1 Yeyose akuunga kukanywa aunga mzungu, mna heekuunga kukanywa uyo mhezi.

2 Mnt'hu ywedi amilwa ni Zumbe Mnungu, mna akuika mzungu wiihile naaligitwe ni Zumbe Mnungu.

3 Hakuna akudaha kutoga kwa kudamanya yaihile, mna mnt'hu muwagilwa hakudahika kuuswa.

4 Mvele ywedi ni nt'hunyo kwa mgosiwe, akumgela soni mgosiwe ni enga kuola mwa mavuha ya mgosiwe.

5 Fanyanyi za mnt'hu mhuwilwa ni za uwagilwa, mna fanyanyi za mnt'hu mwiihi ni za udant'hi.

6 Milosi ya want'hu wata uwihi ni kuunga kukoma heweena masa, mna milosi ya want'hu wata uwagilwa ni kuunga kuwayokola.

7 Waihi wabanangwa pele, mna mp'huga ya wahuwilwa yakimala itogile.

8 Mnt'hu atunywa kwa fanyanyi zakwe zedi, mna mnt'hu abelwa kwa fanyanyi zakwe za kihezi.

9 Ni vedi mnt'hu heena kint'hu akukedaha yehe mwenye, kujink'ha mnt'hu akuketenda mkulu mna hana nk'hande.

10 Mnt'hu mhuwilwa akaulisa mifugwa yake, mna mnt'hu mwiihi ni kwank'walu kwe mifugwa yakwe.

11 Mnimi akukombatiza ana nk'hande, mna akutimila mbuli za kihezi hana ubala.

12 Waihi waunga upati hewe wagilwe, mna mnt'hu muwagilwa akimala atogile.

13 Mnt'hu mwiihi agwilwa ni zimbuli zakwe mwenye, mna mta uwagilwa haapate makunt'ho.

14 Mnt'hu anda na upati viligane ne milosi yakwe, ndima akuzidamanya nazo zamwink'ha upati.

15 Mhezi aiyona sila yakwe kunda yedi kwakwe, mna mta mzungu ategeleza ulangilizi.

16 Maya ya mhezi yasunguza kumanyika, mna mta uwagilwa ayabela maihi.

17 Akulonga kindedi alava uwona wa kindedi, mna muwona wa udant'hi alava uwona wa udant'hi.

18 Milosi ihile yalumiza enga sime, mna ulosi wa mta mzungu wagela uhonyi.

19 Kindedi chekala mazuwa yose, mna lulimi haukwikalisa.

20 Wakuika mzungu wa maihi wamema udant'hi mwo moyo, mna wakuunga ayedi wapata kinyemi.

21 Want'hu wedi haweziilwe ni mbuli yeyose iihile, mna waihi wana makunt'ho mengi.

22 Lulimi ni ihizo kwa Zumbe Mnungu, mna want'hu wakulonga kindedi ni kinyemi kwakwe.

23 Wata mzungu wafisa umanyi wawe, mna wahezi wabwelekeza uhezi wawe.

24 Kukombekesa kwamwink'ha mnt'hu ukulu, mna msokezi naande mtumwa.

25 Kiyangayanga mwo moyo kwamswesa mnt'hu kunda na kinyemi, mna mbuli yedi yamsangalaza.

26 Mta uwagilwa ni kilongozi ywa miyawe, mna sila ya want'hu waihi yawazaganya woho wenye.

27 Mnt'hu msokezi haapate kiya ukuunga, mna akukombeka naapate kiya akuunga.

28 Uwagilwa ni sila yo ugima, mna uwihi walongoza kwo kubanika.