Milagres de Jesus

Yesu ahonya mant’hunt’hu waidi

27 Yesu eze ahalawe hadya, no kugendeela kulongole, mant’hunt’hu waidi, wamwiizilaga wakalonga kwa izwi kulu wakagamba, "Mwana Daudi kionele mbalazi!"

28 Yesu eze engile, wadya mant’hunt’hu waidi wamtimilaga, niyo awauza kugamba, "Togoleni, mwahuwila kugamba nadaha kuwahonyani?" Niyo wagamba, "Heiye Zumbe, wadaha."

29 Yesu niyo ayatoza meso yawe na kuwagamba, "Nevinde enga viya mhuwile!" 30 Meso yawe niyo yaona naho. Yesu niyo awafingiza akawagamba, "Msekumgambila mnt’hu yeyose imbuli ino!"

31 Mna woho weze waite niyo wagendeza zimbuli za Yesu mwe isi idya yose.

Yesu ahonya Mant’hunt’hu Waidi

29 Umwo Yesu na wanamp’hina wakwe wakalawa Yeliko, fyo kulu dya want’hu dyamtimilaga. 30 Want’hu waidi mant’hunt’hu wekalaga hank’handa he sila. Naho weze weve Yesu omboka, niyo wabongeela wakagamba, "Zumbe Mwana Daudi kionele mbazi."

31 Want’hu niyo wawativila no kuwagamba wanyamale, mna woho niyo wagendeela kukweza izwi, "Zumbe Mwana Daudi kionele mbazi."

32 Yesu niyo akimala no kuwetanga, niyo awauza, "Mwaunga niwadamanyileni mbwai?"

33 Niyo wamhitula, "Zumbe chaunga kidahe kuwona."

34 Yesu niyo awaonela mbazi, niyo awadosa meso yawe, aaho niyo wadaha kuwona, no kumtimila.

Yesu amhonya mnt’hu mant’hunt’hu uko Betisaida

22 Niyo wabula kwo mzi ukwitangwa Betisaida, niyo want’hu wamwigaila Yesu mnt’hu andile nt’hunt’hu. Wakamwiila amdose. 23 Yesu niyo amguha yudya nt’hunt’hu, aita naye kuse yo mzi. Niyo amtweela mate mwa meso, amwiikila mikono na kumuuza, "Wadaha kuwona kint’hu chochose?"

24 Yudya mnt’hu niyo akaula na kugamba, "Heiye! Naona want’hu wakugenda, wekale enga miti."

25 Yesu niyo aika mikono yakwe naho mwa meso ya yudya mnt’hu. Nt’hambo ino, meso yakwe niyo yagubuka, anda aona kila kint’hu vedi vitendese. 26 Yesu niyo amgamba auye kaya, mna kamfingiza asekombokela kwo mzi udya.

Yesu amhonya heekwiva na kimumu

31 Yesu niyo ahalawa mwe mihaka ya Tilo, akombokela hagati ya Sidoni, akaita kwe diziwa Galilaya na mpaka mwe isi ikwitangwa Mizi Mlongo. 32 Niyo wamwigaila mnt’hu heekwiva naho mta kigugumo. Niyo wamwiila Yesu amwikile mikono. 33 Yesu niyo amguha no kuita nae kunk’handa hekwiina want’hu. Niyo agela madole mwe magutwi ya yudya mnt’hu. Naho atwa mate na kumdosa mwo lulimi. 34 Yesu niyo enula meso kulanga, atoa nkwilo, niyo amgamba yudya mnt’hu, "Efata!" Nuko kugamba, "Lohoka!"

35 Ahadya magutwi ya mnt’hu yudya niyo yakomoka no lulimi lwake nalwo lwalegela. Niyo akonga kulonga vedi vitendese. 36 Niyo Yesu awafingiza wasekumgambila mnt’hu yeyose mbuli izo. Mna kila ivo naakawafingiza, woho nivo nawakatendesa kubilikiza kose mbuli izo. 37 Wadya wose wevile naweheleswa. Wakagamba, "Katenda kila kint’hu vedi! Kawatenda wata magutwi hayeekwiva weve, ne vimumu walonge!"

Yesu amhonya Batimayo nt’hunt’hu

46 Wabulaga Yeliko. Yesu na wanamp’hina wakwe hamwenga na fyo kulu dya want’hu weze wande wahalawa, nt’hunt’hu yumwenga etangwagwa Batimayo mwana Timayo, andaga akekala hank’handa he sila akalombeza vint’hu mwa want’hu. 47 Eze eve ni Yesu wa Nazaleti andile akomboka, akongaga kubongeela, "Yesu! Mwana Daudi! Niyonele mbazi!"

48 Want’hu wengi niyo wamtivila vileke anyamale. Mna yehe niyo agendeela kubongeelesa, "Mwana Daudi, nionele mbazi!"

49 Yesu akimalaga niyo agamba, "Mwitangeni."

Wamwitanga yudya mnt’hu niyo wamgamba, "Keink’he moyo. Inuka, akwitanga."

50 Yehe naye aduulaga suke yakwe, niyo apilika na kuita kwa Yesu.

51 Yesu niyo amuuza, "Waunga hudamanyilei"

Yudya t’hut’hu niyo amhitula, "Naunga nione naho."

52 Yesu niyo amgamba, "Keitile, mhuwi wako ukuhonya."

Meso yakwe yagubukaga ahadya, niyo aona naho, niyo amtimila Yesu mwe sila.

Yesu amhonya mnt’hu mant’hunt’hu kilombezi

35 Yesu eze ande hagihi na Yeliko, handaga na mnt’hu yumwenga mant’hunt’hu, ekale hagihi ne sila akalombeza. 36 Eze eve idifyo dya want’hu dyomboka, niyo auza, "Kuna mbwai?"

37 Niyo wamgamba, "Yesu wa Nazaleti omboka."

38 Niyo agutila akagamba, "Yesu, mwana Daudi nifiile mbazi!"

39 Wadya want’hu walongole niyo wamtivila no kumgamba anyamale, Mna yehe niyo ongezelesa kugutila akagamba, "Mwana wa Daudi nifiile mbazi."

40 Niyo Yesu akimaala no kusigila wamwigale kwakwe yudya mant’hunt’hu. Eze abule hagihi niyo Yesu amuuza, 41 "Waunga hutendelei?"

Niyo ahitula, "Zumbe, naunga nivuzilwe ukuona."

42 Yesu niyo amgamba, "Ona, mhuwi wako ukuhonya."

43 Aaho niyo anda akaula vedi, niyo amtimila Yesu akamtogola Mnungu. Want’hu weze waone ayo niyo wamtogola Mnungu.

Yesu ahonya mnt’hu elekwe mant’hunt’hu

1 Umwo Yesu andile akomboka, amuwonaga mnt’hu andaga mant’hunt’hu kukongela kwelekwa kwakwe. 2 Wanamp’hina wakwe niyo wamuuza, "Mhinizi, mnt’hu uyu na wadya wamweleke ni yuhi adamanye wiihi vilekile akalekwa mant’hunt’hu?"

3 Yesu niyo ahitula, "Yuno hadamanye wiihi naho hata wadya wamweleke. Mna ivi vilaila vileke ndima za Mnungu zioneke. 4 Naho yaungigwa kizidamanye zindima zakwe yehe akisigiile kukei nomsi, kilo cheza naho mnt’hu haadahe kudamanya ndima. 5 Lupisi nili mwe isi, miye ni ung’azi we isi"

6 Eze ajink’he kulonga ivo, niyo atwa mate hasi, adamanya nt’hope kwa yadya mate, amhaka int’hope idya mwa meso, yudya andile nt’hunt’hu. 7 Niyo amgamba, "Ita ukahake mwe dibilika dya Siloamu." Zina Siloamu ni ulosi wa Kiibulania, nuko kugamba, "Atumigwe." Basi niyo aita nao kuhaka mazi, niyo auya meso yakwe yaona.

2 Mnt’hu yumwenga mta matana amwiziilaga Yesu akamfikila madi akamgamba, "Zumbe, uneva ukaunga, wadaha kunitenda nisunt’hike." 3 Niyo Yesu achulula mikono yakwe, niyo amkwafa uku aka mhitula kugamba, "Naunga." "Sunt’hika!" Aaho, niyo yudya mta matana ahona. 4 Niyo Yesu amgamba, "Kaula usekugambila mnt’hu yeyose. Mna wiite kwa mlava nt’hambiko mkulu ukakelagise kwakwe, unde uwona kwa want’hu wose kugamba kuhona, naho ukalave malavo enga viya Musa asigiilaga."

2 Want’hu wamwigailaga mnt’hu aholomp’hale alambalikagwa mwo lusazi. Yesu eze aone uwedi utendese wo mhuwi wawe, niyo amgamba yudya aholomp’hale, "Mwanangu, keink’he moyo, kuusilwa wavu wako."

3 Niyo wahinizi wamwenga we miko, walosanyaga wakagamba, "Mnt’hu uyu amhomola Mnungu!"

4 Yesu abunk’hulaga zifanyanyi zawe niyo awagamba, "Nii mwafanyanya wiihi mwe mioyo yenyu? 5 Ni kihi kihufu vitendese, kugamba, kuusilwa wavu wako, hegu kugamba, inuka ugende? 6 Viya naunga niwalagiseni kugamba, Mwana Mnt’hu haswesile udahi mwe isi wo kuwausila want’hu wavu ywawe." Ivo amgamba yudya aholomp’hale, "Inuka, inula lusazi lwako ukeitile kaya!" 7 Yudya mnt’hu aholomp’hale akimaalaga na kuita kaya.

10 Uko kwandaga na mnt’hu yumwenga aholomp’halaga mkono. Naho handaga na want’hu waungaga wamgele Yesu mwa masa. Niyo wamuuza, "Hivo vedi mwe Miko yetu kumhonya mnt’hu mwe dizuwa dye Kuhumula?"

11 Yesu niyo awahitula kugamba, "Togoleni, niani mwa nyuwe mta ngoto ingile mwe digenge, heekudaha kuilava mwe dizuwa dyo Kuhumula? 12 Naho mnt’hu ni ugoli utendedese kujink’ha ngoto. Naivo elo, mwe Zimiko hazikukifingiza kudamanya yedi mwe dizuwa dyo Kuhumula." 13 Niyo amgamba yudya aholomp’hale mkono, "Chulula mkono wako."

Niyo auchululaga mkono wakwe, niyo wanda mgima enga udya umtuhu.

30 Nine dya mkaziwe Simoni andaga mo lusazi hakudaha. Ahadya weze wabule, niyo wamgambila Yesu mbuli idya. 31 Yesu niyo asogela hagihi ha yudya mnyonge. Amtozaga mkono no kumwinula. Udya unyonge niyo wamlekela, naye niyo akonga kuwakont’hela.

Yesu amhonya mta matana

40 Mnt’hu mta matana niyo aita kwa Yesu, amhembelezaga akata kufika madi niyo amgamba, "Ukaunga, wadaha kunikukiza."

41 Yesu niyo amwonela mbazi niyo achulula mkono wakwe, niyo amtoza. Niyo amgamba, "Naunga kukwambiza, ukuke!" 42 Ahadya niyo matana yakuka mwo mnt’hu yudya, niyo anda mgima.

3 Niyo weza want’hu wamwigaile Yesu mnyonge wawe aholole enulwe ni want’hu wane. 4 Kwaviya want’hu nawamemesa, hawadahile kumbwila Yesu. Niyo waponk’hola langa kulanga kwe nyumba idya, hadya andile Yesu. Niyo waseleza lusazi lwa yudya mnyonge.

5 Yesu eze aone mhuwi wawe, niyo amgamba yudya mnyonge aholole, "Mwanangu, kuusilwa wavu wako."

6 Wahinizi watuhu we Miko wandile mdya mwe nyumba niyo wakonga kufanyanya mwe mioyo yawe, 7 "Nii uyu alonga ivi? Amhomola Mnungu! ni ani akudaha kuusa wavu uneva hi Mnungu ekedu!"

8 Ahadya Yesu niyo amanya moyo wakwe yadya nawakayafanyanya mwe mioyo yawe. Niyo awauza, "Nii mwafanyanya ivo mwe mioyo yenyu? 9 Mbuli mp’hufu ni ihi, kumgamba mta kuholola, ‘Kuusilwa wavu wako’, hegu kumgamba, ‘Inuka guha lusazi lwako wiite’? 10 Mna, vileke mmanye kugamba, Mwana Mnt’hu ana udahi wa kuwausila want’hu wavu wawe mwe isi." Amgamba du yudya mnt’hu aholomp’hale, 11 "Nakugamba, kimala, guha lusazi lwako wiite kaya."

12 Ahadya yudya mnt’hu niyo akimaala no kuketwika lusazi lwakwe, niyo ahalawa want’hu wose wakamkaula. Want’hu wose weze waone viya, niyo wehelwa na kumtogola Mnungu wakagamba, "Hakinati kione mbuli enga ino!"

Yesu amhonya mta mkono uholomp’hale

1 Niyo Yesu engila naho mwe Nyumba ank’hulu ya Mnungu. Uko Nokunda na mnt’hu mta mkono uholole. 2 Mafalisayo watuhu nawakazungula mbuli ya kumlongeleza. Niyo wakaula vileke waone uneva naamhonye mnt’hu yudya mwe dizuwa dya Kuhumula. 3 Niyo Yesu amgamba yudya mnt’hu aholole, "So aha hagati." 4 Niyo awauza, "Sigilizi zaunga kidamanye kihi mwe dizuwa dya Kuhumula, kudamanya mbuli yedi hegu iihile? Kuhonya ugima wa mnt’hu hegu kuukoma?"

Mna niyo wanyamala twi! 5 Yesu niyo ahituka nt’hendelo zose akawang’oela meso kwa maya. Niyo awaonela mbazi kwo udala we mioyo yawe. Akajika amgamba yudya mnt’hu, "Kusula mkono wako." Naye niyo aukusula, ahadya mkono wakwe niyo wanda mgima.

Yesu amhonya mta matana

12 Yesu eze atende emwe mzi umwenga, nahenda na mnt’hu mta matana. Naye eze amwone Yesu, niyo amfikila madi no kumnombeza, niyo agamba, "Zumbe, ukaunga, wadaha kunisunt’ha!"

13 Yesu naye niyo akusula umkono wakwe, amdosa na kumgamba, "Naunga, sunt’hika!" Ahadya matana niyo yamlawa mnt’hu yudya.

18 Niyo weza want’hu wenule mwo lusazi mnt’hu aholomp’hale. Nawakaunga wamwigale kundani uko andaga Yesu. 19 Mna kwaviya want’hu nawamema, niyo wadunduga kumwigala kundani. Ivo wamkwezaga kulanga kwe nyumba, niyo waponk’hola langa no kumseleza mwo lusazi lwakwe na kumwika hagati he difyo dya want’hu, hameso ha Yesu. Want’hu wane wakamseleza mnyonge mwe dilanga Lowering Man Through the Roof. 20 Yesu eze aone mhuwi wawe, niyo amgamba yudya mnyoge, "Mbuyangu, kuusilwa wavu wako."

21 Niyo wahinizi we zimiko hamwenga na Mafalisayo wakongaga kulafya wakagamba, "Uyu ni ani akumlonga vihile Mnungu? Ni ani akudaha kuusila uwavu? Mnungu ekedu niye akudaha kuusila uwavu!"

22 Yesu nakamanya viya wakubanikanyanya, niyo awagamba, "Nii mwafanyanya mbuli izo mwe mioyo yenyu? 23 Dihuhile ni dihi, kugamba, ‘Kuusilwa uwavu wako,’ hegu kugamba, ‘Inuka uite’? 24 Mna naunga mmanye kugamba, Mwana wa Mnt’hu ananao udahi wo kuwausila want’hu uwavu wawe." Niyo amgamba yudya mnt’hu aholomp’hale, "Nakugamba, kimala, inula lusazi lwako wite kaya kwako!"

25 Ahadya mnt’hu yudya niyo akimaala hameso yawe, niyo aketwika lusazi lwakwe, niyo aita kaya kwake uku akamtogola Mnungu.

Mnt’hu mta mkono uholomp’hale

6 Mwe dizuwa dituhu dyo Kuhumula, Yesu agendaga kuhiniza kwe Nyumba ank’hulu ya Mnungu. Mna mwe idya nyumba mwandaga na mnt’hu aholole mkono wa kulume. 7 Wahinizi we miko hamwenga na Mafalisayo watuhu nawanda wazungula mzungu wo kumgwiila Yesu. Niyo wakaula uneva naamhonye yudya mnyonge mwe dizuwa dyo Kuhumula. 8 Mna Yesu niyo abunk’hula ivo wakufanyanya, niyo amgamba yudya mta mkono uholole, "Inuka ukimale hagati." Yudya mnt’hu niyo enuka na kukimala hagati. 9 Niyo Yesu awagamba, "Nawauzani nyuwe, ivi miko yetu yakigamba suwe kidamanyei mwe dizuwa dyo Kuhumula? Kudamanya mbuli zedi hegu mbuli ziihiye? Kuhonya ugima wa mnt’hu hegu kuukoma?" 10 Ahitukaga nt’hendelo zose akawakaula, niyo amgamba yudya mnt’hu mta mkono uholole, "Chulula mkono wako." Yudya mnt’hu niyo atenda enga ivo agambilwe, mkono wakwe niyo wanda mgima naho.

Yesu ahonya mwana ywa mkulu yumwenga wa watowani wa Loma

1 Yesu eze ajike kulonga zimbuli izo kwa want’hu, niyo ahalawa na kuita Kapelinaumu.

2 Mtumwa ywa mkulu yumwenga ywa watowani wa Kilumi andilisaga mnyonge. Naho mkulu uyo naakamuungisa. 3 Mkulu uyo eze eve zimbuli za Yesu, niyo asigiila wadala vilongozi wamwenga wa Kiyahudi kwa Yesu wamlombeze vileke eze amhonye mtumwa ywakwe. 4 Nawo weze wabule kwa Yesu, wamweilisa wakamgamba, "Mnt’hu uyu kawagilwa umtendele imbuli ino 5 kwaviya nakawaungisa want’hu, naho kakizengela Nyumba ank’hulu ya Mnungu."

6 Ivo Yesu niyo aita hamwenga nawo. Hata eze ande e haguhi ne kaya ya yudya mkulu wawa watowani, niyo yudya mkulu ywa watowani asigiila mnt’hu kwakwe akamgamba, "Zumbe, usekwangadika kwiza kwangu, kwaviya miye hina wedi ukukutenda weye wingile kwangu, 7 naho miye name hina wedi wakunitenda kwiza kwako. Mna longa mbuli du, mtumwa ywangu naahone. 8 Kwaviya miye name ni mnt’hu mta udahi, naho nnanawo watowani we hasi yangu. Hamgamba yumwenga, ‘Ita!’ Naye aita, naho hamgamba mtuhu, ‘So!’ Eza, naho hamgamba mtumwa ywangu, ‘Damanya ivi!’ Adamanya."

9 Yesu eze eve ayo, niyo ehelwa, niyo awahitukila want’hu wandile wakamtimila no kuwagamba, "Nawagambilani, hinati nione mnt’hu mta mhuwi enga uno mwe isi ya Izilaeli!"

10 Naho wadya want’hu watumigwe weze wauye kaya kwa yudya mkulu wawa watowani, niyo wambwiila yudya mtumwa mnyonge kahona.

11 Aaho handaga na mvele yumwenga andaga na mp’hepo, yamtendaga ande mnyonge kwa myaka mlongo na mnane, naho nakabunt’hika, heekudaha kukimaala kwa kuchuluka. 12 Yesu eze amuone niyo amwitanga, no kumgamba mnala kuhonyigwa unyonge wako. 13 Niyo amwikila mikono, ahadya mwili wakwe niyo wachuluka, niyo akonga kumtogola Mnungu

Yesu ahonya mnyonge

1 Zuwa dimwenga dya kuhumula Yesu nakaita kudya mkande kwe kaya ya mnt’hu yumwenga kilongozi ywa Mafalisayo, aho handaga na want’hu wandaga wakampelemba Yesu. 2 Naho, handaga na mnt’hu yumwenga andile na unyonge wa belebele amwizilaga Yesu. 3 Yesu niyo awauza wahinizi we Miko hamwenga na Mafalisayo kugamba ni vedi, "Miko yetu yakilekela kiwahonye want’hu mwe dizuwa dyo kuhumula?"

4 Mna niyo wanyamala. Yesu amtozaga yudya mnyonge niyo amhonya niyo amlekela akeitile.

Yesu ahonya want’hu mlongo

11 Umwo Yesu andile mwe int’hambo ya kwita Yelusalemu, nakombokela mwe imihaka ye Samalia na Galilaya. 12 Viya andile akengila mwe kaya, niyo adugana na want’hu mlongo wandile wakahuma matana. Wakimalaga hale, 13 niyo wakweza izwi wakagamba, "Zumbe Yesu, ukionele mbazi,"

14 Eze awaone niyo awagamba, "Iteni kwa walava nt’hambiko, mkakelagise." Mna Umwo wakaita, niyo amatana yawe yahona. 15 Yumwenga eze aone kahonywa niyo auya uku akamtogola Mnungu kwa izwi kulu. 16 Niyo amfikila Yesu madi na kumtogola, naho mnt’hu uyo andaga Msamalia. 17 Yesu niyo agamba, "Wahonyigwe na wanda mlongo, wadya kanda weihi? 18 Hahali mtuhu auiye kwiza kumtogola Mnungu mna nu uyu Mgeni du?" 19 Yesu niyo amgamba, "Kimala ukeitile, mhuwi wako ukuhonya."

Yesu ahonya mnt’hu hagihi ne dikawa

1 Niyo handa na zuwa dya kinyemi ya Wayahudi, Yesu nae niyo akwela kwita Yelusalemu. 2 Naho Yelusalemu, hagihi ne nk’hili ikwitangwa nk’hili ya ngoto handaga na kawa dya mazi dikwitangwa kwa kiibulania Betisaza, naho nedinda na wazila washano wazunguluke wa kombokela. 3 Naho wanyonge wengi, mant’hunt’hu, viwete na waholole, nawagona mwe ziya zisila zo kombokela. 4 Nawakagoja mazi yatibulwe, Kwaviya hamwenga aha mtumwa ywa Mnungu naakeza he dikawa na kuyatibula amazi. Mnyonge ywa nk’hongo kwingila mwa mazi umwo mmazi yakanda yatibulwa naakahona unyonge wowose andile nao. 5 Hadya nahanda na mnt’hu andile mnyonge kwa myaka milongo mitatu na mnane. 6 Yesu eze amuone yudya agonile, amanyaga kugamba andaga iivo kwa lupisi lutali, niyo amuuza, "Waunga unde mgima?"

7 Yudya mnyonge niyo amhitula, "Zumbe, miye hina mnt’hu akuunga anigele mwe dikawa dya mazi viya mazi yanatibulwa, viya miye heza, kuna mnt’hu mtuhu akunilongoela."

8 Yesu niyo amgamba, "Kimala ketwike kigonelo chako wiite." 9 Ahadya yudya mnyonge niyo anda mgima, aketwika kigonelo chakwe na kugenda, naho zuwa diya nedinda dya kuhumula.

46 Niyo abula vituhu mo Mzi wa Kana wandile Galilaya hadya ahitule amazi kunda divai. Nahanda na mkulu yumwenga wa selikali, Mwanawe na kanda mnyonge uko Kapelinaumu. 47 Uyo eze eve Yesu keza kulawa Uyahudi mpaka Galilaya niyo aita kwake, amlombezaga vileke asele, aite akamhonye Mwanawe ywa kibwanga, kwaviya na kanda hagihi na kubanika. 48 Yesu niyo amgamba, "Haheina kuwona kilagiso na vihungi, hamkudaha kuhuwila." 49 Yudya mkulu wa selekali niyo amgamba, "Zumbe hakeseleza seka Mwanangu anabanike." 50 Yesu niyo amgamba, "Keitile, mwanao mgima!"

Yudya mt’hu niyo ahuwila viya Yesu amlongile niyo atimila sila no kuita kwake. 51 Viya ndile akei mwe sila, wandima wakwe niyo wambwila na mbuli kugamba, "mwanawe kahona kale udya unyonge!"

52 Eze awauze umuda mwanawe ahonile niyo wamgamba, "Unyonge umleka gulo msi wa saa mfungate." 53 Aaho ise niyo amanya umuda ni udya agambilwe na Yesu, "Mwanao, mgima kahona". Niyo ahuwila yehe hamwenga na wose wandile mwe nyumba yakwe.

54 Icho ni kilagiso cha kaidi adamanye Yesu viya alaile Uyahudi mpaka Galilaya.

20 Aaho, niyo alaila mvele yumwenga andaga akahuma unyonge wakulawa sakame ibuile myaka mlongo na miidi, amtimilaga Yesu niyo adosa imp’hindilo ye suke ya Yesu. 21 Alongaga kimoyomoyo kugamba, "Nnadosa du isuke yakwe, nenihone."

22 Yesu ahitukaga, niyo amuona yudya mvele, niyo amgamba, "Keink’he moyo mwanangu. Mhuwi wako ukuhonya." Aaho yudya mvele niyo ahona.

25 Mwa wadya want’hu, nomnda na mvele yumwenga andile na unyonge wa kulawa sakame kwa myaka mlongo na miidi. 26 Yudya mvele nakasulumila vidala kwa wagangana wabindile ingi mna hahonile. Kafoseza vint’hu vakwe vose, mna unyonge wakwe nounda hunati kuhona. 27 Yudya mvele eze eve mbuli za Yesu, niyo awajink’ha want’hu mwo mdugano, no kumbasa Yesu kwa kunyuma. Eze ambwiile, niyo adosa suke yakwe, 28 kwaviya nakalonga mwo moyo wakwe, "Uneva nna dosa suke yakwe du, nenihone."

29 Eze adose du idya suke, aaho isakame niyo yaleka kumlawa, aaho mwenye niyo abunk’hula mwo mwili kugamba kahona.

43 Mwa awo want’hu, andaga umwo mvele yumwenga andaga na unyonge wa kulawigwa ni sakame kwa malavo mlongo na miidi. Mvele uyo azaga vint’hu vingi kwa kuwenk’ha walaguzi, mna hakwandile na yoyose adahile kumhonya. 44 Niyo amwiziila Yesu kwa kumtimila kunyuma, niyo adosa imp’hindilo ye suke ya Yesu. Aaho, niyo isakame yaleka kumlawa. 45 Yesu niyo auza, "Ni ani anidosile?"

Want’hu wose weze wakane, Petulo niyo amgamba, "Zumbe, fyo dikuzunguluka na kukuvigaviga!"

46 Mna Yesu niyo agamba, "Eyuko mnt’hu anidosile. Hibunk’hula ivo kwaviya hiona ludole lukanilawa." 47 Yudya mvele eze aone hakudaha kukekifisa, niyo amwiziila Yesu akazingiza, niyo akeduula heviga va Yesu. Ahadya mwekiyeti cha want’hu amgambilaga Yesu kiya chamtendile akamdosa, na ivo ahonile aaho eze amdose. 48 Yesu niyo amgamba yudya mvele, "Mwanangu, mhuwi wako ukuhonya, ita na utondowazi."

Mwana kike ywa zumbe na mvele mnyonge

18 Umwo Yesu andaga akalonga ivi, mkulu yumwenga ywa Kiyahudi amwiizilaga na kumfikila madi akamgamba, "Mwanangu ywa kivele kabanika haluse ivi, elo so uka mwiikile mikono, naande mgima."

19 Yesu hamwenga na wanamp’hina wakwe enukaga niyo waitanya naye.

23 Yesu engilaga mwe nyumba ya yudya mkulu. Awabwiilaga want’hu wakuhongeza ndilo 24 niyo awagamba, "Foseni kuse wose! Mwana uyu habanike, kagona du!" Niyo wose wamseka. 25 Mna aaho want’hu weze wafose kuse, Yesu engilaga kwe nyumba kudya andaga yudya mndele abanike, amtozaga mkono niyo mndele enuka.

22 Niyo eza mnt’hu yumwenga akwitangwa Yailo, yumwenga wa wakulu we Nyumba ank’hulu ya Mnungu. Eze amwone Yesu, niyo amgweela mwe viga vakwe, 23 niyo amwiila vidala, amgamba, "Mwanangu wa kivele alumiswa. Nakuiila wize kaya vileke umuikile mikono yako ahone na kunda mgima."

24 Yesu niyo aita hamwenga naye. Fyo kulu dya want’hu nadikamtimila Yesu na kumvigaviga.

38 Weze wabule mwe nyumba ya Yailo, Yesu nakaona vugo, na kwiva ndilo na kuhongeza. 39 Yesu niyo engila kwe nyumba, niyo awagamba, "Kwa ajili yani mwatenda vugo naho uku mwaila? Mwana habanike, kagona du!"

40 Mna want’hu niyo wamseka. Ivo niyo awalava want’hu wose kuse, niyo amguha ise na nine dya yudya mwana na wadya wanamp’hina watatu, niyo wengila mwe chumba kiya andile yudya mwana. 41 Niyo amtoza yudya mwana mkono na kumgamba, "Talita kumi!" Nuko kugamba "Mndele, nakugamba inuka!"

42 Ahadya yudya mndele niyo enuka na kukonga kugenda. Mndele yudya andaga na myaka mlongo na miidi. Dize dilaile idyo, want’hu niyo weheeleswa.

31 Yesu niyo agamba, "Ivi niwaliganye na kint’hu chani want’hu we cheleko iki? Ivi want’hu awa waligana na mbwai? 32 Waligana na wana wekale kwe digwilo. Fyo dimwenga dikwitangana na tuhu kugamba, ‘Nakiwatoela mluli mna hamvinile, naho nekiwakemela wila wa kuhongeza mna hamwiile!’ 33 Yohana Mbatizi nakeza, hakudya nk’hande naho hakunywa divai, nanywe niyo mwagamba, ‘Ana mp’hepo!’ 34 Mwana Mnt’hu keza, akadya no kunywa, nanywe niyo mwagamba, ‘Mkauleni mnt’hu uyu, mhank’hu naho mkozi. Wambuyaze ni waduganya kodi na wata wavu!’ 35 Mna mzungu wa Mnungu uoneka kunda kindedi kwa want’hu wose wakuuzumila."

Yesu mwe nyumba ya Simoni Mfalisayo

36 Mnt’hu yumwenga Mfalisayo niyo amlalika Yesu kaya kwakwe akadye nk’hande ya kilo. Yesu niyo aita kwe nyumba ya yudya Mfalisayo no kwikala vileke adye. 37 Mwo mzi udya, kwandaga na mvele yumwenga mta wavu. Niyo eva kugamba Yesu adya nk’hande mwe nyumba ya yudya Mfalisayo. Niyo eza na kashupa kandaga na mavuta yana mhemp’he.

41 Niyo eza mnt’hu yumwenga akwitangwa Yailo, naye ni mkulu we nyumba yo kuvikila. Eze ambwiile Yesu, amgweela mwe viga, akeiila kwa Yesu waitanye kwakwe 42 kwaviya mwanawe ywa kike heendile na miyawe naakatoweela. Mwana uyo andile na myaka mlongo na miidi.

Umwo Yesu andile akaita, want’hu nawakamgela lugovyagovya nt’hendelo zose.

49 Umwo Yesu andile akalonga ayo, ezaga mnt’hu kulawa kwe kaya ya Yailo. Niyo amgamba Yailo, "Use kumgela lugovyagovya Mhinizi. Mwanao kabanika kale."

50 Mna Yesu eze eve ayo, niyo amgamba Yailo, "Use kogoha, weye huwila du, mwanao naa hone." 51 Eze abule kwe kaya ya Yailo, hazumile mnt’hu yoyose engile naye kwe nyumba, ila Petulo na Yohana na Yakobo, hamwenga na ise na nine dya yudya mwana. 52 Want’hu wose nawanda wakaila no kuhongeza ifile ya yudya mwana. Yesu niyo awagamba, "Msekuila, mwana habanike, kagona du!"

53 Want’hu niyo wamsekesa kwaviya nawamanya kugamba mwana yudya kabanika kale. 54 Mna Yesu niyo amtoza mkono niyo amgamba, "Mwanangu, inuka!" 55 Ugima wakwe niyo wamuuiya, aaho niyo enuka. Yesu niyo awagamba wamwink’he nk’hande. 56 Welesi wakwe niyo weheleswa, mna Yesu niyo awafingiza wasekumgambila mnt’hu yoyose diya dilaile.

File Lazalo

1 Kuna mnt’hu akwitangwa Lazalo endile akekala Besania, mnt’hu uyu andaga mnyonge. Besania na winda mzi akwikala Maliamu na lumbudye Masa. 2 Maliamu uyu ni yudya amhakile mavuta Zumbe, yo mhemp’he mwo mtwi wakwe nakumhangusa ne zifili zakwe. Mkuluwe akwitangwa Lazalo nie andaga mnyonye. 3 Wadya walumbuze niyo wamwigaila ulosi Yesu, kugamba, Zumbe "mbuyayo Lazalo alumwa."

4 Yesu eze eve mbuli ino niyo alonga, "Unyonge uno homtende Lazalo abanike, unyonge uno ulaila vileke Mnungu enk’higwe ukulu ino naitende Mwana wa Adamu ahokele ukukile."

5 Yesu nakawaunga Masa na lumbudye hamwenga na Lazalo. 6 Yesu eze eve Lazalo mnyonge niyo enda ukudya endile kwa mazuwa matuhu maidi. 7 Niyo awagamba wanamp’hina wakwe, "Kiteni zatu Yudeya."

8 Wanamp’hina wakwe niyo wamhitula, "Mhinizi, mazuwa mageke yomboke Wayahudi kudya nawakaunga kukutowa maiwe naho waunga kuuya uko?"

9 Yesu niyo awahitula, "Msi hikugaa una masaa mlongo na maidi, naho mnt’hu anagenda mwe ungazi wa nomsi hakukehamiza Kwaviya kuna nulu. 10 Mna anagenda nekilo naagwe kwaviya kuna ziza." 11 Yesu nakalonga ivi naho niyo ongezela, "Mbuyetu Lazalo kabanika mna nenite hamwinule."

12 Wanamp’hina wakwe niyo wamhitula, "Zumbe uneva kagona mnyonge naahone."

13 Mna Yesu na kanda na ivo vo kugamba kabanika, mna woho nawakagamba na kanda kabanika kagona. 14 Yesu niyo awagambila pwilili, "Lazalo kabanika."

Yesu aunyamaza umjubwaniso.

23 Yesu eze engile mwe ngalawa, wanamp’hina wakwe nao niyo wamtimila. 24 Kwandaga mjubwaniso mkulu mwe bahali, naho ingalawa yandaga aka didimila, mna Yesu andaga kagona. 25 Wanamp’hina niyo wamwinula, wakamgamba, "Zumbe kiyokole!" "Kihagihi na kubanika!"

26 Yesu niyo awagamba, "Mwogohai nyuwe mhungukilwe nu mhuwi?" Yesu enukaga niyo akonga kuitivila idya ink’hung’unt’ho, mjubwaniso wanyamalaga, niyo kwa tondowala.

27 Want’hu wose niyo weehelwa, wakagamba, "Uyu ni mnt’hu ywa vivihi akwivigwa hata ni nk’hung’unt’ho ne mijubwaniso ye bahali!"

15 Mwalagulo ludya wanamp’hina wakwe wamwizilaga niyo wamgamba, "Zuwa diswa na uku ki kwe nyika. Walage awant’hu waite wakakezunguile nk’hande."

16 Yesu niyo awagamba, "Hevidahike want’hu awa wahalawe, wenk’heni nyuwe cho kudya."

17 Niyo wamhitula, "Aha suwe kina visamaki vishano du na vebesu viidi va mikate."

18 Yesu niyo awagamba, "Hake vinink’heni." 19 Awagambaga want’hu wekale hasi mwa mani, niyo aguha mikate idya imishano ne visamaki viidi. Niyo akaula kulanga, niyo amtogola Mnungu, aibendulaga migate idya, niyo awenk’ha wanamp’hina, wanamp’hina nawo niyo wawapasila awant’hu. 20 Kila yumwenga adyaga, niyo eguta. Wana mp’hina wakwe waduganyaga nt’hangulu mlongo na mbili zimemile vibesu visigale. 21 Want’hu wadyaga ludyo ulo wandaga gana milongo mishano wagosi awo du, kuleka wavele, na wana.

25 Ize ibuze kilo cha gati ya saa kane na saa mtandatu, Yesu awabasaga wanamp’hina wakwe akagenda mwa amazi.

Yesu awenk’ha nk’hande want’hu milongo mine

32 Yesu niyo awetanga wanamp’hina wakwe, niyo awagamba, "Naona mbazi nawo mdugano uno mkulu Kwaviya nekindanya mwa mazuwa amatatu yose, mna waswesa chokudya, name hikuzumila kuwalaga haheina kuwenk’ha chokudya, Kwaviya na wagwe mteho mwe sila wakauya kwe kaya."

33 Wanamp’hina wakwe niyo wamgamba, "Chapatahi nk’hande kikint’he mdugano uno wose?"

34 Yesu niyo auza, "Mnanayo mikate mingahi?"

Wana mp’hina wakwe niyo wamhitula, "Mfungate na visamaki vigeke."

35 Ivo Yesu niyo awagamba want’hu wekale hasi ho ulwazo. 36 Niyo aguha idya migate mfungate na visamaki, niyo amtogola Mnungu, niyo abendula no kuwenk’ha wanamp’hina, wanamp’hina nao niyo wawapasila awant’hu. 37 Wose wadyaga, niyo weguta. Niyo wanamp’hina waduganya nt’hangulu mfungate zimemile vibesu ve visigale ve mikate.

38 Want’hu waidyaga wabulaga alufu kane, wagosi aawo du, haheina kuwawaza wana hamwenga na wavele.

Maliho ye Nyumba ya Mnungu

24 Yesu na wanamp’hina wakwe weze wabule Kapelinaumu, watoza wa kodi wamwizilaga Petulo, niyo wamuuza kugamba, "Togola, Mhinizi ywenyu akulihaga kodi ye Nyumba ya Mnungu?"

25 Petulo niyo amhitula kugamba, "Alihaga."

Petulo eze engile kwe nyumba, Yesu niyo akonga kumuuza, "Simoni Petulo, wayafanyanya vihi? Mazumbe we isi waduganyaga maliho kulawa kwaani? Kulawa mwa wanawe wenye, hegu kulawa kwa wata kwiza?"

26 Petulo niyo ahitula, "Kulawa kwa wata kwiza."

Yesu niyo amgamba Petulo, "Nivedi. Uneva ni ivo wakaya hawakuliha. 27 Mna vileke kinase kukiguha hant’hu, ita kwe diziwa, kaduule induwano yako, guha samaki ya nk’hongo ukuunga unaigwile. Igubule mnomo wakwe, nouone shilingi mlongo na mbili, ziguhe, niyo unilihile kodi miye hamwenga na weye mwenye."

Yesu Auligita Mtini

18 Mtootondo Umwo andaga akeza naho kwo mzi, akeivaga sala. 19 Eze auone mtini hagihi ne sila, aubasaga, mna haonaga matunda ila na mani du, niyo augamba, "Howize weleke matunda naho ulo na ulo." Aaho umti udya niyo wanyuluka.

20 Wanamp’hina wadya weze wayaone yadya niyo weehelwa wakagamba, "Kwa vivihi mti udya ukanyuluka ludole?" 21 Yesu niyo ahitula, "Nawagambilani ikindedi, mnanda namhuwi, naho msekung’asang’asa, nomdahe kudamanya hiyo enga idi du dyo didamanyike dyo mtini, nomdahe hata kuugamba mnima uno, ita kakedule kwe bahali, naho niyo vanda. 22 Nawagambilani ikindedi mnanda na mhuwila nom mhokele kia ukulombeza."

37 Niyo halaila nk’hung’unt’ho nk’hulu, mjubwaniso wa mazi niyo yaitowa idya ngalawa, ingalawa nayo niyo yakonga kumema mazi. 38 Yesu andaga kagonela mwo mto kunyuma mwe ngalawa. Niyo wanamp’hina wakwe wamwinula, wakamgamba, "Mhinizi, hukuona changamila?"

39 Niyo Yesu enuka, akonga kuditivila diya diheho dikulu na kuugamba mjubwaniso, "Nyamala twii!" Diya diheho niyo dyanyamala, niyo kwenda mp’heho tondolo. 40 Niyo awagamba wanamp’hina wakwe, "Nii mwogoha? Mkeyi kunda na mhuwi?"

41 Niyo wogohesa wakakegamba, "Uyu mnt’hu ywa vivihi? Akwivigwa hata ni nk’hung’unt ho ne mijubwaniso ye bahali!"

35 Ize ibuze nekisingi, wanamp’hina wakwe niyo wamuitila na kumgamba, "Hant’hu aha ni he nyika, ne dizuwa nadyo dyaswa. 36 Walage want’hu awa vileke waite mwe migunda hamwenga na zikaya zihagahi wakakeguile nk’hande."

37 Mna Yesu niyo awahitula, "Wenk’heni nyuwe nk’hande."

Niyo wamuuza, "Haluse kikawaguile mikate ya dinali magana maidi weze wadye?"

38 Niyo awauza, "Mnanayo mikate mingahi? Iteni mkaikaule."

Weze wamanye, niyo wamhitula, "Kuna mikate mishano hamwenga na samaki mbili."

39 Yesu niyo awagamba wanamp’hina wakwe wawagambile want’hu wekale hasi mwa mani wakepange mwe vibunga. 40 Niyo wekala mwe vibunga va want’hu maganagana, aha milongo mishano shano. 41 Niyo Yesu aguha idya mikate mishano ne ziya zisamaki zimbuli, niyo akaula kulanga kwe mbingu, na kumtogola Mnungu. Niyo abendula idya mikate na kuwenk’ha wanamp’hina wakwe wawapangile want’hu. Naho niyo awapangila want’hu wose ne ziya zisamaki zimbuli. 42 Want’hu wose niyo wadya no kwiguta. 43 Wanamp’hina wakwe walogotaga vibesu visigale na samaki na kumemeza nt’hangulu mlongo na mbili. 44 Wagosi du nao wawazigwe, naho na wanda magana milongo mishano.

48 Niyo awaona wanamp’hina wakwe viya wandile wakapayapaya mwe ngalawa kwaviya nawakahigana na heho. Hagihi na mazogolo kwila, niyo awatimila akagenda mnanga mwe mazi. Na kaunga kuwomboka, 49 mna woho weze wamuwone akagenda mwe mazi, nawakagamba ni mzimu. Niyo waguta nk’hunga 50 kwaviya wose nawogoha.

Yesu niyo awagamba, "Msekogoha! Ni miye. Keink’heni moyo!" 51 Niyo akwela mwe ngalawa mdya weli, heho niyo dyaleka. Wana mp’hina wakwe niyo weheleswa

Yesu awenk’ha nk’hande want’hu wabwiile magana milongo mine

1 Mwe mazuwa yadya, fyo tuhu dya want’hu dyadugana naho hamwenga. Wadya want’hu weze waswese cho ukudya, Yesu niyo awetanga wanamp’hina wakwe, awagamba, 2 "Nawonela mbazi wano want’hu, na wanda na miye mazuwa yose aya matatu, naho ivi haluse waswesa kint’hu cho ukudya. 3 Uneva nnawagamba wauye kaya haheina kuwek’ha nk’hande, wadaha wakagwa mteho mwe sila, kwaviya watuhu weza kulawa hale."

4 Wanamp’hina wakwe niyo wamuuza, "Haluse ni kuhi aha he nyika kikudaha kupata nk’hande ya kuwenk’ha want’hu woseni awa?"

5 Yesu niyo awauza, "Togoleni, mnanayo mikate mingahi?"

Niyo wamhitula, "Mfungate."

6 Yesu niyo awagamba want’hu wekale hasi. Niyo aiguha idya mikate mfungate na kuivikila. Abendula bendula, awenk’ha wanamp’hina wakwe na kuwasigila wawapangile want’hu. Woho nao niyo wadamanya enga viya wasigilwe. 7 Naho nawanda na wasamaki wageke. Yesu niyo awavikila na kuwenk’ha wanamp’hina wakwe wawapangile want’hu. 8 Want’hu wose wadyaga na kwiguta. Niyo wanamp’hina wakwe wakasinya masigazi ye vibesu ve nk’hande vikumema nt’hangulu mfungate. 9 Hadya nahanda na want’hu wajink’hile magana milongo mine. Yesu niyo awalaga,

Yesu auligita mtini

12 Zuwa dya kaidi weze wande walawa Besania, Yesu andaga na sala. 13 Aonaga kwa hale mtini umemile mani. Niyo aubasaga vileke akakaule uneva naapate tini. Eze abule, abwiila mani ayo du kwaviya yandaga hiyo msimo wakwe wo kweleka. 14 Yesu niyo augamba mtini, "Kukongela dielo na mazuwa yose hahali mnt’hu naadye matunda kulawa kwako nahi."

Wanamp’hina wakwe niyo wamwiva viya alongaga.

Hinizo dyo mtini uligitwe ni Yesu

20 Mtondotondo Zuwa dya kaidi tondotondo, umwo wandile wakomboka, wauwonaga udya mtini uligitwe ni Yesu unyala kukongela kwa maizi. 21 Petulo niyo akumbukila yadya yalaile, niyo amgamba Yesu, "Mhinizi, hake kaula! Udya mtini uuligite unyala!"

22 Yesu niyo awahitula, "Mhuwileni Mnungu. 23 Nawagambilani ikindedi, mnt’hu yeyose anaugamba mnima uno, genda kakeduule mwe bahali, handile na kiyangayanga mwo moyo wakwe, mna anahuwila kugamba mbuli zose akuzilonga zadahika, naadamanyilwe ayo. 24 Kwa ivo namigambilani, mnanda mwo kuvika na kulombeza kint’hu chochose, mhuwile kugamba mhokela, nanywe nomwikwe kiya mkulombeza. 25 Nanywe mnanda mkavika, wausileni want’hu wavu wawe vileke Tati yenyu ekwe mbingu naye amiusileni uwavu wenyu.

Yesu awetanga wanamp’hina wa nk’hongo

1 Zuwa dimwenga Yesu andaga kakimala hank’handa he diziwa dya Genezaleti. Want’hu wengi nawammemela no kukefint’hafint’ha wakategeleza Mbuli ya Mnungu. 2 Niyo aona ngalawa mbili zandile mnk’handa mwe diziwa zilekigwe ni walowa wandile wakasunt’ha zinyavu zawe. 3 Yesu niyo engila mwe ngalawa imwenga, naho neinda yakwe Simoni, niyo amuunga aigale hale ludodo kulawa mnk’handa mwe diziwa. Yesu ekalaga mnanga mwe ngalawa no kukonga kuhiniza.

4 Eze abinde kulonga, niyo amgamba, "Simoni igale, ingalawa kwa mazi matali vileke mkalowe zisamaki."

5 Simoni niyo amhitula, "Zumbe," "kidamanya ndima kilo kigima haheina kupata kint’hu chochose. Mna kwaviya weye kulonga, chalowa naho!" 6 Weze wadule zinyavu, niyo walowa samaki nyingi vitendile zinyavu zawe zinde hagihi na kukant’hika. 7 Niyo wawahungila mikono weyawe wandile mwe ngalawa nt’huhu weze wawambize. Niyo weza no kumemeza samaki mwe ngalawa zose mbili, nazo zaungaga kudidimila mwe mazi. 8 Simoni Petulo eze aone diya dilaile, niyo amfikila madi Yesu, agamba, "Zumbe, halawe hangu! Miye ni mta wavu!"

9 Simoni hamwenga na weyawe niyo wehelwa kwa zisamaki zinyingi wapatile. 10 Naho weyawe wa Simoni, Yakobo na Yohana wana wa Zebedayo nawo wehelwa. Yesu niyo amgamba Simoni, "Usekogoha, kukongela ivi haluse nounde walowa want’hu." 11 Niyo zingalawa zawe wazigamiza mp’wani, walekaga kila kint’hu niyo wamtimila Yesu.

Yesu autivila mjubwaniso

22 Zuwa dimwenga Yesu hamwenga na wanamp’hina wakwelaga mwe ngalawa. Niyo awagamba, "Nekijink’hanyeni int’hendelo int’huhu ye diziwa." Ivo niyo wakonga kuita. 23 Weze wakonge kuita, Yesu niyo agona nt’hongo. Aaho, nk’hung’unt’ho nk’hulu yakongaga kuvumila mwe bahali, ngalawa niyo yakonga kumema mazi, niyo wanda hagihi no kwangamila.

24 Wana mp’hina wamwinulaga, wakamgamba, "Zumbe, Zumbe! Chabanika pele!"

Yesu niyo enuka, niyo aitivila ink’hung’unt’ho idya hamwenga na mazi ye diziwa, niyo kwanda mp’heho tondolo. 25 Niyo Yesu awagamba wanamp’hina wakwe, "Wikuhi mhuwi wenyu?"

Weheelagwa na kogoha, wakagambana, "Uyu ni mnt’hu ywa vivihi? Akutivila nk’hung’unt’ho ne mijubwaniso ye bahali, navo vamwiva!"

Yesu autivila mjubwaniso

22 Zuwa dimwenga Yesu hamwenga na wanamp’hina wakwelaga mwe ngalawa. Niyo awagamba, "Nekijink’hanyeni int’hendelo int’huhu ye diziwa." Ivo niyo wakonga kuita. 23 Weze wakonge kuita, Yesu niyo agona nt’hongo. Aaho, nk’hung’unt’ho nk’hulu yakongaga kuvumila mwe bahali, ngalawa niyo yakonga kumema mazi, niyo wanda hagihi no kwangamila.

24 Wana mp’hina wamwinulaga, wakamgamba, "Zumbe, Zumbe! Chabanika pele!"

Yesu niyo enuka, niyo aitivila ink’hung’unt’ho idya hamwenga na mazi ye diziwa, niyo kwanda mp’heho tondolo. 25 Niyo Yesu awagamba wanamp’hina wakwe, "Wikuhi mhuwi wenyu?"

Weheelagwa na kogoha, wakagambana, "Uyu ni mnt’hu ywa vivihi? Akutivila nk’hung’unt’ho ne mijubwaniso ye bahali, navo vamwiva!"