1 Mwanangu, uneva kukelava mwenye kwa mbwiyayo, na kuika lagano kwa mnt'hu mtakwiza, 2 uneva kukegwila kwa milosi yako mwenye naho kuketoza kwa malagano ayo uyaikile. 3 Umanye kugamba umwe ukaulizi wa uyo miyawo, mna mwanangu ukaunga kukeyokola, ivo damanya aya, Mwitile uyo miyawo kwa kukeseleza umlombeze akulekele. 4 Sema unagone nt'hongo, hegu kukupila. 5 Keyokole kwa kukenega enga mbala kulawa mwo mtego, naho enga madege kulawa mwo ulalavi.

6 Weye msokezi, sungila umswa naho ufanyanye sila zakwe vileke upate umanyi. 7 Mswa hauna kilongozi hegu mkulu hegu mkimalizi, 8 mna wakeikila nk'hande mwo lupisi lwa uvuni, naho vakeduganyila kindolo mwo lupisi lwa ulozo. 9 Weye msokezi, nougone mpaka ini? Nowinuke ini mwe zint'hongo zako? 10 Wagamba, "Nileke nigone hadodo du, naho goja mikono ihumule hadodo" 11 Mwo lupisi ulo ukiwa noukubwiile enga mhoki, naho ukiwa uwo noukutimile enga mbavi ana vitoanilo.

12 Mnt'hu mwavu na mlulimi, uyo hana wambizi kint'hu, akangadika uku akalonga mbuli ziihile. 13 Akakonyeza na uku akalava kilagiso kwa viga, na kwa vidole vakwe vileke amluvye. 14 Akanda kamema kuluvya mwo moyo wakwe uku akafanyanya maihi, akabwelekeza nk'humbizi kila hant'hu. 15 Kulawa mwa ayo akudamanya makunt'ho nayamkup'hukile naho naabanangwe haheina kuhona.

16 Kuna vint'hu mtandatu akuihiwa Zumbe Mnungu

Naho, viyaho mfungate vikumgela maya. 17 Meso ya kitugu

Lulimi lwa udanti,

Mikono ikukoma want'hu heweena masa, 18 moyo ukuika mzungu wiihile

Viga vikuguluka kudamanya uwihi, 19 Muwona ywa lulimi akubwelekeza lulimi na kuwatenda wandugu wagombe.

20 Mwanangu tozesa malagizo ya iso naho unase kujala mahinizo ya nyokwe. 21 Uyaike mwo moyo wako mazuwa yose, naho uyakaulisise. 22 Umwo ukagenda nayakulongoze, umwo ukagona nayakwamile, umwo ukenuka nayakulangilize. 23 Kwaviya sigilizi iyo ni enga lumuli, naho sigilizi iyo ni enga ung'azi, makanyo ayo ni yedi nayakuike mwe sila yo ugima. 24 Nayakwamile na mvele aihile, nayakuike hale na milosi inamwiile ya mvele mhabwasi. 25 Usekumunk'hilwa na uyo mvele kwa uwedi wakwe, hegu unase kuzumila kugwilwa na meso yakwe. 26 Mnt'hu aza kabesu ko mkate kwa mhabwasi, mvele ywa mnt'hu mtuhu naakuhose uwaze ugima wako.

27 Togola mnt'hu adaha kuika moto mwe kizibau mwe kifua na suke zako zisekuhya? 28 Togola mnt'hu adaha kujata nk'hala zo moto, na visigino vakwe visekuhya? 29 Nivo vili mgosi naagende na mvele wa miyawe, yeyose naagende na mvele uyo haalekigwe kusengelwa. 30 Want'hu hawakumbela mbavi umwo anabawa kwajili ye sala, 31 mna anagwilwa aungwa alihe nk'hanana mfungate, naho naalave ugoli wose ananawo. 32 Mgosi akugenda na mvele wa mwenye ni mhezi, naho akebananga yehe mwenye. 33 Naafyalikwe na soni heiyauke mwakwe na mabezo naayapate hayahauke mwake. 34 Kwaviya wivu wa mgosiwe wamtendesa ande na luhahila, umwo akalihiza kikoda haande na mbazi. 35 Haazumile maliho yoyose hegu kwink'hwa geleko dyodyose.