1 Mwana mta mzungu neeve makanyo ya ise, mna mta lubezo hakwiva akakanywa.

2 Mnt'hu ywedi apata upati kulawa mwe milosi yakwe yedi, mna walulimi waungisa nk'humbizi.

3 Akwamila mnomo wakwe amila wikazi wakwe, mta kilongelonge akebananga yehe mwenye.

4 Msokezi amunk'hilwa mna hakupata chochose, mna wose wakukombeka wapatisa.

5 Mnt'hu mhuwilwa aihiya lulimi, mna mwiihi adamanya kwa soni na kuhuza.

6 Uwedi wawaamila wadya wata lugendo lwedi, mna wavu wawagwesa waiihi.

7 Wamwenga waketenda wagoli, ikindedi chakwe hawana kint'hu, watuhu wakeona wakiwa mna ikindedi wana ugoli.

8 Ugoli wa mnt'hu wadaha kuyokola wikazi wakwe, mna mkiwa hana cho kutiswa.

9 Mnt'hu ywedi ang'alisa enga lumuli lukukweela vedi, mna waihi ni enga lumuli lukuzima.

10 Kitugu chegala nk'humbizi du, mna kwa wadya wakuzumila ulangilizi wedi wana mzungu.

11 Ugoli ukwiza kipump'ha wasunguza kusila, mna akuiduganya mp'halahole yekala naho yagenyela.

12 Kawiilo dya kugojagoja dyalumiza umoyo, mna kawiilo dikukint'ha nu mti wa ugima.

13 Yeyose akulemela ulangilizi wedi akegaila makunt'ho, mna akutimila imiko enk'higwa nt'hunyo.

14 Mahinizo ya mnt'hu mta mizungu ni nc'hoko zo ugima, yamhitula mnt'hu kulawa mwe mitego yo kubanika.

15 Kunda na mzungu kwegala nt'hunyo, mna sila ya waihi ni ya makunt'ho.

16 Mta mzungu adamanya kila kint'hu kwa ubala, mna mhezi hakuufisa uhezi wakwe.

17 Mwigala ulosi aihile abanikila mwo uwihi, mna mwigala ulosi mhuwilwa egala ugima.

18 Yeyose akubela makanyo egala ukiwa na kupata soni, mna yehe akuzumila makanyo apata nt'hunyo.

19 Kawiilo dikint'hile ni dyedi mwo moyo, mna wahezi waihiya kuleka uwihi.

20 Ita hamwenga na wata mzungu na weye nounde na mzungu, mna akukelunga na wahezi napate makunt'ho.

21 Makunt'ho yampata yudya akudamanya wavu, mna wata uwagilwa nawapate ayedi.

22 Mnt'hu ywedi awalekela ukipe welekwa wakwe, mna ugoli wa mnt'hu mta wavu waikilwa want'hu wedi.

23 Nk'honde ya mnt'hu mkiwa walava ulozo ubindile wingi, mna haheina ikindedi uwagilwa wahauka.

24 Uyo hekumkanya mwanawe hakumuunga, mna akumuunga mwanawe asunguza kumwogola.

25 Mnt'hu mta uwagilwa adya na kwiguta, mna mwiihi ana makunt'ho ya sala.