmtig maymay nonmi. 18 Ba motow mi nasgōp wa nololmeyen non Welan wa Ivaēh nongēn Tigsas Kraēs.

!Ōl liwo kē mi nēlēn̄as qiyig gōh wa gaydēn̄ a babah ne qōn̄! Qeleanen.