1 Den Simon Pita, net mugumgu wa nahal non Tigsas Kraēs.

Hiy kimi a melep nēdēmtig mey a nitiy wē yeh haytēyēh mi nēdēmtig nonmem, heylō van litiy togtog tenenen non Ḡod wa Ivaēh nongēn, Tigsas Kraēs.

2 !Nasgōp wa natm̄at niōyheg kimi, niōyheg kimi, veg kimi nēglal Ḡod wa Tigsas, Welan nongēn!

3 Ḡod mal lep me hiy gēn nahaphap del a gēn so tēy nēh lap aē, wa totog togolgol van aē. Kē mal lep me nahaphap geh nan mi naman nonon. Gēn tētēy vēh nēh togolgol veg gēn mēglal kē a mōlōl tō gēn mi nēlēn̄as wa mi nēmētwōn mey a nitiy togolgol. 4 Mi nahaphap geh gōh en, kē melep me hiy gen navatvat mey nēwē a nitiy wē yeh. Kē melep me so kimi tuqultiwag vēh van lēh non Ḡod, ba van yak den namyōs het telemyam agōh.

5 Veg bege geh gōh en, atmi mugumgu maymay malig van tō so biyin̄ se van nēmētwumi mey netgolgol hiy nēdēmtig,

biyin̄ se van nololmeyen hiy nēmētwumi mey netgolgol,

6 biyin̄ se van namhuy hiy nololmeyen,

biyin̄ se van nētnegay liwo hiy namhuy,

biyin̄ se van nitiy togtog togolgol hiy nētnegay liwo,

7 biyin̄ se van netet lōlwē hiy nitiy togtog togolgol,

wa biyin̄ se van natamtam hiy netet lōlwē.

8 Kimi nēglal Welan nongēn Tigsas Kraēs, tō kimi mugumgu so galeg nahap a kē nemyōs. So nage del gōh ta-aē tō mi kimi, wa tō vaga kē tēwē malig se tō van en, togtō nēwan ta-aē mi kimi. Tō namgumgu ēwē namuy tit yeghuquy vēhte, ba kimi taktig nahaphap a kimi gagaleg veg Kraēs. 9 Ba so nage del gōh wo tateh tō mi net vitwag en, togtō net nan namatbē, wa nēdēmdēm nonon namaltē. Wa kē mololqōn̄ so Ḡod mal oh wenwen tō kē den negengenyeg nonon tam̄ag.

10 Yathithik wa yatētētek, kimi nēglal vatag so Ḡod mal ōlōl kimi wa mal vonyak vatag kimi. Kē mavatvat so nilep kal kimi alge. Bastō atmi mugumgu se mi navaksami so tēy navatvat nan. So kimi wo mak tēytēymat kimi bahaphap mey nēwē gōh en, kimi tit sisgoy vēhte. 11 Tō Ḡod telep vasgēt kimi mi namlaklak van lepnō yon̄ mey a notogtog lap vaga, napnō yon̄ non Welan wa Ivaēh nongēn Tigsas Kraēs.

12 Bastō bege gōh, nok so ak dēmlok kimi vaga bahaphap geh nan. No nēglal so kimi mal m̄ōleg aē, tō mal tig maymay lēhēyhēywē a kimi mal ēglal vatag. 13 Ba nok dēm so kē netnenen so nok ak matyak kimi vaga mi navap dēmlok gōh mahē a no nēh leptō agōh. 14 Veg no nēglal so et misin hōn te no tavan den kimi, qele Welan nongēn Tigsas Kraēs mal vasemlō me hiy no. 15 No temgumgu mi navaksek vaga tō so kimi tēdēm lok vēh naln̄ek, so no wo mamat.

16 Yēhē, kemem ige hal et dam te nakaka tam̄ag mahē a kemem mavasemlō van naman wa navanvan vagyō non Welan nongēn Tigsas Kraēs. Namaymay non Tigsas et nakaka te mey net mitin̄ yak so niwseg nēdēmdēm non net. Ba kemem metgeh nitiy maymay ne man nonon mi namtamem.

17 Veg kamtēl mahgemamtēl moyon̄teg Imam Ḡod, mahē nitiy lēn̄as nonon mihin̄yeg me, tō kē mōyheg Tigsas mi nēlēn̄as wa nēdēmap, wa mavap lō so, "Igōh kē intik a no natam kē, wa no nemlaklak veg kē." 18 Naln̄an en, kamtēl moyon̄teg a mavan me den alge, mahē kamtēl tiwag mi kē luwutwut yon̄.✝

19 Tō nohohole non ige lēgēlgēg nivasemlō so noyoy veg Tigsas en, ikē hēyhēywē. Ba gēn nēglal yeh so nohohole gōh maktig. Tō itōk so kimi van sisqet me so yon̄teg galgalsi, veg nohohole nan qele nuqul a nihin̄yeg lemlēglēg. Kē nihin̄yeg dēn̄ lengongomtap a lōqōn̄ a Tigsas so nivan lokse me, qele nam̄ha a nihatig wa nihin̄yeg lelo taqami. 20 Tō hag apwon yeh, kimi so ēglal so namanig ne vavap lēgēlgēg Layapyap Yon̄ en, namanig nan et van te me den nēdēmdēm non net ēwē. 21 Veg tateh vavap lēgēlgēg geh nivan me heylō lemyōs non net, ba Nuvu Yon̄ mōyheg net so nihole lō nohohole non Ḡod.