1 Kimi nēglal vatag so am̄ag ige lēgēlgēg galgal motog tiwag tō mi ige sil. Tō qelese nen, ige vatvatgo galgal notog se tiwag mi kimi. Kēy vatne bat navatvatne galgal a tak hethet vēh net. Kēy lēn̄lēn̄teg Welan a mēwēl yak tō kēy, ak tō so Ḡod tēvēvēg het nowmat kēy aē. 2 Woqse et tadam namtehal nonoy van lemyōs mey nehet. Tō veg kēy en, ige tohole hethet bemtehal ne hēyhēywē.* 3 Veg ige vatvatgo galgal maygay ēwē bēsēm, tō kēy mitin̄ yak ēwē hag nakaka so weseg nēdēmdēm nonmi aē. Ba Ḡod nenyē kēy vaga, wa et matbē te den kēy, so nivēvēg kēy.

4 Dēm lok qeleave Ḡod mēvēvēg ige het tam̄ag. Veg kimi nēglal vatag so me am̄ag en, mahē ige in̄sel megengenyeg en, Ḡod et tēygoy te nēvēvēg den kēy, ba kē mēyēt kēy wa mēvētleg kēy lemlēglēgsil a wōsōy so tog dēyē nēvēvēg nonoy. 5 Wa namyam tam̄ag en, kē mēvēvēg ige het mi nililip. Ba Noah en, net botoytoy nele tenenen, Ḡod metgoy kē tiwag mi ige bul liviyō nonon. 6 Tō napnō Sodom tiwag mi Ḡomorah en, Ḡod mēvēvēg kōyō, a nep me gen sabun kōyō. Ba nēvēvēg gōh en, ikē nēvēglal ne vēvēg a Ḡod tēvētleg van hiy ige a et dēmap te Ḡod. 7 Ba Ḡod mavaēh net tenenen vitwag den nep nan. Ikē Lot,✝ a kē moyon̄yon̄ ninhet veg bēmētwun ige et behelhel nele. 8 Net tenenen gōh, kē notogtog tiwag mi kēy. Tō vel qōn̄ kē niyon̄yon̄teg wa nietet namgumgu behelhel nele en, tō kē moyon̄teg nehet aē veg nalo taqan newenwen so tatag nēmētwun Ḡod.

9 Ige a nēdēmap Welan en, kē tavaēh vēh kēy den nem̄eygal. Kē nēglal aē. Ba ige a et dēmap te kē en, kē tēyēt maymay kēy dēn̄ lōqōn̄ bēvēvēg ige del. 10 Ḡod tēvēvēg yakhagyeh ige a et tog te leln̄e yon̄teg wa damdam namyōs het ne taqn̄ige a niak lemlem net. Kēy nelem̄ag wa nosotel, tō kēy et mētēgteg te so hole legelge ige a nēlēn̄as non Ḡod aē mi kēy. 11 Ba ige in̄sel gōh en, kēy et lep lok te nohohole het hiy kēy. Hēywē so ige in̄sel namaymay wowoh wa naman nonoy nilwo, ba kēy et hole legelge te so vēvēg ige het nan van lengon Welan.

12 Ige vatvatgo het qele nahaphap qiyig tuytuy a nēdēmdēm nonoy tateh. Namyōs nonoy vēlēs nitig helem̄ag kēy, tō kēy hohole hethet lahaphap mey a kēy et ēglal tē. Qele nahaphap tuytuy a net nilep wa niwuh mat begengen en, Ḡod tēvēvēg kēy qeleanen, tō kēy teqleqlen̄ a teqleqlen̄. 13 Kēy mak nehet tō nayseyse nonoy noyon̄yon̄ ninhet. Kēy malaklak betrotron̄ a et litiy qōn̄ nan te. Kē qele nanye haphap a niakak m̄usm̄us neleleh. Nēmētwuy en, bakak soloteg vēlēs nokolkol nonmi veg kē sēsē kēy bagalgal nonoy. 14 Nēdēmdēm nonoy nōyheg notogay het, ba namaygay nan tit bah vēhte den kēy. Tō kēy tewseg me ige mey a nēdēmdēm nonoy nem̄geygey. Tō namyōs ne sēm nilwo lelo taqay. !Ba kēy notog leln̄e vipdeg!

15 Kēy muwulyis den namtehal mey netnenen tō mavan ba meqlen̄, ba madam namtehal non Balaam, ēntēn Beor, a kē natam nēwēlwēl nonon bemgumgu het.✝ 16 Ba nodon̄ki vitwag, a tit hole vēhte qele net, mohole van hiy Balaam mi naln̄e et, wa mōlgontegoy net lēgēlgēg gōh so nitigoy kē den nēdēmdēm qaqa.

17 Ige vatvatgo het gōh nilwo yeghuquy ēwē qeleso newel a tateh bē alon, si so namlēg a nelen̄ wuh musuwyeg yak kēy. Ba ige gōh en, wōsōy a nemlēglēgsil mal tēymat veg kēy.

18 Veg kēy m̄eygal ige mey a tiqyo van yak ēwē tō den ige a notog legengenyeg. Kēy hole sotel namyōs het ne taqn̄ige, ba nēdēmdēm nan yeghuquy. 19 Kēy vatvat galgal van hiy ige sil so kēy totog m̄ōleg galgalsi. Ba ige vatvatgo het nan, negengenyeg newelan goy kēy, tō kēy damdam ēwē namyōs het nonoy. Kēy qeleso ige slev. Veg nahap a nilalaket goy net vitwag en, kē nivan me neslev nonon.

20 Veg sowo Welan wa Ivaēh nongēn Tigsas Kraēs mukēg taywah kēy tō den namyōs het telemyam gōh en, ba mey atgiy kēy van gon lokse legengenyeg, tō namyōs het nan nilalaket lokse goy kēy. Bastō kēy mitiy het den am̄ag. 21 Veg, sowo kēy tēglal vēh te tō namtehal tenenen en, tiy wē yeh mi kēy, den a kēy nēglal galsi ba mitig kēlē namtehal ne le yon̄ a Ḡod melep van hiy kēy.

22 Bastō namtevuy nivasemlō me navap tēngeg hēyhēywē tam̄ag a mavap so, "Notok mavan tō megen lok nōlōlō nonon mahgen," wa tō "Noqo a mal suwsuw vatag ōk, menhiy lok van leqlēs lem."